00:00:00 IGIHE NETWORK KN KINYARWANDA EN ENGLISH FR FRANCAIS

Amabagiro mbarwa niyo yujuje ubuziranenge mu Rwanda

Yanditswe na Mugisha Christian
Kuya 18 May 2022 saa 10:37
Yasuwe :

Mu igenzura ryakozwe, hagati ya Nzeri n’Ukwakira mu 2021, Ikigo cy’Igihugu gishinzwe Ubugenzuzi bw’Ubuziranenge, Ihiganwa mu bucuruzi no kurengera Umuguzi (RICA), cyagaragaje ko mu mabagiro 48 yakorewe isuzumwa, arindwi gusa ari yo yari yujuje ibisabwa ku kigero cya 70%.

Byatangajwe kuri uyu wa Kabiri ubwo hamurikwaga ibyavuye muri iryo genzura rigamije gufata ingamba kugira ngo ubucuruzi bw’inyama hirya no hino mu gihugu bwubahirize ubuziranenge, no gutangiza ukwezi kwaharire ubukangurambaga ku nyama zujuje ubuziranenge.

Bimwe mu biranga ibagiro ryujuje ibisabwa harimo ko rigomba kugira amarembo atandukanye, hakaba ahinjirira amatungo aje kubagwa n’ahasohokera inyama. Hagomba kubaho kandi itandukaniro rigaragara hagati y’ahakorerwa imirimo isukuye n’ahakorerwa imirimo yanduye.

Inyubako igomba gusigwa irangi rikeye kandi ryoroshye gusukura, hagomba kuba hari n’ibikoresho byinjiza umwuka mwiza mu ibagiro mu rwego rwo kurwanya umwuka utari mwiza.

Igenzura ryagaragaje ko amabagiro 20 basanze yujuje ibisabwa ku kigero cya 50-69%, naho 21 yagenzuwe yari yujuje ibisabwa ku kigero kiri munsi ya 50%.

Ahacururizwa inyama (boucheries) 159 hagenzuwe, ahagera ku 105 honyine niho hujuje ibisabwa ku kigero kiri hagati ya 50-69%.

Intego y’ubu bukangurambaga bugiye kumara ukwezi ni ugukangurira abakora umwuga wo kubaga amatungo no gucuruza inyama, guharanira ubuziranenge bwazo kugira ngo barengere ubuzima bw’umuguzi.

Bimwe mu bibazo bitegereje gushakirwa umuti muri uku kwezi harimo gukemura ibibazo by’amatungo ajyanwa ku mabagiro afite ibibazo, kwita ku matungo yagejejwe ku mabagiro atameze neza, Kubaga amatungo mu buryo butari ubwa kinyamwuga, uburyo bwo gucunga imyanda iva mu mabagiro [isuku] n’uburyo bw’ubwikorezi bukoreshwa mu gutwara inyama.

Hateganijwe kandi guhugura, kwigisha ndetse no gukomeza ubukangurambaga mu bice bitandukanye mu gihugu ku bijyanye no gutunganya inyama mu buryo bwa kinyamwuga ndetse kwandika no gushyiraho abagenzuzi b’inyama bigenga.

Hagaragajwe n’ikibazo cy’amabagiro y’ingurube adahari kandi ari zimwe mu nyama zikunzwe cyane.

Umuyobozi Mukuru wa RICA, Uwumukiza Béatrice, yavuze ko bashishikariza abashoramari bujuje ibisabwa kubaka ayo mabagiro hasigasirwa ubuziranenge bw’inyama.

Ati “Turi gukorana n’abikorera kugira ngo uyu mwuga ukomeze utere imbere, dusaba abantu ko bashoramo imari kugira ngo aya mabagiro yabugenewe aboneke vuba atangire gukoreshwa.”

Abari basanzwe bakora umwuga wo kubaga bashishikarijwe kwishyira hamwe mu rwego rwo kwirinda akajagari no guca burundu inyama zitujuje ubiziranenge.

Umuyobozi Ushinzwe guteza Imbere Ubukungu muri Minisiteri y’Ubucuruzi n’Inganda, Karangwa Cassien, yavuze ko amabagiro akiri make ariko hagiye kongerwaho andi mabagiro aza yunganira ayari asanzwe.

Amabagiro n'inzu zicuruza inyama mu Rwanda zasabwe kwitwararika ubuziranenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .