Ikigo cy’igihugu gishinzwe guteza imbere ubumenyi ngiro (WDA) cyahaye inkunga ya miliyoni zisaga 718 imishinga y’imyuga n’ubumenyi ngiro 20 yatoranyijwe muri 64 yemerewe kurushanwa.

Iyi nkunga yahawe ibigo ndetse n’amakoperative 20 byo mu turere 22 byigisha imyuga n’ubumenyi ngiro mu gihugu, nyuma y’ibindi 17 byahawe inkunga ya Miliyoni zisaga 590 mu mezi agera kuri ane ashize.

Jerome Gasana, umuyobozi mukuru wa WDA, yatangaje ko iyi gahunda yo gutanga inkunga ku bigo n’amakoperative byigisha cyane cyane urubyiruko mu gihugu ijyanye cyane na Gahunda ya kabiri ya leta y’imbaturabukungu (EDPRS 2) igamije gushakira urubyiruko umurimo.

Gasana yagize ati “Inkunga duhaye iyi mishinga ni iyo kubafasha kwigisha imyuga n’ubumyenyi ngiro ku banyarwanda cyane cyane urubyiruko, kugira ngo Leta ibashe kugera ku ntego yihaye yo guhangira imirimo abashomeri biganje mu rubyiruko.”

Jeanne d’Arc Baranyizigiye, wahawe inkunga akaba n’umuyobozi mukuru w’ikigo Benimpuhwe cyigisha imyuga abanyeshuri basaga 450 mu mujyi wa Kigali no mu Ntara y’Iburasirazuba yatangaje ko inkunga bahawe igiye kongera ingufu bari bafite mu gutoza abana bacikishije amashuri abanza n’ayisumbuye.

Agira ati “Umushinga twaherewe inkunga ndetse n’indi twari dusanzwe dufite igize ingufu, kuko igiye gukorwa neza hagendewe kuri miliyoni zisaga 30 z’amanyarwanda duhawe na WDA.”

Albert Nsengiyumva, umunyamabanga wa Leta muri Minisiteri y’uburezi ushinzwe amashuri y’imyuga n’ubumenyi ngiro ashishikariza abahawe inkunga gukora ibyo biyemeje mu mishinga no guha agaciro ibikorwa batangiye, kuko inkunga bahawe iturutse mu myenda Guverinoma y’u Rwanda yafashe.

Hamaze gutangwa Miliyoni zisaga ebyiri gusa muri miliyoni 30 z’amadolari y’Amerika, z’umwenda Leta y’u Rwanda yahawe na Banki y’isi kugira ngo hanozwe amasomo y’imyuga n’ubumenyi ngiro.

Nsegiyumva Albert akomeza ashishikariza ibigo ndetse n’amakoperative gukomeza kwiga indi mishinga yateza abanyarwanda imbere mu bucukuzi bw’amabuye y’agaciro, ikoranabuhanga n’amashanyarazi.