Abaturage b’Intara ya Mwanza muri Tanzania bakoresha indege mu ngendo zabo za buri gihe bishimiye bikomeye Rwandair yatangije ingendo muri ako gace, bemeza ko imikorere ntagereranywa bayiziho igiye kubahindurira amateka.

Byasaga nk’inzozi mu buzima bwabo kubona sosiyete ifite indege nshya, yubahiriza amasaha, itanga serivisi nziza ndetse ikagira imikorere izira amakemwa, biza guhinduka impamo ubwo Rwandair, sosiyete nyarwanda itanga serivisi z’ingendo zo mu kirere yakoraga urugendo rwa mbere ihagurutse i Kigali yerekeza Mwanza muri Tanzania.

Kuri uyu wa Gatandatu tariki ya 1 Ugushyingo 2014 saa tatu zuzuye nibwo indege ya Rwandair yo mu bwoko bwa Bombardier ifite nimero 470 yahagurutse ku Kibuga cy’Indege Mpuzamahanga cya Kigali yerekeza i Mwanza muri Tanzania, urugendo yakoresheje iminota 35 yuzuye.

Ubwo indege ya Rwandair yiteguraga guhaguruka yerekeza i Mwanza

Bamwe mu bakoresha ingendo zo mu kirere batuye muri aka gace gaherereye mu Majyaruguru y’Uburengerazuba bwa Tanzania bakibona indege ya Rwandair ikandagiye ku butaka bwabo biruhukije, bavuga ko bagiye kuruhuka imikorere ya zimwe muri sosiyete zikora nabi, harimo n’iz’igihugu cyabo bagaya ku mugaragaro imikorere idahwitse.

Christopher Mwita Gachuma, umushoramari akaba n’ umuherwe uzwi cyane muri Mwanza, yemeje ko Rwandair igiye guhindura amateka y’ingendo mu gace batuyemo, kuko bari baramenyereye imikorere mibi ya sosiyete zisanzwe zibatwara, ikintu ngo bari barakiriye nk’indwara ya twibanire.

Nyuma yo kwitegereza iyo ndege ya Rwandair yari ihagaze ku Kibuga cy’Indege cya Mwanza giherereye mu Karere ka Ilemela, agatangazwa n’ukuntu ari nshya, yabwiye abanyamakuru ko nta kabuza ko baruhutse kuko ngo uburyo azi Rwandair bimwereka ko amateka yabo ahindutse.

“Rwandair ifite indege nshya kandi ikorera ku masaha, igira gahunda, nta kabuza ibintu byahindutse”.

Ubusanzwe ngo mu gihe yashakaga kujya i Kampala muri Uganda ngo yabanzaga gufata indege imuvana Mwanza ikamunyuza Dar es Salam, ariko ubu ngo azajya ahana gahunda n’umuntu mu minota mike abe amugezeho, kuko azajya anyura i Kigali, abifashijwemo na Rwandair.

Christopher Gachuma yagereranije Rwandair na sosiyete zikomeye z’i Burayi, aho yemeje ko uburyo iyi sosiyete imaze imyaka mike ariko ikaba itinyuka kugura indege nshya ari ibintu by’indashyikirwa, ati “hakuna mchezo na Wanyarwanda” tugenekereje mu Kinyarwanda bivuga ngo “nta mikino Abanyarwanda bagira”.

Nkusi Mukubu Gerard, Umuyobozi ushinzwe ubuvugizi n’ ubucuruzi mu Rugaga rw’Abikorera mu Rwanda (PSF) yavuze ko uru rugendo rushya Rwandair itangiye ruzahindura byinshi kandi rukazamura ubukungu bw’igihugu kuko igihe ari kimwe mu bishobora gutuma ubukungu buzamuka cyangwa bukagwa burundu.

Mukubu yasobanuye ko abagenzi bashakaga kujya Mwanza mbere babanzaga kunyura i Kampala baturutse i Kigali, bakabona gufata indege iberekezayo; ngo byabatwaraga amasaha agera ku munani ndetse n’amadorali y’Amerika agera muri 500. Ubu ngo bizajya bifata iminota 35 gusa ndetse itike ihwane n’amadorali y’Abanyamerika atagera kuri 300.

Kuva uyu munsi tariki ya 1 Ugushyingo, Rwandair izajya ikora ingendo Mwanza – Kigali, Kigali – Mwanza inshuro 3 mu cyumweru; Mwanza ibaye ahantu ha 17 iyi sosiyete igiye kujya yerekeza, ndetse mu minsi itarambiranye hakaba hari gahunda yo gukora izindi ngendo mu bihugu by’Aziya ndetse n’u Burayi.

Abagenzi ba mbere berekeje i Mwanza muri Rwandair

Imbere mu ndege za Rwandair habereye ijisho

Ngiyo Rwandair irogoga ikirere cy'u Rwanda

Rwandair ikigerayo yakiranywe ibyishimo, aha yamenwagaho amazi

Abagenzi ba Rwandair bakigera i Mwanza

Christopher Gachuma yishimiye bikomeye ingendo za Rwandair i Mwanza

Gobena Mikael ushinzwe ubucuruzi muri Rwandair yavuze ko iyi sosiyete iri kwaguka byihuse

Nkusi Mukugu Gerard wa PSF nawe yaherekeje Rwandair i Mwanza

Itorero Indangamirwa ni ryo ryasusurukije ibirori byo kwakira Rwandair i Mwanza