Ingo ibihumbi 22 mu Burasirazuba zahawe amashanyarazi mu myaka ibiri zirishimira iterambere yazigejejeho

Yanditswe na Evariste Nsengimana
Kuya 11 Werurwe 2020 saa 09:00
Yasuwe :
0 0

Akanyamuneza ni kose ku miryango isaga ibihumbi 22 yo mu turere twa Rwamagana, Kayonza, Ngoma na Kirehe yahawe amashanyarazi mu myaka hafi ibiri ishize bayahawe, akayifasha kwiteza iterambere binyuze mu guhanga ibikorwa bibyara inyungu.

Sosiyete y’u Rwanda ishinzwe Ingufu (REG) igaragaza ko yahaye amashanyarazi aba baturage binyuze mu mushinga uterwa inkunga n’u Bubiligi watangijwe mu mwaka wa 2014, ukaba umaze kuyageza ku ngo 22,387 mu Ntara y’Uburasirazuba ndetse biteganijwe ko uyu mwaka wa 2020 uzarangira izindi zirenga 5,400 ziyahawe.

Uretse gutanga amashanyarazi ku batuye muri izo ngo, uyu mushinga urimo no kuvugurura umuyoboro w’amashanyarazi ungana na kilometero zisaga 280 mu Ntara y’Uburasirazuba, wongererwa ingufu ukavanwa ku rwego rwa ‘Monophasé’ cyangwa single phase ushyirwa ku rwa triphasé cyangwa three phase.

Bamwe mu baturage batuye mu Karere ka Rwamagana, bavuze ko mbere bari babayeho mu buzima bugoye kuko abenshi bakoraga urugendo rurerure bajya gushaka serivisi zikoreshwa n’ingufu z’amashanyarazi.

Uwitwa Sarabwe Isaac, utuye mu Kagari ka Nyarubuye mu Murenge wa Munyiginya, usanzwe akora ubucuruzi mu gasantere ka Nyarubuye yavuze ko umuriro utaraza atabonaga inyungu ihagije mu bucuruzi bwe.

Ati “Kuva tubonye amashayarazi twagize amahirwe, mbere twacanaga mazutu cyangwa tugakoresha buji, bigatuma dutanga amafaranga menshi ku mwaka kandi kubera n’imyotsi tukarwara n’indwara z’ubuhumekero. Aho umuriro uziye rero twagize amahirwe, ubu dukora na nijoro tukagira n’abakiriya benshi kandi nta n’abajura bakitwikira ijoro ngo batwibe.”

Akomeza avuga ko mu bucuruzi bwe yungutse kurushaho akabasha kuvugurura inzu ye ubu ikaba iriho inzugi z’ibyuma (métallique).

Mugenzi we witwa Nzabonimana Augustin ukoresha icyuma gisya yavuze ko yabonye aka kazi kubera amashanyarazi.

Ati “Nabonye akazi ari uko amashanyarazi aje. Ubu ndakora nkabasha gukodesha inzu nkabona n’ibintunga njye n’umuryango wanjye.”

Nzabonimana Augustin ukoresha icyuma gisya yavuze ko yabonye aka kazi kubera amashanyarazi

Umunyamabanga Nshingwabikorwa w’Akagari ka Nyarubuye, Uwamahoro Delphine, yavuze ko amashanyarazi yazanye impinduka nyinshi mu baturage ayobora.

Ati “Mvugiye nk’aha mu biro, murabona turacana, abarara izamu n’irondo ry’umwuga nta kibazo bagira babasha kubona hose. Ikindi kandi iyo twakeneraga gukoresha mudasobwa byaratugoraga ariko ubu turazikoresha tukabasha gutanga serivisi byihuse nko gufasha abaturage kwinjiza abana bavutse muri sisiteme y’Ubudehe, kwandukuza abapfuye, n’ibindi bitandukanye.”

Uyu muyobozi avuga ko ibyo byose mbere byasabaga kubikorera ku Biro by’Umurenge, bakabanza gufata umwanya wo gukusanya abasaba kubikorerwa, bamara kuba benshi akabona kujya kubakorera, ugasanga birakerereza abasabye serivisi.

Uwamahoro avuga ko amashanyarazi yafunguye amarembo bituma abaturage ayobora bahanga akazi gashya.

Ati “Gusudira byakorerwaga kwa Karangara, harimo intera y’ibirometero hafi umunani kugira ngo uve inaha ugereyo. Urumva ko byatumaga abantu batakaza amafaranga bajyayo banagaruka. Dufite n’abashoramari baje kubera umuriro.”

Umucungamutungo w’Urwunge rw’Amashuri rw’Abadivantisite b’umunsi wa Karindi rwa Nyarubuye, riherereye mu Murenge wa Munyiginya, Muhiyumva Jean Marie, yavuze ko amashanyarazi yabafashije cyane mu kazi kabo ka buri munsi.

Ati “Kuva twabona umuriro hahindutse ibintu byinshi bitandukanye mu kazi kacu ka buri munsi. Icya mbere byihutishije akazi, mu gutanga amaraporo mu nzego zo hejuru ubu byaroroshye, kubona internet biroroha, no mu myigire y’abana biratworohereza kubategurira ibizamini no kubisohora mu mashini (printing). Impinduka nyinshi zo zaragaragaye.”

Muhiyumva yasobanuye ko buri mwarimu ashobora gukoresha mudasobwa n’abana bakaboneraho kwiga ikoranabuhanga mu buryo buboroheye.

Si ibyo gusa kuko n’abasengera mu nsengero zirimo urw’Itorero ry’Abadivantisite babasha guhimbaza Imana bisanzuye, kuko bakoresha ibyuma by’umuziki batagombye gucana moteri ikenera Lisansi ihenze.

Umuyobozi w’Ikigo Nderabuzima cya Munyiginya mu Karere ka Rwamagana, Ezechiel Ndabarinze, yavuze ko kuva babona amashanyarazi babashije gutanga serivisi nyinshi ndetse akazi karushaho kuborohera.

Ati “Iyo bwabaga bwije umuganga agomba gufasha umurwayi, yagombaga kwifashisha itoroshi. Ubu nijoro dutanga serivisi habona, umuforomo yakenera igikoresho akakibona vuba, agafata umutsi w’umurwayi ahantu habona bitamubangamiye, ndetse n’umurwayi nawe iyo agiye kwivuriza ahantu abona hari amashanyarazi aba yumva atekanye.”

Uyu muyobozi avuga ko hari imiti n’inkingo ziba zigomba kubikwa mu byumva bikonjesha ngo zitangirika ku buryo uyu munsi amashanyarazi yaborohereje kubikonjesha.

Avuga ko batarabona amashanyarazi, buri mugoroba bagombaga kujya kubibitsa ku bindi bigo nderabuzima bifite amashanyarazi bagasubira kubifata mu gitondo.

Ati “Urumva ko habaga harimo gutakaza igihe n’amafaranga. Ubu rero twungutse igihe, twunguka n’amafaranga twatakazaga. Mbese ni iterambere.”

REG ivuga ko ubu abafatabuguzi bamaze kubona amashanyarazi yo ku muyoboro mugari basaga miliyoni imwe (38.5%), mu gihe habarurwa n’abandi babarirwa mu bihumbi 400 (14.3%) bakoresha amashanyarazi adakomoka ku muyoboro mugari.

Sarabwe yavuze ko umuriro utaraza atabonaga inyungu ihagije mu bucuruzi bwe
Abaturage babasha gukoresha mudasobwa nta nkomyi
Umunyamabanga Nshingwabikorwa w’Akagari ka Nyarubuye, Uwamahoro Delphine, yavuze ko amashanyarazi yazanye impinduka nyinshi mu baturage ayobora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .