00:00:00 IGIHE NETWORK KN KINYARWANDA EN ENGLISH FR FRANCAIS

Uburyo gushirika ubwoba agacuruza imbaho byafashije Nikuze gushinga quincaillerie

Yanditswe na Hakizimana Jean Paul
Kuya 29 March 2022 saa 08:28
Yasuwe :

Nikuze Anne Marie ni umugore ufite imyaka 39 y’amavuko aho akorera mu gakiriro gaherereye mu Mujyi wa Nyagatare mu bijyanye no gucuruza imbaho, inzugi, intebe n’ibindi bizikomokaho, uyu mwuga akaba awumazemo imyaka irenga 12.

Iyo uganiriye na Nikuze akubwira ko gutinyuka no gushirika ubwoba ugakora ibikurimo ngo nicyo gishoro cya mbere kiruta ibindi. Niko byamugendekeye ubwo yinjiraga mu mwuga wo gucuruza imbaho mu 2009.

Icyo gihe ngo yatangiranye ibihumbi 600 Frw agura imodoka yuzuye imbaho yiyemeza guhatana n’abandi bagabo banamurushaga amafaranga bazicuruzaga.

Ati “Nyuma y’umwaka umwe maze gutinyuka ibintu byatangiye kugenda neza ngura imashini isatura imbaho, nyuma y’undi mwaka ngura imashini iranda ikanoza imbaho ikanazitobora. Nakomeje gukora kuko ari ibintu nakundaga, hashize igihe mbona ko mu gakiriro kacu abenshi bakunze kubura ibikoresho bifashisha mu bubaji.”

Yakomeje avuga ko yahise atangira kujya anacuruza udusumari bakeneraga umunsi ku munsi, azana n’utundi dukoresho duto duto tutadehenze biza kugera akora quincaillerie kuri ubu imaze kugeramo ibikoresho byinshi bitandukanye.

Nikuze avuga ko ikintu cya mbere cyamufashije ari ukwitinyuka no kugira umugabo wamwumvishe akemera kumushyigikira yaba mu kwaka inguzanyo muri banki no kumureka agakora ibyo we yumvaga bimurimo.

Mu mbogamizi umugore ucuruza imbaho ahura nazo avuga ko ari izisanzwe zo gutenguhwa n’umuntu wari wizeye wamuha ibikoresho ngo akakwambura.

Nikuze yavuze ko gucuruza imbaho byatumye abasha kugura ubutaka bwo kororeraho bungana na hegitari eshanu aho kuri ubu harimo n’inka icumi nazo zavuye muri izi mbaho.

Yavuze ko kandi kuri ubu imari shingiro ye yazamutse cyane kuburyo abaze umutungo akoresha mu kazi kuri ubu wikubye inshuro nyinshi.

Mu ntego afite kuri ubu harimo kugura imashini nyinshi zikenerwa n’ababaji bo mu gakiriro ka Nyagatare. Arifuza kandi kuzashinga ibindi bikorwa bijyanye no gucuruza imbaho mu tundi turere ngo ku buryo ari umwuga wumva wazamugeza kuri byinshi yifuza kugeraho.

Nikuze yagiriye inama abagore kwiyumvamo ko bashoboye bagatekereza kure kandi ibyo biyumvamo gukora bakabiha umwanya ngo nibwo bishobora kugenda neza kuko uba ukora ibyo ukunze.

Ati “ Abagore turashoboye, uwitinya niyumve ko icya mbere ari ibitekerezo yumve ko yanabishyira mu bikorwa, ashake abamubanjirije mu byo yatekereje bamufashe. Ikindi nta gishoro kiba gito buri kintu cyose utangirira hasi ukagenda ukura gahoro gahoro ikindi bamenye ko kugana banki bishobora kugufasha kwagura ibyo ukora.”

Kuri ubu Nikuze yagiriwe icyizere cyo kuba umwe mu bahagarariye abagore ku rwego rw’Intara y’Iburasirazuba nyuma yo kubona umuhate akoresha mu kazi ke kugira ngo anabere urugero rwiza abandi.

Nikuze Anne Marie yavuze ko abagore bakwiriye kwitinyuka kuko ubushobozi bwo babufite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .