Ikigo cy’Igihugu cy’Ubwiteganyirize kiratangaza ko ibyasohotse mu bitangazamakuru ko gifitanye ikibazo gikomeye na Sosiyete Thomas & Piron GL, ibyo byatangaje nta kuri kurimo kuko kitigeze cyanga kwishyura uwubatse Grand Pension Plaza.

RSSB iratangaza ko yagiranye amasezerano na Sosiyete Thomas & Piron GL yo kubaka umuturirwa wa Grand Pension Plaza ku mafaranga ahwanye na Miliyari 17.3 bityo ngo kugeza uyu munsi, iyi nyubako ikaba yararangiye, amafaranga angana na 97% byayo akaba yarishyuwe sosiyete Thomas & Piron GL ahwanye na miliyari 16.8; andi asigaye akaba agomba guhabwa iyi sosiyete imaze gutunganya utuntu duke dusigaye kandi hamaze gukorwa igenzurwa rya nyuma n’inzobere hatanzwe na raporo ya nyuma nk’uko impande zombi zabyumvikanyeho.

Ikibazo gihari ni aho sosiyete Thomas & Piron GL yatanze impapuro zishyuza amafaranga ya nyuma angana na Miliyari 6.9 adafite aho ahuriye n’ari mu masezerano bagiranye. Ayo mafaranga akaba arenga 33% by’amasezerano ari hagati y’impande zombi.

Mu igenzura ryakozwe habaye kudahuza imibare kuko Sosiyete Thomas & Piron GL yagaragaje ko inyubako yuzuye itwaye amafaranga angana na Miliyari 23 mu gihe uwakurikiranaga umushinga w’inyubako, Triades, we agaragaza ko Thomas & Piron GL yahabwa miliyari 21, na ho RSSB yo igasanga igomba gutanga miliyari 19.5. Bityo rero ubuyobozi bwa RSSB bukaba bwarifuje kubona igiciro cya nyuma nyakuri cy’amafaranga igomba kwishyura.

Uko kutumvikana byatumye ku itariki ya 18 Ukwakira uyu mwaka, haba inama yahuje Umuyobozi mukuru wa sosiyete Thomas & Piron GL Coralie PIRON, Ambasaderi w’u Bubiligi mu Rwanda Marc PECSTEEN, Umuyobozi Mukuru wa RSSB Angelique KANTENGWA n’Umunyamabanga Uhoraho muri Minisiteri y’Imari n’Igenamigambi Kampeta SAYINZOGA, mu rwego rwo kwiga kuri iki kibazo.

Muri iyo nama impande zombi zemeranyije ko hashakwa inzobere izakora igenzura igatanga raporo ku giciro cya nyuma cy’iyo nyubako bityo iki kibazo cyikava mu nzira. Ku itariki ya 23 Ukwakira 2012 Umunyamabanga Uhoraho muri MINECOFIN yandikitye impande zombie abamenyesha imyanzuro y’inama ndetse inasaba RSSB kwihutisha gushakisha inzobere igomba gukora igenzura ku nyubako.

RSSB iratangaza ko habonetse inzobere izwi ku rwego mpuzamahanga igenzura rikaba ryaratangiye kandi ko Thomas & Piron GL bemerewe gukorana na bo umunsi ku wundi kugira ngo imirimo yihute. Nyuma yo kumvikana kuri raporo izaba yatanzwe, Thomas & Piron GL na yo ikaba yamaze gukosora ahaba hari udukosa hose RSSB yiteguye guhita yishyura nta yandi mananiza.