Abakora imigati n’ibindi mu ifarini beretswe uburyo bashobora no kwifashisha ifu y’imyumbati

Yanditswe na Iradukunda Serge
Kuya 20 Nzeri 2019 saa 06:32
Yasuwe :
0 0

Impuguke zaturutse muri Nigeria na Tanzania zahuguye Abanyarwanda bakora ibikomoka ku ifarini ku buryo bashobora gukoresha ifu y’imyumbati ikorwa n’uruganda rwa Kinazi, igasimbura cyangwa ikunganira ifarini isanzwe y’ingano kandi ntibihungabanye ubwiza bwabyo.

Ni mu mahugurwa y’iminsi itatu yateguwe n’Ikigo mpuzamahanga cy’Ubushakashatsi ku Buhinzi (IITA) ku bufatanye n’Ikigo cy’Igihugu cy’Ubuhinzi (RAB) na Minisiteri y’Ubucuruzi n’Inganda, agamije kongerera agaciro igihingwa cy’imyumbati. Yatangiye ku wa 16 Nzeri asozwa kuri uyu wa Gatanu, ku ruganda rwa Kinazi mu karere ka Ruhango.

Umuyobozi ushinzwe guhuza abafatanyabikorwa muri IITA, Kantengwa Speciose, yavuze ko aya mahugurwa azatuma abayitabiriye bagira ubumenyi ku bindi ifu y’imyumbati ikora.

Ati “Ntabwo imyumbati yazajya ikoreshwa gusa mu bugari no kuyitogosa, ahubwo yavamo ifu ivangwa n’andi mafu kugira ngo bakore ibindi bintu bitandukanye.”

Kantengwa yongeyeho ko igihe iyi fu y’imyumbati izaba yatangiye gukoreshwa muri ibi bikorwa, bizaha umuhinzi w’imyumbati isoko rihoraho ndetse bigateza imbere igihugu muri rusange, kuko ifarini yatumizwaga hanze izagabanuka.

Izi mpuguke zereka abakozi b’uru ruganda n’izindi zitunganya ifu y’imyumbati zirimo Akanoze Foufou Flour, Shekina Enterprise na Urwibutso Enterprise, uburyo hakorwa ifu nziza ishobora gusimbura ifarini cyangwa ikayunganira ndetse bereka n’abakora imigati na ‘keke’ (cake) uburyo bayikoresha igihe iyi fu yabonetse.

Umuyobozi ushinzwe kumenyekanisha ibikorwa bya Kinazi Cassava Plant, Ishimwe Ann Christin, yavuze ko igihe abakora ibikomoka ku ifarini mu Rwanda bazaba bitabiye gukoresha ifu y’imyumbati, bizaba ari isoko rindi ku ruganda rwa Kinazi ndetse n’umuhinzi akazamuka.

Yagize ati “Byadufasha igihe abakora imigati, capati, amandazi n’ibindi bitandukanye babashije gukoresha iyi fu, twabona isoko ryagutse kurusha iryo twari dusanzwe dufite mu gihugu kuko byadufasha nk’uruganda, bigateza imbere igihugu cyane cyane biteza imbere abahinzi b’imyumbati.”

Iyi fu y’uruganda rwa Kinazi izajya yifashishwa mu gukora amandazi n’imigati, capati na keke, itandukanye gato n’isanzwe iribwa nk’ubugari kuko yo izajya ikorwa mu myumbati imaze amezi atari hejuru ya 12, ndetse ikaba inoze cyane ugereranyije n’isanzwe ku buryo iyo ivanzwe n’ifarini bititandukanya.

Umwe mu bahuguwe ku mikoreshereze y’iyi fu ya Kinazi akaba n’umukozi wa Entreprise Urwibutso, Uwayo Désiré, yavuze ko yasanze iyo ukoresheje iyi fu ya Kinazi bidahungabanya ubwiza n’ubuziranenge bw’icyo wakoze.

Ati “Ntabwo ushobora kubitandukanya, muri rusange ubwiza uko bwari bumeze ku ifarini ni nako bwagumye nyuma yo gushyiramo ifu y’imyumbati, ntushobora kubitandukanya.”

Umuyobozi wa CARL Group, ikigo gikora umugati mu bijumba, wanitabiriye aya mahugurwa, Umugiraneza Regis, asanga igihe iyi fu izaba itangiye gukoreshwa bizafasha n’abantu bagira ikibazo cy’uburwayi, kuko imyumbati itagira ikinyabutabire kiba mu ngano cyitwa ‘Gluten’ kigora igogora.

Umwe mu batanze amahugurwa ku ikoreshwa ry’iyi fu y’ubugari, Dr Awoyale Wasiu, yavuze ko kuvanga ifu y’imyumbati n’ifarini harimo inyungu kuko byongera ingano y’ibivamo.

Ati “Ni ingenzi kuvuga ko kongera ifu y’imyumbati mu ifarini igihe uri gukora umugati havamo myinshi ugereranyije n’igihe ukoresheje ifarini nyinshi.”

Biteganyijwe ko aba bahuguwe bazafasha guhugura abandi mu bice bitandukanye by’igihugu.

Bamwe mu bitabiriye aya mahugurwa berekwa uko Ifu y'imyumbati ishobora kuvangwa n'ifarini
Bimwe mu byakozwe hifashishijwe ifu y'imyumbati ikorwa n'uruganda rwa Kinazi gusa cyangwa yavanzwe n'ifarini
Ibyakozwe mu ifu y'imyumbati ya Kinazi bishyirwa mu ifuru kugira ngo bishye nk'uko bigenda iyo bikozwe mu ifarini gusa
Ubu bwoko bw'ifu y'imyumbati ikorwa n'uruganda rwa Kinazi nibwo bwakoreshejwe mu gukora izo capati
Umugati wakozwe hifashishijwe uruvange rw'ifu y'imyumbati ya Kinazi ntaho uba utandukaniye n'ukorwa mu ifarini gusa
Uwayo Désiré ukora muri Entreprise Urwibutso, avuga ko nyuma yo gukoresha uru ruvange rw'ifu y'imyumbati n'ifarini yasanze nta gihinduka mu bwiza bw'umugati

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza