00:00:00 IGIHE NETWORK KN KINYARWANDA EN ENGLISH FR FRANCAIS

Uko Itzhak Fisher wa RDB yaje mu Rwanda nk’umukerarugendo, akahavana inshingano

Yanditswe na Ferdinand Maniraguha
Kuya 24 June 2022 saa 07:27
Yasuwe :

Mu 2016, Umunya-Israel utuye muri Leta Zunze Ubumwe za Amerika, Itzhak Fisher, yafashe ibyumweru bibiri n’igice atembera mu bihugu bine bya Afurika yishimira ko yari yujuje imyaka 60 avutse.

Urwo rugendo Fisher yakoze ari kumwe n’umufasha we, barukoreye mu bihugu birimo Botswana, Tanzania, Zambia n’u Rwanda.

Umwaka wakurikiyeho, Fisher yagizwe Umuyobozi w’Inama y’Ubutegetsi w’Urwego rushinzwe Iterambere mu Rwanda (RDB), umwanya akiriho kugeza maginga aya.

Imvano yo kwiyumvamo u Rwanda yari agezemo bwa mbere, Fisher yayisangije abari bitabiriye inama yiga ku gushora imari mu Rwanda “Investing in Rwanda”, yahurije hamwe abashoramari batandukanye kuri uyu wa Kane, mbere y’amasaha make ngo abakuru b’ibihugu na za Guverinoma zigize Commonwealth bahurire mu nama izwi nka CHOGM i Kigali.

Itzhak Fisher, ni umunyemari ufite ikigo Pereg Ventures gishora imari mu bigo bito n’ibiciriritse bigitangira ariko bifite amahirwe yo gutera imbere, byaba muri Israel na Leta Zunze Ubumwe za Amerika.

Mu myaka ya 1990, Fisher ni umwe mu bashinze sosiyete RSL Communications yaje gufunga imiryango mu myaka ya 2000 imaze kugira umutungo wa miliyari 1,7 z’amadolari ya Amerika.Yabaye Visi Perezida mu kigo Nielsen Holdings ashinzwe gahunda z’iterambere no kuyishakira ibindi bigo yagura.

Ikiganiro yagiranye na Perezida Kagame cyamuhumuye amaso

Fisher yavuze ko ubwo we n’umugore we batembereraga mu Rwanda mu 2016, bashimishijwe n’isuku ihari ariko by’umwihariko ubushake Abanyarwanda bafite bwo gutera imbere.

Ati “Ubwo twari turi gutembera muri Kigali, umugore wanjye yarambwiye ati ’ugomba kugira icyo ukora mu Rwanda’. Nahuye na Perezida ambwira kuzongera nkagaruka nkafata icyumweru ndi i Kigali, ati ‘tuzagufasha guhura n’uwo ushaka guhura na we hanyuma urebe niba hari icyo wadufasha’.”

Yaje gushaka umwanya ahagaruka ataje gutembera ahubwo aje kureba amahirwe ahari y’ishoramari.

Fisher yavuze ko icyumweru akirangije, yongeye guhura na Perezida Kagame, amubwira ko yiyemeje gufasha u Rwanda kureshya abashoramari mpuzamahanga.

Ati “Nabikoze umwaka wose nyuma yawo ndamubwira nti haracyari utubazo, ndakeka ko natanga umusaruro neza ngize ubundi bufasha bw’inyongera bunshyigikira. Yahise ambwira ati ’noneho turakugira Chairman wa RDB.’”

Mu myaka itanu ishize agizwe Umuyobozi w’Inama y’Ubutegetsi ya RDB, Fisher avuga ko amaze kujya mu Rwanda inshuro zisaga 60.

Yabwiye abashoramari batandukanye bitabiriye CHOGM ko u Rwanda ari igihugu cy’amahirwe mu nzego zitandukanye, kubera ko hafi ya zose zigikeneye gutezwa imbere.

Ati “Ku bantu bageze hano bwa mbere, ndifuza ko babigenza nk’uko nabigenje. Ndifuza ko mufata umwanya mukazagaruka, mudusure hanyuma mushore imari mu Rwanda. Ndabizeza ko gushora imari mu Rwanda bizababyarira inyungu, mutazabyicuza.”

Icyizere cya Fisher cyashimangiwe na Andrew Mitchell, Umudepite mu Nteko Ishinga Amategeko y’u Bwongereza wigeze kuba Minisitiri ushinzwe Iterambere.

Uyu mugabo uzwi nk’inshuti y’u Rwanda, yavuze ko ‘Iyo ukigera mu Rwanda uhita ubona ko wageze mu gihugu kidasanzwe’ kubera urujya n’uruza ruri ku murongo, iterambere n’ibindi.

Ati “Njye ariko icyo mbona kidasanzwe hejuru y’ibyo byose ni imiyoborere myiza ituma u Rwanda ruba ahantu heza ho gushora imari. Ni ahantu amategeko yubahirizwa, ku bashoramari baza mu Rwanda amafaranga yabo ntazanyerezwa cyangwa se ngo aribwe n’ibisambo byaba iby’abacuruzi cyangwa abanyapolitiki.”

Mitchell abihuza n’inshuro ya mbere aza mu Rwanda mu myaka 20 ishize, ubwo igihugu cyari kigihanganye n’ingaruka zasizwe na Jenoside yakorewe Abatutsi.

Yavuze ko icyo gihe 80 % by’ingengo y’imari u Rwanda rwakoreshaga yaturukaga hanze y’igihugu ariko ubu hejuru ya 83 % by’ingengo y’imari asigaye ava imbere mu gihugu.

Ati “Ndababwira ko aha atari igihugu cy’amahirwe gusa ku bantu bari aha, ni igihugu cy’amahirwe ku batuye Isi bose.”

Itzhak Fisher yavuze ko bwa mbere akigera mu Rwanda, yabonye itandukaniro ryarwo n'ibindi bihugu yagezemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .