Brussels Airlines yizihije umunsi w’abagore ikoresha itsinda ryabo mu rugendo ruza i Kigali

Yanditswe na Mukaneza M.Ange
Kuya 9 Werurwe 2019 saa 12:37
Yasuwe :
0 0

Sosiyete itwara abantu n’ibintu mu ndege, Brussels Airlines, yizihije Umunsi Mpuzamahanga w’abagore, mu buryo budasanzwe aho indege yayo yaje i Kigali itwawe n’itsinda rigizwe n’abagore gusa.

Ku mugoroba wo ku itariki 8 Werurwe 2019, nibwo indege SN467 yaturutse mu mujyi wa Bruxelles mu Bubiligi yageze i Kigali ahagana saa moya n’iminota 20 z’ijoro, urugendo rwakomeje rwerekeza Entebbe muri Uganda.

Guhera ku mupilote wari utwaye iyi ndege n’uwo bafatanyije kugera ku bakozi baba bafite inshingano yo kwita ku bagenzi bose bari abagore.

Umuyobozi wa Brussels Airlines mu Rwanda, Coline Everard, yatangaje ko bahisemo gukoresha itsinda ry’abagore by’umwihariko kuri uyu munsi, kuko bifuza gutanga impuruza ku busumbane hagati y’abagore n’abagabo.

Ati “Nubwo muri rusange muri Brussels Airlines 51% by’abakozi bose ari abagore, hari inzego usanga uyu mubare ukiri hasi nk’aho abapilote b’abagore ari 10.2% gusa. Gukoresha itsinda ry’abagore uyu munsi ni uburyo bwo gutanga impuruza tugaragaza ko hakiri ikibazo cy’ubusumbane hagati y’abagore n’abagabo mu Burayi no muri Afurika.”

Everard wabaye umugore wa mbere wahawe guhagararira Brussels Airlines mu Rwanda, yavuze ko yishimira guhagararira abandi bagore by’umwihariko mu gihugu cyakoze byinshi bigamije guteza imbere no kongerera abagore ubushobozi.

Katty Wellekens, umupilote muto wari utwaye iyi ndege (First officer), yavuze ko abagore bakwiye kwitinyuka bakumva ko nta murimo wagenewe abakobwa cyangwa abahungu, kandi gushaka ari ugushobora.

Ibi kandi yabihurijeho na Anne Asselman bari bafatanyije muri uru rugendo (captain), wavuze ko kuba itsinda ryose ryari rigizwe n’abagore bitanga ubutumwa bw’uko babishoboye kandi bishoboka.

Ati “Mu bihugu byinshi no mu Bubiligi haracyagaragara ubusumbane hagati y’abagore n’abagabo ndetse no mu mishahara yabo. Ntekereza ko iyi ari gahunda nziza yo kugaragaza ko bishoboka, abana b’abakobwa b’Abanyarwanda nababwira ngo mwigirire icyizere, murashoboye”.

Ubuyobozi bwa Brussels Airlines buvuga ko iyi sosiyete ishyira imbaraga mu guharanira ko abagabo n’abagore bagira uburenganzira bungana, ndetse hari na politiki igamije gutuma hatagira uwumva ko adahabwa agaciro akwiye.

Akanyamuneza kari kose ku bakozi bose ba Brussels Airlines
Bagenzi babo b'abagabo nabo bari baje kwishimana nabo
Bamwe mu bagore bakorera Brussels Airlines barimo n'itsinda ryaje ritwaye iyi ndege
Brussels Airlines isanzwe iharanira guteza imbere uburenganzira bungana hagati y'abagore n'abagabo
Byari ibyishimo ku itsinda ry'abakozi ba Brussels Airlines
Byari ibyishimo kuri bo aho bahamya ko bakorera ikigo kibafata kimwe na bagenzi babo b'abagabo
Indege SN467 yaturutse mu mujyi wa Bruxelles mu Bubiligi yageze i Kigali ahagana saa moya n’iminota 20 z’ijoro yari iyobowe n'abagore gusa
Indege ya Brussels Airlines iyobowe n'itsinda ry'abagore yahise yerekeza Entebbe muri Uganda
Iyi ndege yavuye mu Bubiligi, igera i Kigali aho yahise ikomereza Entebbe muri Uganda itwawe n'itsinda ry'abagore
Umuyobozi wa Brussels Airlines mu Rwanda, Coline Everard (hagati), na bamwe mu bakozi bakorana

Amafoto: Niyonzima Moses

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza