RDB yashimye uruhare rwa Pink Mango mu guteza imbere Made in Rwanda

Yanditswe na Twarabanye Venuste
Kuya 22 Ugushyingo 2019 saa 02:57
Yasuwe :
0 0

Ikigo cy’igihugu cy’iterambere (RDB) cyatangaje ko uruganda rukorera imyenda mu Rwanda rukayohereza mu mahanga C&D Pink Mango kimaze gutanga icyizere mu gushyigikira intego za Made in Rwanda zirimo kongera ibyoherezwa mu mahanga bikorerwa mu Rwanda bitari ibikomoka ku buhinzi n’ubworozi no gutanga imirimo ku banyarwanda.

Mu mezi atanu uruganda C&D Pink Mango rumaze mu maboko y’abashoramari babiri aribo Maryse Mukangabo Mbonyumutwa na Gordon Gu rumaze gutanga icyizere mu guteza imbere ibikorerwa mu Rwanda, kongera ibyoherezwa mu mahanga no gutanga imirimo ku banyarwanda.

Muri Gicurasi 2019 nibwo abo bashoramari baguze n’Abashinwa urwo ruganda rwitwaga C&H Garments ltd kuva mu 2015 rutangiye.

Mu mezi atanu ashize ibintu byarahindutse. Imirongo abakozi bakoreraho (bizwi nka Lines) ijyana n’umubare w’ibyo uruganda rukora n’abakozi rufite yari ine ubu imaze kugera kuri 16.

Icyo gihe kandi uruganda rwakoraga imipira (T-shirts) 1,500 ku munsi gusa ubu rugeze ku makoti ari hagati ya 7,000 na 8,000.

Abakozi na bo bavuye kuri 450 ubu bageze ku bakozi 1020. Abaruhawemo akazi barashima uburyo bakoramo biga kandi babasha no kwiteza imbere n’imiryango yabo.

Munyaneza Samuel yakoreye urwo ruganda kuva rugitangira, avuga ko yaje nta kintu azi atangira yigishwa gutera ipasi none ubu ni umuyobozi.

Ati “Ntangira naje hano nta mashini n’imwe nzi, nta n’ikintu na kimwe nzi gukora, bahera ku ipasi banyigisha ndayitera maraho amezi icyenda maze kubimenya ntangira ku mashini nza kuzivaho ntangira kujya mbara imyenda nkereka umugenzuzi ibyo bakoze nabyo mbimaraho amezi icyenda mbimenye mbivaho bangira umugenzura w’abandi bakozi, mbikora umwaka n’igice nabyo mbivaho ubu nshinzwe umurongo w’abakozi.”

Munyaneza yishimira ko yatangiye ahembwa 45,000 Frw ku kwezi ubu arahembwa 200,000 Frw.

Mugenzi we Niyibizi Emmanuel amaze amezi atandatu avuga ko ubwiyongere bw’inganda mu Rwanda ari amahirwe akomeye y’imirimo ku rubyiruko

Ati “ Uko inganda ziyongera niko abantu babona aho gukorera amafaranga, umuntu aza hano avuga ati ndakora ukwezi nigushira mpembwe. Mu mezi atandatu maze aha hari icyo maze kugeraho ariko iyo ntaza ntacyo mba maze kubona.”

Umushoramari Gordon Gu umaze imyaka irenga 20 mu bijyanye n’inganda zikora imyenda, avuga ko politiki ya leta yo korohereza ishoramari yabafashije cyane.

Ati “By’umwihariko Guverinoma y’u Rwanda iradufasha ibicishije mu kigo cy’igihugu cy’iterambere n’abaturage baradufasha cyane.”

Maryse Mukangabo Mbonyumutwa bafatanyije uruganda avuga ko mu mezi atanu bamaze imikorere imeze neza cyane.

Ati “Imikorere ni myiza cyane abanyarwanda bafite umurava ku buryo tubihuje n’ikipe y’abahanga n’imashini twazanye byatumye umusaruro uzamuka kugera kuri 70% ugereranyije n’umukozi wo mu Bushinwa.”

Umuyobozi mukuru wa RDB Clare Akamanzi, yashimiye C&D Pink Mango ko bari gushyigikira intego za made in Rwanda.

Ati “Uyu munsi dushimishijwe cyane n’uru ruganda rwitwa Pink Mango kuko ruri kuzuza ibyo twifuza nk’igihugu. Muzi ko dufite politiki ya Made in Rwanda twumva ko izadufasha kugira ngo dukemure ibibazo dushaka gukemura kugira ngo abanyarwanda babone amafaranga aruseho ayo babona ubu ngubu ndeste bagire ubuzima bwiza.”

Yavuze ko urwo ruganda ruri gusubiza ibyifuzo bitatu kuri Made in Rwanda yitezweho kongera ibyo u Rwanda rugurisha hanze ku giciro cyiza nyuma y’ibikomoka ku buhinzi nk’icyayi n’ikawa no gutanga akazi ku banyarwanda benshi.

Kugeza ubu uruganda rukoresha abakozi bagera ku 1020 rukaba rufite intego yo guha akazi abagera ku 10,000.

Uruganda C&D Pink Mango rukora amakoti gusa yoherezwa ku mugabane w’u Burayi mu bihugu birimo u Bufaransa, Espagne, n’u Budage.

Kuva abo bashoramari baruguze bamaze gushoramo miliyoni $ 3.8.

Abafatanyabikorwa baboneyeho kubaza ibibazo by'amatsiko ku nzira ikoti ricamo kugeza rirangiye barasubizwa
Abafatanyabikorwa batemberejwe ibice byose by'uruganda
Abakozi bakora mu mirongo bitewe n'icyo bazi gukora cyane
Aho bakatira ibitambaro mbere yuko bigera ku badozi babiterateranya
Bafite imashini zitandukanye bijyanye n'ikigiye gukorwa ku ikoti
Clare Akamanzi yavuze ko gukora neza kwa Pink Mango ari ugufungura imiryango ku bandi bashoramari
Igice kiba gifite ibigikorerwamo byihariye, aha bahakatira ibitambaro bakuramo ibice biraba bigize umwenda
Ikote rimaze gutungana ritegereje uzaryambara
Imashini ikoreshwa n'amaboko mu gukata ibice bigize umwambaro
Imyambaro yamaze gutunganywa iri kuzingwa
Maryse Mukangabo atembereza abafatanyabikorwa mu ruganda
Maryse Mukangabo yashimiye abafatanyabikorwa bose bakorana kuva muri Gicurasi 2019
Maryse Mukangabo yeretse abafatanyabikorwa ibyo uruganda rukora
Munyaneza Samuel watangiye ahembwa 45,000 Frw Ku kwezi ubu arahembwa 200,000 Frw
Akamanzi yashimye inganda zikorera mu Rwanda ku musanzu wazo mu bukungu bw'u Rwanda
Pink Mango bakora amakote y'ubwoko butandukanye acuruzwa i Burayi
Uduce tumaze gukatwa hari ababa bashinzwe kuduhuza tukoherezwa ku badozi duhambiranyije
Umushoramari Gordon Gu umaze imyaka irenga 20 mu bijyanye n’inganda zikora imyenda yavuze ko yizera imkorere y'abanyarwanda n'ubufasha bwa leta
Umuyobozi wa RDB Clare Akamanzi (ibumoso) na Yvonne Makolo wa Rwandair
Umuyobozi wa Rwandair Yvonne Makolo bamwe mu bafatanyabikorwa ba Pink Mango
Urubyiruko rwahawe akazi ku bwinshi
Usanga abakozi bakora ibitandukanye ku mwambaro umwe

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza