Ibanga ryatumye u Rwanda ruba indashyikirwa mu korohereza ishoramari

Yanditswe na Akayezu Jean de Dieu
Kuya 3 Ugushyingo 2018 saa 11:21
Yasuwe :
0 0

Raporo ya Banki y’Isi ya ‘2019 World Bank Ding Business’, yashyize u Rwanda ku mwanya wa 29 ku Isi, mu gihe muri Afurika rwaje ku mwanya wa kabiri mu bihugu byorohereza ishoramari.

U Rwanda rwageze kuri uyu mwanya biturutse ku kuba muri uyu mwaka rwarakoze amavugurura arindwi arimo no korohereza ibigo mu gihe cy’igihombo.

Perezida Kagame yagaragaje ko intambwe u Rwanda rwateye ari ikimenyetso cy’ibishoboka byagerwaho mu gihe habayeho gushyira hamwe.

Yagize ati “Muri raporo ya Banki y’Isi yashyizwe ahagaragara kuri uyu wa Gatatu, u Rwanda rwaje ku mwanya wa 29 mu koroshya ishoramari, ruvuye ku mwanya wa 41 mu gihe cy’umwaka umwe gusa.”

“Ibi bigaragaza ko hari ibiri gukorwa kandi ko dukwiye kurushaho gukora cyane ndetse neza kugira ngo dutere imbere vuba, ikindi ni uko mu bihugu 100 bya mbere mu koroshya ishoramari ku Isi, u Rwanda nicyo gihugu kikiri mu nzira y’amajyambere.”

Impuguke mu by’ubukungu zivuga ko kuba u Rwanda ari igihugu kimakaje imiyoborere izira ruswa, ari imwe mu mpamvu ituma abashoramari bishimira kuza gushora imari mu gihugu.

Fred Seka ubwo yari mu kiganiro Isesenguramakuru cyo kuri Radio Rwanda yagize ati “Kuko ruswa ni imungu yaba mu mutungo, mu bukungu, mu iterambere no mu mutekano, iyo igihugu cyagiyemo ruswa ibyo byose birapfa. Kuyirwanya rero ni imbaraga zishyirwamo buri munsi, nizera ko buri munyarwanda n’utuye mu Rwanda afite inshingano zo kurwanya ruswa.”

“Niba umushoramari agiye mu Karere bagomba kumwakira , biri mu nshingano kuko RDB yakoze akazi kayo ireshya umushoramari imukura mu mahanga araje, imubwira ko azahabwa ibintu mu gihe runaka yagera mu Karere ariko umuyobozi akamubwira ati kugira ngo tugusinyire izi mpapuro hari amafaranga runaka uri butange.”

Yakomeje atanga urugero rw’igihugu cyo mu Karere aherutse kujyanayo abashoramari bagezeyo babasaba ko kimwe cya kabiri cy’amafaranga yagombaga gushoramo imari bakibakamo ruswa ahita agaruka aravuga ati njye nzashyira uruganda mu Rwanda ruhagarariye East Africa yose.

Ati “Iyo umuyobozi cyangwa urwego rusabye ruswa, byica ibyakabaye bihabwa abaturage. Rero kuba turwanya ruswa ahubwo dushyiremo imbaraga cyane kugira ngo na wa mushoramari utari waza abone koko ko bikorwa atari amagambo.”

Dr. Bihira Canisius yavuze ko kuri ubu gahunda zashyizweho zijyanye no kwakira Na Yombi abashoramari, ari urugero rwiza rugaragaza ko u Rwanda rwiyemeje kurandura ruswa.

Ubushakashatsi bw’Umuryango urwanya ruswa n’Akarengane, Transparency International, bugaragaza imiterere ya ruswa mu 2017, bwashyize u Rwanda ku mwanya wa gatatu mu bihugu birangwamo ruswa nke muri Afurika, ruzamuka imyanya ibiri ku isi.

Ubwo bushakashatsi bugaragaraza ko u Rwanda rufite amanota 55 aho rwavuye ku mwanya wa 50 rwariho mu 2016 rugera ku wa 48 mu 2017 mu bihugu birimo ruswa nke ku isi.

Mu Rwanda hashyizweho ingamba mu gukumira no kurwanya ruswa mu gihugu cyacu; harimo amategeko, ubushake bwa politiki, kutihanganira na gato abijandika muri ruswa n’ibyaha bifitanye isano na yo, amategeko mashya n’ayavuguruwe na politiki y’igihugu yo kurwanya ruswa.

Igice cyahariwe inganda cya Kigali giherereye i Masoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza