00:00:00 IGIHE NETWORK KN KINYARWANDA EN ENGLISH FR FRANCAIS

​Impuguke zo mu bihugu birenga 20 ziteraniye i Kigali ziga ku cyakemura ikibazo cy’ingufu

Yanditswe na

​Kayonga J.​

Kuya 6 Ugushyingo 2015 saa 06:54
Yasuwe :

Mu ihuriro ryiswe iPAD Rwanda [Infranstructure Partnerships for African Development] riteraniye i Kigali mu gihe cy’iminsi ibiri uhereye kuri uyu wa Kane tariki 5 Ukwakira, impuguke ziri kungurana ibitekerezo ahanini byaganishaga ku gushakira umuti urambye ikibazo cy’ingufu z’amashanyarazi gikomeje kubera ingorabahizi igihugu, aho benshi muri bo bahuriza ku kuba bikwiye ko hashyirwa imbaraga nyinshi mu bufatanye hagati ya Leta n’abikorera ku giti cyabo mu kongera imbaraga mu kubyaza amashanyarazi izuba n’umuyaga.

​Iri huriro ryitabiriwe n’impuguke, abayobozi mu nzego za leta n’abashoramari barenga 200 baturutse mu bihugu birenga 20​, rifite insanganyamatsiko igira iti "Guteza imbere ishoramari ry’abikorera ku giti cyabo hagamijwe guteza imbere ibikorwa remezo ndetse n’inganda."

​Umwe mu bayobozi b’ikigo gikwirakwiza amashanyarazi muri Senegal, Senelec, Issa Dione, ​yagarutse ku kamaro ko gushora imari mu mishinga mito mito ibyara ingufu z’amashanyarazi, yibanda cyane ku kubyaza ingufu z’amashanyarazi izuba ndetse n’umuyaga, agaragaza ko ubu buryo aribwo buzabashisha Afurika kugera ku iterambere rirambye.

Ibi kandi yabihurijeho na Abel Didier Tella​, Umuyobozi Mukuru wa ​ASEA (Association des Sociétés​ ​d’Electricitéd’Afrique)​, umuryango ufite icyicaro muri Cote d’Ivoire uhuriza hamwe ibigo bifite uruhare mu bijyanye n’ingufu ku rwego rwa Afurika nzima​, nawe ​w​akanguriye ibihugu gushora imari ​mu ngufu zikomoka ku zuba n’umuyaga agaragaza ko ari bwo buryo bworoshye bushoboka mu kongera amashanyarazi ku mugabane w’Afurika. Ati "Leta zo muri Afurika zikwiye gushyira imbaraga ndetse no gukangurira abashoramari kwerekeza imari zabo mu mishinga yihariye ibyara ingufu."

​Kuri ubu ingufu z’amashanyarazi zibasha kuboneka mu Rwanda ari nazo zikoreshwa zingana na megawatt 162.2, mu gihe intego ari ukugera kuri megawatt 563 mu mwaka wa 2017, ubwo 70% by’abatuye u Rwanda bazaba bakoresha umuriro w’amashanyarazi mu gihugu hose, mu gihe kuri ubu 22% gusa by’abanyarwanda aribo abasha kugeraho.

​40% by’amashanyarazi acanwa mu Rwanda akomoka ku mashini nini [generators]​ zikoresha mazutu igurwa miliyari 2,5 z’amafaranga y’u Rwanda buri kwezi, mu rwego rwo kongera ingufu kuko ubundi buryo bubyara ingufu mu Rwanda butarageza aho bwahaza igihugu mu mashanyarazi.

Kuba hakoreshwa izi mashini zibyara amashanyarazi zikoresha mazutu bituma igiciro cyayo kizamuka cyane, nk’uko byagarutsweho na Minisitiri w’Ibikorwa Remezo n’Ingufu, James Musoni, wagaragaje ko ubu buryo buri gukoreshwa by’igihe gito.

​60% by’amashanyarazi akoreshwa mu Rwanda akomoka ku ngufu zibyarwa hifashishijwe uburyo butandukanye burimo amazi abyara angana na megawatt 97,37 ​, akomoka ku mashyuza angana na megawatt 51,7, mu gihe gaze metane ibyara amashanyarazi angana na megawatt 3,6, naho ingufu zikomoka ku zuba zikabyazwa angana na megawatt 8,75. Biteganyijwe ko uyu mwaka uzarangira ku mashanyarazi asanzwe hiyongereyeho angana na megawatt 61,5 azaturuka mu mishinga mishya.

​Biteganyijwe kandi ko u Rwanda ruzatangira gukura megawatt 30 z’amashyarazi muri Kenya mu gihe cya vuba, naho mu myaka ibiri iri imbere megawatt 400 z’inyongera zikazaturuka muri Ethiopia.​

​Uyu mwaka wonyine, Leta y’u Rwanda yagennye miliyari 135 Frw azifashishwa mu kongera ingufu z’amashanyarazi.​

​Kugirango u Rwanda rubashe kwihaza mu mashanyarazi, leta yateganyije gushora muri ibi bikorwa miliyari 3 z’amadolari y’Amerika, hafi kimwe cya kabiri cyayo akazaturuka mu bikorera.

​Ihuriro iPAD Rwanda riteraniye i Kigali ku nshuro ya kabiri ryateguwe na sosiyete Spintelligent ikorera muri Afurika y’Epfo ku bufatanye na REG ndetse na Minisiteri y’Ibikorwa Remezo n’Ingufu.​ Mu kuyitegura ahanini haba hagamijwe kureshya abashoramari b’abanyamahanga gushora imari yabo mu kongera ingufu z’amashanyarazi mu Rwanda.

Foto: TNT


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .