Gucapisha inoti nshya za 5000 n’iza 2000 byatwaye u Rwanda asaga miliyari

Yanditswe na

Twizeyimana Fabrice

Kuya 16 Werurwe 2015 saa 06:35
Yasuwe :
0 0

Sosiyete ya Minisiteri y’Imari mu Burusiya yitwa Goznak ni yo yatsindiye isoko ryo gucapa inoti nshya z’amafaranga y’u Rwanda 2000 na 5000, yishyurwa miliyoni n’ibihumbi 900 z’amadolari ya Amerika kugira ngo aya mafaranga akorwe asimbure ayari ashaje ku isoko.

Aya mafaranga ahwanye na miliyari imwe na miliyoni 330 z’amafaranga y’u Rwanda Goznak yaciye Leta y’u Rwanda,ni yo yari make ugereranije n’ayo andi masosiyete yapiganirwaga iri soko yacaga nk’uko Banki Nkuru y’u Rwanda ibisobanura.

Mu nkuru yanditswe n’ikinyamakuru The New Times ku wa 03 Ukuboza 2014, yagaragaraje ko hari amasosiyete umunani yapiganiwe isoko ryo gukora inoti nshya z’amafaranga y’u Rwanda za 2000 na 5000.

Izo Sosiyete zari: Papierow Wartosciowych yo muri Pologne, Oberthur Fudiciare yo mu Bufaransa, Joh. Enschede yo mu Buholandi, Crane Currency yo muri Suwede, Casa De Moneda de Chile yo muri Chili, Giesecke & Devrient yo mu Budage, De La Rue yo mu Bwongereza na Goznak yo mu Burusiya, ari na yo yatsindiye isoko.

Nk’uko iki kinyamakuru cyakomeje kibivuga, icyo gihe byari biteganyiwje ko hacapwa kopi miliyoni 10 z’inoti nshya za 5000 na kopi miliyoni 25 z’inoti nshya z’amafaranga 2000.

Guverineri wa Banki Nkuru y'Igihugu, John Rwangombwa

Inoti zihindurirwa iki? Zihindurwa na nde? Izishaje zijya he?

Mu kiganiro kirambuye Guverineri wa Banki Nkuru y’igihugu John Rwangombwa aherutse kugirana n’abanyeshuri bo muri Kaminuza ya INES-Ruhengeri, yabamaze amatsiko ku bibazo byose bibazaga bijyanye na politiki y’ifaranga mu Rwanda, birimo n’impamvu y’ihindurwa ry’amafaranga, uyakora ndetse n’ikiguzi bitwara Leta.

Guverineri Rwangombwa yasobanuye ko uko amafaranga akoreshwa agenda asaza yagera ku gipimo cy’ubusaze cyemejwe agakurwa ku isoko agasimbuzwa amashya.

Yabisobanuye agira ati “Mu kazi dukora nka Banki nkuru ni twe dushinzwe gutanga amafaranga dukoresha umunsi ku munsi, inoti za banki iyo tuzitanze zigenda zikoreshwa zikagenda zisaza, inoti ishaje igaruka muri banki…abanyamabanki iyo babonye inoti ishaje barayidusubiza, natwe dufite igipimo cy’inoti twemera ko isubira ku isoko, iyo tubonye ishaje birenze cya gipimo twihaye tuyikura mu ziri ku isoko tukayitwika.”

Yakomeje agira ati “Uko tugenda dukuramo izishaje rero tukazitwika ni ko amafaranga ari ku isoko agabanuka, niba mwarabibonye mbere y’uko aya mafaranga aza iya 5000 na 2000, kubona inoti ya 5000 byari bitangiye kugorana wajya muri banki akenshi bakaguha inoti za 2000 n’iza 1000 kandi abantu bari bashaka gukoresha inoti za 5000, uko rero inoti zigenda zishira ku isoko biba ngombwa ko tuzana izindi nshya tukazongeramo.”

Gucapisha inoti bihenda Leta

Gucapisha inoti bihenda leta…

Guverineri wa Banki Nkuru y’igihugu avuga ko gukoresha amafaranga mashya bihenda Leta, na cyane ko akorerwa mu mahanga kuko mu Rwanda nta sosiyete iragira ubushobozi bwo kuzikora.

Nk’inoti nshya za 2000 na 5000 zakorewe mu Burusiya na Sosiyete ya Minisiteri y’Imari n’Igenamigambi yaho yitwa Goznak, ica leta y’u Rwanda amafaranga asaga miliyari ubariye mu manyarwanda.

Guverineri John Rwangombwa yasobanuye agaciro k’izi noti ati “Byose hamwe uko ari inoti za 2000 n’iza 5000 twatanze miliyoni n’ibihmbi 900 y’amadolari y’amanyamerika kugira ngo tuzikoreshe, urumva ko ari ibintu bihenze, kugura ziriya noti birahenze… tuzigura hanze kuko hano nta bushobozi dufite bwo kuzikorera.”

Abaturage basabwa kubungabunga inoti…

Guverineri wa Banki Nkuru agira inama abaturage yo kwitabira uburyo bw’ikoranabuhanga mu gukoresha no guhererekanya amafaranga (Electronic Payment), kuko uretse kuba burinda umutekano w’amafaranga, bukanagabanya isaza rya hato na hato ry’amafaranga ahenda leta kuyacapisha.

Ati “[…..]Ikindi noneho ni ukugabanya ya mafaranga dutanga tujya gucapisha inoti hanze, nk’uko wabyumvise 1,900,000 (USD) ni amafaranga y’igihugu tuba twatanze tugura ziriya noti, uko tugabanya rero ikoreshwa ryayo ntabwo asaza vuba nicyo kiguzi tukijyana mu bindi aho kugira ngo tugihe abanyamahanga baducapira ya mafaranga dukoresha hano.”

Inama y’Abaminisitiri yo kuwa 12 Ugushyingo 2014 niyo yemeje Iteka rya Perezida rishyiraho inoti nshya y’ibihumbi bibiri by’amafaranga y’u Rwanda (2000FRW) n’iy’ibihumbi bitanu by’amafaranga y’u Rwanda (5000FRW) zifite agaciro mu Rwanda.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza