Imishinga 30 yiganjemo iy’ikoranabuhanga ihataniye inkunga yo gufasha abahanzi guhangana n’ingaruka za COVID-19

Yanditswe na Uwiduhaye Theos
Kuya 16 Nzeri 2020 saa 01:30
Yasuwe :
0 0

Mu gufasha abahanzi kwigobotora ingaruka COVID-19 yagize ku bikorwa byabo, Guverinoma yatekereje uburyo bwo gushyigikira imishinga ifite umwihariko iyigenera inkunga ya miliyoni 300 Frw yashyizwe mu Kigega cyo kuzahura Inganda Ndangamuco.

Iyi gahunda yashyizweho ku bufatanye bwa Minisiteri y’Urubyiruko n’Umuco; Inteko Nyarwanda y’Ururimi n’Umuco ku bufatanye na Imbuto Foundation, binyujijwe muri gahunda ya ArtRwanda – Ubuhanzi yashyiriweho kuzamura abanyempano.

Binyuze muri iki kigega, imishinga isaga 600 irimo iy’abahanzi n’abandi bafite ishobora gutanga umusanzu ufatika mu kuzahura inganda ndangamuco barayitanze. Imishinga 45 niyo yageze mu cyiciro cya nyuma aho igomba kuvamo 30 izahabwa inkunga, aho buri wose uzagenerwa miliyoni 10 Frw.

Kuri uyu wa Kabiri tariki 15 Nzeri 2020, abahanzi batandukanye mu nguni zose berekanye imishinga yabo aho izabasha kuba ijyanye n’umurongo ukenewe izashyigikirwa.

Bamwe mu bahanzi basanzwe bazwi bitabiriye iki gikorwa barimo Patrick Nyamitari ufite umushinga wo gutegura amarushanwa ku banyempano bakizamuka, hagamijwe kurwanya zitateganyijwe mu bangavu.

John Mugenzi Jr (Babou), Umuyobozi wa Comedy Knights ufite umushinga wo gutangiza igitaramo cy’urwenya, kizajya kibera kuri murandasi, kizafasha imishinga yahungabanyijwe na COVID-19 mu kwamamaza binyuze mu gusetsa.
Harimo kandi Jules Bohneur Icyoyitungiye [Jules Sentore], ufite umushinga w’amahugurwa y’umuziki gakondo. Abinyujije muri Rwamwiza Ltd, arateganya kwigisha abahanzi amahame yo gukora umuziki gakondo wunguka, kumenya uburenganzira bafite ku bihangano byabo n’uko bibyazwa amafaranga.

Nyamitari Patrick ufite umushinga wo gushaka abanyempano bashya no kubigisha gutanga ubutumwa bwiza nko kurwanya inda zitateganyijwe, yabwiye IGIHE ko yahisemo uyu mushinga kuko yabonye ari ikibazo cyugarije urubyiruko.

Ati “Nabihisemo kuko byugarije igihugu cyacu muri iyi minsi, numvaga ko inzira nziza yaba ari ugutangiza amarushanwa. Iyo umuntu atayitabiriye ashobora no kuyakurikira. Natekereje kwifashisha abahanzi bato muri uyu mushinga wanjye kubera ko nashakaga gutanga umusanzu mu muziki, muri make ni ukwicisha ibuye rimwe inyoni ebyiri.”

Umufotozi Pacifique Himbaza umaze imyaka 10 afotora ari kubaka studio irimo ahatunganyirizwa indirimbo n’ahagurishirizwa amafoto, abinyujije mu mushinga yise Inganzo Art Café, uzafasha abantu kubona aho kuruhukira.

Ati “Nagennye ahantu hameze nk’isoko ry’amafoto, aho abantu bazajya bahasura bakishyura amafoto umuhanzi wayifashe akishyurwa. Ikindi nashyizeho ahantu abahanzi bazajya bagurira impano, ku buryo uzajya abakenera azajya aza azi ahantu abasanga. Umuntu najya atugana tumuhe abo bahanzi, bimugirire inyungu ndetse natwe bidufashe.”

“Ni ubuhanga buzaba buherekeje ubundi buhanzi. Rizaba ari ihuriro ry’abahanzi, nahereye ku bana bafotora bo muri Art Rwanda ndetse mfite n’itsinda ry’abaririmbyi ryitwa Umurage Live Band dukorana muri iki gikorwa.”

Imishinga myinshi yatanzwe n’abanyuze imbere y’Akanama Nkemurampaka yiganjemo iyo gucuruza ibihangano hifashishijwe ikoranabuhanga.

Umuyobozi wa Imbuto Foundation, Umutoni Sandrine, yavuze ko igikorwa cyo gushyigikira imishinga kigamije gufasha abahanzi bose bagizweho no kuba ibikorwa bakuragamo amaronko byahagaze.

Ati “Kuva icyorezo cya COVID-19 cyagera mu Rwanda twabonye ko ibikorwa bijyanye n’ubuhanzi byazahaye. Twarebye mu bafatanyabikorwa dufite tuganira ku kuntu twatanga umusanzu ngo ibintu bitere imbere. Twashakaga kongera gutera imbere ubuhanzi cyane cyane urubyiruko tukareba ubushobozi twashyiramo ngo turebe ko batera imbere.”

Yavuze ko mu guhitamo imishinga harebwa ku ifite ubushobozi bwo kungukira abantu benshi.

Ati “Ubushobozi ubu dufite ni ugufasha abantu 30 ariko icyo tugamije kugeraho ni uko aba bantu bafite gahunda yo guteza imbere n’abandi. Ikindi ni ukugerageza ko mu Rwanda hari abahanzi benshi bafite impano bakeneye kugaragara. N’ubwo uyu munsi twateganyije guhemba abantu 30 ntabwo ari aha tuzahagararira.”

Umutoni yavuze ko umubare w’abari n’abategarugori bitabiriye amarushanwa ukiri hasi cyane, abashishikariza gushirika ubwoba.

Ikigega cyo kuzahura Inganda Ndangamuco zahungabanyijwe na COVID-19 cyatangiranye miliyoni 300 Frw ashobora kuzongerwa; azahabwa imishinga 30 myiza igomba gutoranywa muri 45 iri mu cyiciro cya nyuma.

Inkunga izahabwa imishinga izanyuzwa mu Kigo cy’Ubucuruzi cya Business Professionals Network (BPN) ari nacyo kizayikurikirana mu gihe cy’amezi atandatu. Izatangwa mu byiciro bibiri ku buryo izagirira akamaro abantu benshi, uwayihawe na we agakurikiranwa ku buryo ayikoresheje nabi yakurikiranwa.

Jules Sentore afite umushinga w'amahugurwa y’umuziki gakondo
Umunyarwenya Babou ni umwe mu bitabiriye iki gikorwa
Nyamitari Patrick afite umushinga ugamije gufasha abangavu baterwa inda zitateganyijwe
Pacifique Himbaza afite umushinga uzafasha abantu kujya bagura bakanagurisha amafoto

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .