00:00:00 IGIHE NETWORK KN KINYARWANDA EN ENGLISH FR FRANCAIS

Perezida Duda yasuye uruganda rutunganya gasegereti mu Rwanda

Yanditswe na Léonidas Muhire
Kuya 8 February 2024 saa 12:53
Yasuwe :

Mu ruzinduko rw’iminsi itatu akomeje kugirira mu Rwanda, Perezida wa Pologne, Andrzej Duda yasuye uruganda rwa LuNa Smelter rutanganya gasegereti mu Rwanda, avuga ko ari urugero rwiza rw’ishoramari Igihugu cye cyateye inkunga kandi rifitiye akamaro kanini u Rwanda ndetse n’igice ruherereyemo.

Ni uruganda yasuye ku itariki ya 7 Gashyantare 2024 ku munsi wa Kabiri we w’uruzinduko ari gukorera mu Rwanda. Yatambagijwe ibice birugize, yerekwa uburyo amabuye y’agaciro aturuka mu Rwanda n’ahandi muri Afurika atunganywa.

Mu butumwa yashyize ku rukuta rwe rwa X yagize ati “Inkunga Pologne iha u Rwanda mu ikoranabuhanga n’ubumenyi yubakiye ku ihame ry’bufatanye. Ifasha ishyirwa mu bikorwa ry’imishinga ku bufatanye n’abaturage kandi hakoreshejwe imitungo iboneka hafi yabo".

Yakomeje ati "Uru ni urugero rw’uruganda rwa LuNa Smelter i Kigali; ni ryo shoramari rya mbere rinini rya Pologne n’Umuryango w’Ubumwe bw’u Burayi mu Rwanda. Mwarakoze kuri yu mushinga. U Rwanda rwabaye u rwa mbere mu gutunganya gasegereti muri Afurika yo hagati yose no mu y’Iburasirazuba".

Uruganda LuNa Smelter Ltd rukorera i Jabana mu Karere ka Gasabo kuva mu 2018. Rufite ubushobozi bwo gushongesha toni 360 za gasegereti buri kwezi. Rukoresha abakozi 50 bahoraho n’abandi ba nyakabyizi.

Aya mabuye niyo avamo ibyuma bya tin, byifashishwa mu mirimo itandukanye nko guhuza ibyuma mu gusudira, gukora za batiri za bimwe mu binyabiziga, gukoramo ibirahuri, gukora telefoni, mudasobwa n’ibindi.

Perezida Duda yeretswe uburyo amabuye y'agaciro atungwanywa mu ruganda rwa LuNa Smelter
Ni uruganda ruherereye i Jabana mu Karere ka Gasabo, i Kigali
Perezida Duda yeretswe uburyo amabuye y'agaciro atungwanywa mu ruganda rwa LuNa Smelter

Inkuru bijyanye: Rwinjiza arenga miliyari 24 Frw ku mwaka; ibyihariye ku ruganda rukumbi rushongesha Gasegereti mu Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .