Tour du Rwanda 2020: Cogebanque izasangiza abakunzi b’amagare ibyihariye kuri serivisi z’imari

Yanditswe na Ishimwe Israel
Kuya 21 Gashyantare 2020 saa 01:01
Yasuwe :
0 0

Amasaha arabarirwa ku ntoki ngo hatangire isiganwa ngarukamwaka ry’amagare rizenguruka igihugu “Tour du Rwanda” rigiye kuba ku nshuro ya 12 kuva ribaye mpuzamahanga.

Tour du Rwanda igiye kuba ku nshuro ya kabiri kuva izamuriwe urwego igashyirwa kuri 2.1 mu 2019; iteganyijwe ku wa 23 Gashyantare kugeza ku wa 1 Werurwe 2020.

Amakipe 16 arimo atatu ahagarariye u Rwanda ni yo azitabira iri rushanwa rizanyura mu bice bitandukanye by’igihugu ku ntera y’ibilometero 889.0 mu minsi umunani.

Mu bafatanyabikorwa bazaherekeza iri rushanwa harimo na Banki Nyarwanda y’Ubucuruzi ya Cogebanque, imaze imyaka irenga 20 itanga serivisi z’imari.

Cogebanque imaze imyaka umunani yinjiye mu gutera inkunga umukino w’amagare uri mu ikunzwe mu Rwanda. Tour du Rwanda ni kimwe mu bikorwa bya siporo iyi banki itera inkunga muri gahunda zayo zo guhindura ubuzima bw’abaturage.

Mu bakinnyi bafite izina mu mukino w’amagare harimo n’abarerewe muri Les Amis Sportifs y’i Rwamagana iterwa inkunga na Cogebanque. Barimo Niyonshuti Adrien [washinze ikipe ye], Uwizeyimana Jean Claude, Areruya Joseph na Ndayisenga Valens [wahagaritse gukina] bazamuye ibendera ry’u Rwanda.

Mu Banyarwanda bane batwaye Tour du Rwanda, iyi kipe ifitemo babiri barimo Ndayisenga Valens wayegukanye inshuro ebyiri (2014 & 2016) na Areruya Joseph mu 2017.

Usibye kureba ubuhanga bw’abakinnyi bazarushanwa muri Tour du Rwanda, uko baterera imisozi bakaminuka amataba, abakunzi b’amagare banegerejwe uburyo buzabafasha kugerwaho na serivisi z’imari.

Muri Tour du Rwanda, Cogebanque ishyiriraho Abanyarwanda uburyo bworoshye butuma babasha gutegura ejo heza binyuze mu gufunguza konti no kubatoza umuco wo kwizigamira.

Umuyobozi ushinzwe Iyamamazabikorwa muri Cogebanque, Iyamuremye Antoine, yabwiye IGIHE ko kuri iyi nshuro bazakomeza gufasha Abanyarwanda kugerwaho na serivisi z’imari zihindura ubuzima bwabo aho Tour du Rwanda izanyura hose, mu bukangurambaga bwiswe “AGUKA NA COGEBANQUE”.

Yagize ati ‘‘Umukino wo gusiganwa ku magare uri mu yakuze byihuse kuva mu myaka yashize, twahisemo neza gukomeza gutera inkunga Tour du Rwanda no kwegereza Abanyarwanda serivisi zitandukanye za banki zatuma barushaho kugira umutekano w’ahazaza habo binyuze mu kwizigamira, guhererekanya amafaranga bifashishije ikoranabuhanga no guhabwa inguzanyo bakiteza imbere.’’

Cogebanque inatera inkunga ibindi bikorwa, izasangiza abakunzi b’amagare amahirwe ari mu gukoresha serivisi z’imari no kugendera mu cyerekezo cy’igihugu cyo kubaka ubukungu bushingiye ku guhererekanya amafaranga bifashishije ikoranabuhanga.

Iyamuremye yavuze ko muri Tour du Rwanda 2020 bazakomeza gusangiza Abanyarwanda serivisi z’imari zihariye zitangwa na Cogebanque.

Ati “Tuzaba dufite ibikorwa by’imyidagaduro ahazajya hasorezwa isiganwa ndetse no mu nzira aho amagare azaca hose (Caravan). Abazagera ahazaba hari ibikorwa bya Cogebanque muri buri gace isiganwa rizasorezwamo baziyongerera amahirwe yo kuba mu bashobora gutsindira ibihembo bishimishije.’’

Mu gushyigikira gahunda yo guherekanya amafaranga hifashishijwe ikoranabuhanga, abazitabira Tour du Rwanda bazoroherwa no kubona serivisi za Cogebanque banyuze ku ba ‘Agents’ cyangwa bakoresheje Mobile Banking, Internet Banking n’amakarita (MasterCard na smart cash).

Muri Tour du Rwanda 2020, Cogebanque niyo izaha umwenda umukinnyi uzaba uwa mbere mu guterera imisozi mu duce (etape) twose umunani. Ni igihembo cyerekana ubwiza bw’u Rwanda nk’igihugu cy’imisozi igihumbi na Cogebanque akaba ari Banki Nyarwanda itanga serivisi mpuzamahanga.

“AGUKA NA COGEBANQUE” ni ubukangurambaga iyi banki izakoresha mu gusangiza abakunzi b'amagare uko bafunguza konti bakanazigamira ahazaza habo
Uduce isiganwa risorezwamo Cogebanque ihatangira ibihembo bitandukanye. Aha MC Tino yashyikirizaga umwe mu banyamahirwe amafaranga yari amaze gutsindira muri Tour du Rwanda ya 2019
Usibye ibikorwa bijyanye na serivisi z'imari, Cogebanque inafasha abakunzi b'umukino w'amagare kwidagadura. Bruce Melodie ari mu bahanzi baherekeje iyi banki muri Tour du Rwanda 2019
Cogebanque iri mu baterankunga b'imena ba Tour du Rwanda n'andi masiganwa y'amagare akomeye mu gihugu
Mu 2019, umwenda utangwa na Cogebanque uhabwa umukinnyi urusha abandi guterera imisozi wegukanywe na Debesay Yakob ukomoka muri Érythrée
Umuyobozi ushinzwe Imenyekanishabikorwa muri Cogebanque, Iyamuremye Antoine, ari mu baherekeza Tour du Rwanda aho inyura hose mu gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .