00:00:00 IGIHE NETWORK KN KINYARWANDA EN ENGLISH FR FRANCAIS

​Olleh Rwanda Networks isakaza 4G LTE yahinduye izina​

Yanditswe na M. M.
Kuya 24 Nyakanga 2016 saa 11:47
Yasuwe :

​Ikigo gisakaza umuyoboro wa​ 4G LTE mu Rwanda, Olleh Rwanda Networks, cyahinduye izina gitangira kwitwa ’KT Rwanda Networks’ mu rwego rw’intego cyihaye zo gusakaza ibikorwa byacyo hirya no hino ku isi mu buryo buhuje umujyo.

Umuyobozi Mukuru wa KT Rwanda Networks Han-Sung Yoon aganira na TNT yatangaje ko bahisemo guhindura izina Olleh Rwanda Networks mu rwego rwo kugumana izina rimwe kandi rizwi mu bikorwa byabo hose ku isi. Ati "Naho ubundi nta kindi kintu na kimwe cyahindutse."

Yakomeje asobanura ati "Logo zacu zahindutse tariki 27 Kamena uyu mwaka. Dufite imishinga yo gusakaza ibikorwa byacu mu bindi bice bigize aka karere, bityo rero twatekereje ko byaba byiza tubikoze mu izina rimwe."

Olleh Rwanda Networks yahinduye izina yatangijwe mu mwaka wa 2013 mu bufatanye hagati ya leta na sosiyete y’itumanaho yigenga yo muri Koreya y’Epfo, KT Corporation, mu rwego rwo gusakaza mu Rwanda umuyoboro mu by’itumanaho ukoresha ikoranabuhanga rya 4G LTE, ibi bikiyongeraho ikoreshwa n’icungwa ry’umuyoboro wa Fiber Optic utabye hose mu gihugu, ndetse no gucuruza serivisi zirebana n’ibi byombi ku yandi masosiyete y’itumanaho akorera mu Rwanda.

Mu masezerano iyi sosiyete yagiranye na Leta y’u Rwanda harimo ko mu gihe cy’imyaka ine uhereye 2013 nibura 95% by’u Rwanda bizaba bigerwamo na internet inyaruka cyane y’umurongo mugari [broadband].

Leta y’u Rwanda ifite imigabane ingana na 49% muri KT Rwanda Networks, mu gihe KT Corporation iyifitemo 51%.

Mu gihe gishize KT Rwanda Networks yatangije ku mugaragaro K-Movie [www.orn.rw], urubuga rwa internet ruzajya rufasha abakoresha 4G kureba filime zo muri Koreya.

Korea Telecom iherutse guhindura izina ku rwego rw’isi yitwa KT Corporation, yashinzwe mu mwaka wa 1981, ni yo sosiyete nini kurenza izindi mu birebana n’itumanaho muri Koreya Y’Epfo. Ikorera mu bihugu birenga 5 ku isi, aho ifite abakozi barenga 30,000, ndetse n’imari shingiro irenga miliyari 20$.

Umuyobozi Mukuru wa KT Rwanda Networks Han-Sung Yoon
62% by'u Rwanda bigerwaho n'umuyoboro wa 4G LTE itangwa na KT Rwanda Networks

Ifoto: KT


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .