00:00:00 IGIHE NETWORK KN KINYARWANDA EN ENGLISH FR FRANCAIS

Uburyo Ikirumugabo yiteje imbere abikesha ubuhinzi bw’ibinyomoro

Yanditswe na Hakizimana Jean Paul
Kuya 20 Nyakanga 2020 saa 08:27
Yasuwe :
0 0

Ikirumugabo Hildebrand ni umusore w’imyaka 30 utuye mu Kagari ka Cyabararika mu Murenge wa Muhoza mu Karere ka Musanze, amaze imyaka irindwi ahinga ibinyomoro aho byamufashije kwiteza imbere agura ibibanza ndetse anagura umushinga we.

Yavuze ko yatangiye guhinga ibinyomoro mu 2013 ahinga ibiti 250 kuri metero kare 300 abishoramo ibihumbi 420 Frw, ibi biti ngo yabisaruragaho ibiro birenga 180 by’ibinyomoro, buri kiro akakigurisha 800 Frw, yaje gukuramo miliyoni imwe n’ibihumbi 200 Frw bimutera umuhate wo gukomeza kubihinga no kubyagura.

Ubwo yaganiraga na IGIHE yagize ati “ Mu 2015 narongeye mpinga ibindi ndanazamuka mpinga ibiti 1000, mbona harimo kuzamo amafaranga nibyo kujya gusaba akazi ndabireka mpita nikomereza ubuhinzi, 2016 nahinze ibiti 2000 mbona nabwo biri kugenda neza cyane amafaranga yo kwikenura nkayabona ndetse nkanarengaho nkanakora n’ibindi bintu binteza imbere.”

Ikirumugabo yavuze ko mu mwaka wa 2019 yongereye ibiti by’ibinyomoro yahingaga ava ku biti 2000 ahita abikuba kabiri ahinga ibiti 4000 ku buso bungana na hegitari imwe n’igice nyuma yo guhabwa inkunga ya miliyoni eshatu.

Ati “ Maze kumva ko umushinga PRICE utera inkunga, narawegereye untera inkunga ya miliyoni eshatu ari nayo nakoresheje nagura umushinga wanjye iyo nkunga n’ubu niyo nkikoresha mu gutera umuti, urabona hano ntabwo twegereye amazi nshyiraho abakozi bakayavoma nkabishyura, nkanatera umuti neza kuburyo ibinyomoro byanjye bizera ari byiza.”

PRICE ni umushinga watangiye muri 2012 ugamije guteza imbere abahinzi ba kawa, icyayi, imboga n’imbuto n’ibindi, ukaba uterwa inkunga na IFAD ugakorera mu kigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi NAEB.Kuri ubu umaze gutera inkunga abahinzi 959 ukaba warabahaye inkunga ya miliyari 2.6 z’amafaranga y’u Rwanda

Ikirumugabo yavuze ko mu biti 4000 yahinze yitezemo gusarura nibura miliyoni 20 z’amafaranga y’u Rwanda zirimo inyungu ya miliyoni 12 Frw.

Isoko ntabwo rigihagaze neza kubera Coronavirus

Ikirumugabo yavuze ko kuri ubu isoko ridahagaze neza ugereranyije na mbere kubera icyorezo cya Coronavirus, yavuze ko hari amahoteli yagemuriraga ibinyomoro mbere ariko kuri ubu akaba atakibiha kubera ko abakiriya bazo bagabanutse cyane.

Ati “ Habaye ihungabana kubijyanye n’isoko ntabwo bihagaze neza ariko ni ibintu rusange ku isi yose, gusa ndizera ko bitazanca integer kuko no muri guma mu rugo imishinga y’ubuhinzi yarakomeje irakora ndumva ntazahomba, ikindi hari nk’umuturage wabaga yagiye gutera ikiraka mu mujyi akabona ibirayi akumva yanarya ikinyomoro cyangwa akagiha umwana we ariko nyuma yuko hari imirimo yafunzwe bisa n’ibyahagaze.”

Ikirumugabo yagiriye inama urubyiruko yo gukora ubuhinzi kuko burimo amahirwe menshi yatuma rukira

Yavuze ko kuri ubu abakiriya be bakuru harimo ku isoko ryo kwa Mutangana Nyabugogo aho ahagemura toni imwe muri cyumweru iyo byeze ndetse akanagemura mu isoko rya Musanze ibiro 400 kucyumweru.

Ati “ Ubu nsigaye nanafata n’ibindi binyomoro by’abaturage iyo ibyanjye bitarera nabyo nkabicuruza kuburyo abakiriya banjye batajya bamburana ibinyomoro.”

Ikirumugabo yavuze ko kuri ubu amaze kwigurira ibibanza bibiri bimuhagaze nka miliyoni esheshatu, ishyamba rimuhagaze miliyoni 2.5 Frw ndetse n’indi mishinga itandukanye yagiye akura muri ubu buhinzi bw’ibinyomoro.

Inama ku rubyiruko rukerensa ubuhinzi

Ikirumugabo yagiriye inama urubyiruko yo gukura amaboko mu mufuka bagakora ubuhinzi ngo kuko harimo amahirwe menshi yo gutera imbere n’abarufasha benshi kuburyo bitagoranye.

Ati “ Nibakure amaboko mu mifuka bakore, bo gutsimbarara kugushaka akazi ahubwo bihangire imirimo cyane cyane iy’ubuhinzi n’ubworozi, bisaba igishoro gito. Inguzanyo yo mu buhinzi ntabwo bakwishyuza inyungu nyinshi, ikindi na leta nayo irabishyigikiye cyane, amasoko nayo ntabwo ari ngombwa ko uyirukaho arakwizanira.”

Kuri ubu Ikirumugabe akoresha abakozi 20 bahoraho mu gihe mbere y’icyorezo cya Coronavirus yakoreshaga abakozi 40. Nibura buri mukozi ngo amuhemba 1200 Frw ku munsi, afite kandi abakozi barindwi bahoraho bamufasha mu kurinda ibinyomoro bye yishyura buri kwezi ibihumbi 30 Frw, we akibarira ibihumbi 500 Frw nk’umushahara w’ukwezi.

Ikirumugabo avuga ko kuri ubu ateganya gusarura miliyoni 20 harimo inyungu ya miliyoni 12 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .