Mu gihe Umurenge SACCO Izigamire Kabacuzi wo mu karere ka Muhanga watahaga inyubako yawo ku wa 13 Ugushyingo 2012 wasabwe kunoza imikorere harimo no kongera umubare w’abanyamuryango.

Umucungamutungo wa SACCO Izigamire Kabacuzi, Habiyambere Nicodeme , yatangaje ko hari ikibazo cy’abanyamuryango bake bagana SACCO kuko ifite abahwanye na 20% by’abatuye Umurenge nyamara abona biterwa n’imyumvire mike y’abatuye uyu murenge w’icyaro, batari bakangukira kubitsa mu banki.

Celse, Umunyamabanga Nshingwabikorwa w’Akarere ka Muhanga yasabye SACCO kongera abanyamuryango bayo bakiri ku mubare muto, bakazamuka kuko nta kuvuga ko byibura abahatuye babitsa mu yandi mabanki, kandi hafi aho nta zindi banki zihagaragra.

SACCO Izigamire Kabacuzi itahwa ku mugaragaro

Kongera abanyamuryango bizafasha i gutanga inguzanyo ku bantu benshi, hakurikijwe uko Umurenge uteye, ngo ni ugukoresha uburyo bwo gushaka abanyamuryango ubasanga aho batuye.

Yandagiriye Pascal, umukozi mu kigo cy’igihugu gishinzwe amakoperative (RCA) yavuze ko ari ikibazo kuba iyi SACCO ifite abanyamuryango bake, nyamara nkuko biri mu nshingano zabo ngo bagiye gukora ibishoboka byose bagahugura abayobozi n’abakozi b’Imirenge SACCO hagamijwe guhangana n’iki kibazo, kuko ngo nta kuntu iyi SACCO yatanga inguzanyo igera kuri miliyoni 40 zonyine kandi isigaranye izirenga 150 zose yagombye gutangaho inguzanyo, SACCO a ikungukira ku nyungu .

Iyi SACCO ibimburiye izindi mu gutaha inyubako zayo muri ka karere ka Muhanga, kuyubaka byatwaye amafaranga y’ u Rwanda arenga gato miliyoni 21, buri munyamuryango akaba yarabizemo uruhare atangaga ibihumbi bitandatu.

Mbere y’uko yiyuzuriza inyubako yayo, SACCO Izigamire Kabacuzi yari imaze imyaka itatu icumbikiwe n’Umurenge, kuko yatangiye gukora ku itariki ya 28 Nyakanga 2009.