Kurebera hamwe uburyo ishoramari ryatezwa imbere hagati y’u Rwanda na Kenya, ndetse no kuvanaho zimwe mu nzitizi zikigaragara, iyi niyo ngingo nyamukuru yahurije i Kigali bamwe mu bahagariye ibigo by’ubucuruzi ndetse n’ishyirahamwe ry’ishoramari rihuza u Rwanda na Kenya mu buryo bwo kwiteza imbere.

Abitabiriye iyi nama, barebeye hamwe uburyo ishoramari hagati y’u Rwanda na Kenya ndetse no mu bihugu by’Iburasirazuba bwa Afurika muri rusange rimaze gutera imbere, kuko basanze Kenya imaze gushora imari mu Rwanda kuburyo bugaragara, hatangwa urugero nk’aho Sosiyete ya Nation media group ndetse n’amwe mu mabanki yo muri Kenya, amaze kugezwa mu Rwanda.

Linus w.Gitahi Umuyobozi Mukuru wa Nation media group, Sosiyete ikora iby’itumanaho mu gihuhu cya Kenya, ikaba ari nayo ifite Radiyo ya KFM mu Rwanda, yatangarije abitabiriye iyi nama ko ikibazo usanga kiri muri aka karere k’Iburasirazuba ndetse no muri Afurika muri rusange, ari uko abashoramari bishyiramo ko nta bushobozi bafite bwo kwikemurira ibibazo, bityo ngo bagategereza abanyamahanga ko aribo baza kubakorera ibyo bita ko byabananiye, nyamara ugasanga ngo babyijyanira iwabo.

Ku kibazo cy’uko hagati y’ibi bihugu bibiri nta shoramari rihagaragara cyane, Gitahi yavuze ko mu by’ukuri ibyo atari byo, kuko ngo Kenya iza ku mwanya wa 2 nyuma ya Afurika y’Epfo mu ishoramari mu Rwanda, ngo gusa igikenewe ari ugushaka uburyo hashyirwamo ingufu ngo ibitaragerwaho bigerweho.

Umuyobozi mukuru wa Rwandair, John Mirenge, yatangarije IGIHE ko Sosiyete ya RwandaAir hari byinshi imaze kugeraho kubera gukoresha ingufu, bityo asaba ko ama sosiyete yo mukarere yashyira hamwe kugirango ingendo z’indege zitezwe imbere aho kujya bategereza akimuhana kaza imvura ihise.

Abayitabiriye iyi nama, bishimiye ko u Rwanda rwamaze kuvanaho zimwe mu mbogamizi mu bucuruzi, ndetse no korohereza ishoramari gukorera mu Rwanda kuburyo bwihuse biciye mu kigo cya RDB.

Iri shyirahamwe ry’ishoramari hagati u Rwanda na Kenya, ryarashinzwe mu mwaka wa 2007, kugirango harusheho kunozwa ishoramari hagati y’ibi bihugu byombi ndetse no gushaka umuti ku mbogamizi zishobora kuvuka.