Nyamasheke: Abajyanama b’ubuzima bagiye kubaka inzu y’ubucuruzi ya miliyoni zisaga 330 Frw

Yanditswe na Sitio Ndoli
Kuya 12 Gashyantare 2020 saa 08:26
Yasuwe :
0 0

Abajyanama b’ubuzima bo mu Karere ka Nyamasheke bafite umushinga wo kwiyubakira inzu y’ubucuruzi mu rwego rwo guhuza imbaraga no kwiteza imbere.

Gahunda y’abajyanama b’ubuzima yashyizweho mu 1995 ubwo igihugu cyashakaga uburyo bwo gukemura ibibazo by’ingenzi byari mu rwego rw’ubuzima.

Muri ibyo harimo abantu batabashaga kugera kuri serivisi z’ubuzima no kuba hari ubuke bw’abantu bashobora gutanga ubufasha mu by’ubuzima. Yatangiranye n’abanyamuryango 12,000 ariko baza kongerwa bagera ku 58,445 bitewe n’umusaruro batangaga.

Nubwo inshingano zabo z’ibanze ari ukwita ku buzima bw’abaturage, banatanga umusanzu mu kubaka igihugu binyuze mu bikorwa by’iterambere.

Muri Nzeri 2017, abajyanama b’ubuzima bo mu Karere ka Karongi bibumbiye muri koperative 22 bujuje inzu y’ubucuruzi [Agaciro Legacy Mall] yatwaye miliyoni 350 Frw, bakuye mu kwizigama.

Ni umushinga wakanguye andi makoperative, atangira na yo gutekereza ku bikorwa byagutse byayabyarira inyungu kandi bikabateza imbere n’igihugu muri rusange.

Mu mpera z’Ukuboza 2019, Minisitiri w’Ubuzima, Dr Gashumba Diane, yasabye abatuye i Rusizi na bo kwiyubakira inzu izabafasha kwiyubaka.

Ni ubutumwa bwumviswe n’abajyanama b’ubuzima muri Nyamasheke biyemeje kwiyubakira inzu y’ubucuruzi.

Abajyanama b’ubuzima 2352 bo mu mirenge 15 igize Akarere ka Nyamasheke, bavuga ko iyi nzu izabafasha kwiteza imbere bakabasha kugira ibikorwa by’ubucuruzi na bo bakora byunganira agahimbazamusyi bahabwa na Minisiteri y’Ubuzima.

Mukantaganzwa Consolée yagize ati “Iyo nzu izatujyana mu cyerecyezo ku buryo izajya ibyara inyungu maze igere no ku mujyanama w’ubuzima. Hazabamo ahari ubucuruzi, parikingi n’ibilo bizinjiza amafaranga kandi natwe atugereho.”

Habimana Gaston yavuze ko usibye abajyanama b’ubuzima, iyo nyubako izagirira akamaro abaturage muri rusange.

Yagize ati “Inzu niyuzura itangiye gukora amafaranga azavamo azajya muri twe natwe twiteze imbere.’’

Inzu y’abajyanama b’ubuzima izubakwa imbere y’Ibilo by’Akarere ka Nyamasheke.

Umuyobozi w’Akarere ka Nyamasheke wungirije ushinzwe Imibereho myiza y’Abaturage, Mukamana Claudette, yavuze ko akarere kamaze kugura ikibanza inzu izubakwamo.

Ati “Ni igitekerezo cyaturutse mu bajyanama b’ubuzima ubwabo kandi nka twe abayobozi twumva ko tugomba kugishyigikira kuko gifite iterambere ry’akarere. Twabafishije kubona ikibanza cyo kuyubakamo.”

Inzu igiye kubakwa n’abajyanama b’ubuzima mu Karere ka Nyamasheke izatwara miliyoni 335 z’amafaranga y’u Rwanda yatanzwe n’abajyanama b’ubuzima. Izatangira kubakwa muri Mata uyu mwaka mu gihe biteganyijwe ko izuzura mu mpera z’Ukuboza 2020.

Imibare ya Minisiteri y’Ubuzima yo mu 2019 igaragaza ko abajyanama b’ubuzima babinyujije muri koperative zabo bamaze kugira umutungo utimukanwa ufite agaciro ka miliyari 11.2 Frw, wiyongera kuri miliyari 3.5 Frw abitse mu bigo by’imari bitandukanye.

Inzu y’ubucuruzi y'abajyanama b'ubuzima izubakwa imbere y'Akarere ka Nyamasheke
Abajyanama b’ubuzima bo mu Karere ka Karongi bibumbiye muri koperative 22 bujuje inzu y’ubucuruzi yatwaye amafaranga miliyoni 350, bakuye mu kwizigama. Yatashywe mu 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza