Castrol ni Ishami ry’Ikigo mpuzamahanga cy’Abongereza, BP cyizwiho ubunararibonye mu bucuruzi bw’amavuta y’ibyuma by’imodoka.

Amasezerano y’ubufatanye hagati ya Castrol na RUBiS yabaye kuri uyu wa Gatatu tariki 14 Kanama mu Mujyi wa Kigali, aho yitezweho guteza imbere ibijyanye n’ubucuruzi bw’amavuta yifashishwa mu binyabiziga.

Umuyobozi Mukuru wa RUBiS, Kayihura Jeanine, yavuze ko biteguye guhaza isoko ry’u Rwanda bakoresheje amavuta y’ibinyabiziga yujuje ubuziranenge ku rwego mpuzamahanga.

Ati “Ubu bufatanye na Castrol ni intambwe nshya mu bijyanye no kwita ku binyabiziga by’Abanyarwanda. Dusanzwe dushyira imbere gutanga serivisi nziza, twizeye ko rero bizazana impinduka ku isoko ry’u Rwanda.”

Yavuze ko ubu amavuta ya Castrol agiye kujya aboneka kuri sitasiyo zose za RUBiS, bityo bifashe abantu kuyabona mu buryo bworoshye.

Umuyobozi Mukuru wa Castrol muri Afurika y’Iburasirazuba, Ed Savage yavuze ko ubu bufatanye buzarushaho gufasha icyo kigo kwagura amarembo n’ibikorwa byacyo, ariko Abanyarwanda babona ibicuruzwa byacyo hafi.

Ati “Ubu bufatanye ni igihamya cy’icyerecyezo dusangiye cyo gutanga serivisi nziza ku bakiliya bacu. Kwinjiza amavuta yacu ku isoko ry’u Rwanda bizazamura imitangire ya serivisi mu bijyanye no kwita ku binyabiziga mu gihugu hose.”

Ibi bigo byombi byiyemeje gushyira ku isoko amavuta y’imodoka atangiza ibidukikije, bijyanye n’umurongo u Rwanda rufite wo kurengera ibidukikije cyane cyane mu bijyanye n’ibinyabiziga.

Ibi bigo byombi byinjiye mu bufatanye bwitezweho kuzamura urwego rw'ibijyanye n'amavuta y'ibinyabiziga mu Rwanda

Castrol ni kimwe mu bigo bikomeye ku rwego mpuzamahanga, gicuruza amavuta y'ibinyabiziga

Castrol ni ikigo cyaguzwe na sosiyete BP yo mu Bwongereza

Ubu bufatanye bwasinyiwe i Kigali kuri uyu wa Gatatu

Umuyobozi Mukuru wa RUBiS, Kayihura Jeanine yizeye ko abatunze ibinyabiziga mu Rwanda bagiye kubona amavuta meza yabyo

Ubuyobozi bwa Castrol bwiyemeje gukomeza kwagura amasoko