Ubutaka budahagije, ikibazo cy’ingutu ku iterambere rya Kigali n’imijyi iyunganira

Yanditswe na Evariste Nsengimana
Kuya 7 Gashyantare 2019 saa 11:15
Yasuwe :
0 0

Umuyobozi w’Umujyi wa Kigali, Rwakazina Marie Chantal, yagaragaje ko ubutaka budahagije ari kimwe mu bibazo by’ingutu bibangamira iterambere rya Kigali n’imijyi itandatu iwunganira ariko hari ingamba zigenda zifatwa.

Iterambere ry’umujyi rijyana no kwaguka, iterambere n’ubuzima by’abawutuye, gahunda zo kurengera ibidukikije, isuku iwurangwamo, uburyo bugezweho bwo gutwara abantu n’ibintu n’ibindi.

Mu kiganiro yatangiye mu nama mpuzamahanga ya gatatu yiga ku iterambere ry’imijyi, Rwakazina yagaragaje ko hari byinshi umujyi wa Kigali wakoze ariko hakiri n’ibindi bikeneye gukorwa ngo urusheho gutera imbere.

Yari inama y’iminsi ibiri ihuje impuguke muri urwo rwego zisaga 300, ziturutse mu bihugu bitandukanye.

Rwakazina yavuze ko nubwo hakomeza gukorwa byinshi ngo Kigali irusheho gutera imbere, haracyari imbogamizi uyu mujyi uhuriraho n’indi iwunganiro ziyibuza kugera ku iterambere ryifuzwa.

Imijyi yunganira Kigali ni Musanze, Nyagatare, Rubavu, Muhanga, Rusizi na Huye.

Rwakazina yavuze ko nubwo Kigali iri kuvugurura igishushanyo mbonera ku nshuro ya mbere mu myaka itanu, iyunganira ari ubwa mbere, ibintu agaragaza nk’imbogamizi ku iterambere ryayo.

Gusa ngo imbogamizi ikomeye kurusha izindi ni uko Leta ifite ubutaka budahagije bwo kwimuriraho abaturage mu gace igiye gushyira ibikorwa remezo bijyanye n’igishushanyo mbonera, nka kimwe mu bishingirwaho ku iterambere ry’umujyi.

Ati “Mu bibazo turi guhura nabyo, harimo iby’amacumbi aciriritse. Mu Mujyi wa Kigali, ntituranagera ku 10% by’ayo dukeneye. Ikindi ni ukuyibonera ibikorwa remezo bikenewe, cyane cyane imihanda.”

Igishushanyo mbonera kigaragaza ko imijyi yunganira Kigali igomba kuba irimo ibikorwa remezo nk’imihanda, amazi, amashanyarazi bihagije, uburyo bwo gutunganya imyanda, gufata amazi n’ibindi kandi igakorerwamo imishinga iteza imbere abaturage.

Rwakazina yasobanuye ko umujyi ayobora ukoresha nibura 80% by’ingengo y’imari mu kubaka ibikorwa remezo, andi agatangwa n’abandi bafatanyabikorwa.

Impamvu zituma ibikorwa remezo bihenda mu mijyi, ngo harimo amafaranga y’ingurane yishyurwa abafite ibikorwa n’imiterere y’ibikorwa ahagiye gushyirwa ibikorwa remezo bijyanye n’iterambere ry’umujyi.

Ati “Ubutaka muri rusange ni buto ku Mujyi wa Kigali kimwe n’iwunganira, tugomba kubukoresha neza ni nayo mpamvu hajyaho igishushanyo mbonera kugira ngo uburyo dutura n’uko dushyiraho ibikorwa remezo bibe bifite gahunda.”

Rwakazina yavuze ko mu gukemura ikibazo cy’ibiciro by’ubutaka biba bihanitse mu gihe cyo gushyiraho ibikorwa remezo no kubaka amacumbi aciriritse, Umujyi ayobora washyizeho gahunda yo kugura ubutaka ikabubika.

Ubwo butaka nibwo ngo buzajya bwubakwaho amacumbi aciritse ashobora kwimurirwamo abaturage bimuwe ahagiye gushyirwa ibikorwa remezo no guhangana n’ibibazo bibangamira iterambere ry’umujyi.

Minisitiri w’Ibikorwa remezo, Amb. Gatete Claver, yavuze ko icyiciro cya mbere cyo guteza imbere imijyi yunganira Kigali, cyashowemo miliyoni 95$ kandi ko cyarangiye.

Umuyobzi w’ishami ry’Umuryango w’Abibumbye ryita ku miturire, Maimunah Sharif, yashimye intambwe u Rwanda rumaze gutera mu guteza imbere imijjyi rufite.

Minisiteri y’Ibikorwa remezo igaragaza ko mu 2017, iterambere ry’imijyi mu Rwanda ryari ku kigero cya 18,4%, intego ikaba kugera kuri 35% mu 2024.

Ubutaka budahagije, mu bibazo by’ingutu ku iterambere rya Kigali n’imijyi iyunganira
Icyiciro cya mbere cyo guteza imbere imijyi yunganira Kigali cyararangiye
Minisitiri Gatete yavuze ko nta terambere ryagerwaho urubyiruko rutabigizemo uruhare
Umuyobozi w’Umujyi wa Kigali, Rwakazina Marie Chantal, yagaragaje ko ubutaka budahagije ari kimwe mu bibazo by’ingutu bibangamira iterambere rya Kigali n’imijyi itandatu iwunganira

Inkuru bifitanye isano: Imijyi itandatu yunganira Kigali igiye guhabwa imiyoborere yihariye


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza