00:00:00 IGIHE NETWORK KN KINYARWANDA EN ENGLISH FR FRANCAIS

Ubworozi bw’amafi bwongerewe muri gahunda y’ubwishingizi bw’amatungo

Yanditswe na Igizeneza Jean Désiré
Kuya 7 Mutarama 2023 saa 10:38
Yasuwe :

Minisisiteri y’Ubuhinzi n’Ubworozi, MINAGRI yatangaje ko igiye gutangiza gahunda y’ubwishingizi bw’amafi kugira ngo irusheho kongera umusaruro wayo, ibizatuma n’abashoramari bitabira ubu bworozi kuko ubusanzwe batinyaga guhomba.

Ubusanzwe ubwishingizi bw’amatungo bwakorwaga ku nka ingurube n’inkoko aho leta itangira umworozi 40% na we akiyishyurira 60%, igiciro cy’ubwishingizi kigaterwa n’agaciro itungo rifite.

Inka itangirwa 5.5% by’igiciro ifite, ingurube igatangirwa 6% mu gihe inkoko itangirwa 5.5%.

Inka ifite agaciro k’ibihumbi 100 Frw ubwishingizi bwayo ni 4500Frw, umworozi agatanga 2700 Frw, leta ikamutangira 1800 Frw. Inka yemerewe gutangirwa ubwishingizi nyuma y’amezi atatu ivutse kandi ubwishingizi bwayo bumara umwaka umwe.

Ingurube ifite agaciro k’ibihumbi 50 Frw yishingirwa ku 3000 Frw, umworozi agatanga 1800 Frw naho Leta ikamutangira 1200 Frw. Ubwishingizi bw’ingurube bumara umwaka kandi ingurube yemerewe gutangirwa ubwishingizi nyuma y’iminsi 30 ivutse.

Bijyanye n’uko ubworozi bw’amafi butari busanzwe bwishingirwa, abashoramari bavuga ko busaba igishoro kinini ku buryo iyo hagize ikiza kibubaho umworozi ashobora guhomba akayabo k’amafaranga nk’uko Munyangeyo Themistocles yabibwiye RBA.

Ati “Mu 2020 napfushije toni zirenga 100 urumva ko nahombye. Iyo ntaza kugira icyo gihombo nakabaye ngeze kure. Ubworozi bw’amafi busaba amafaranga menshi. Ntibyumvikana ukuntu ushyira amafaranga menshi ahantu udashobora kubona ubwishingizi.”

Umusaruro w’amafi mu Rwanda wariyongereye mu 2022 aho wavuye kuri toni 41.664 ukagera kuri 43.560 nk’uko raporo ya MINAGRI ibigaragaza.

Umuyobozi Mukuru muri MINAGRI ushinzwe uruhererekane nyongeragaciro, Nshimiyimana Octave yavuze ko guhera muri Mutarama 2023 ubworozi bw’amafi bugiye gutangira kwishingirwa mu kongera umusaruro.

Ati “Iyo urebye ibiyaga dufite ukareba n’ubushake bw’aborozi bifuza kugana ubu bworozi ubona ari ibintu byatanga umusaruro. Abanyarwanda banyotewe no kubona amafi ku giciro cyiza ndetse n’abaturanyi baba bayakeneye.”

Nshimiyimana akomeza avuga ko ibi bizatuma n’ibiyaga biri mu gihugu byose bibyazwa umusaruro, akemeza ko ntakundi byahabwa imbaraga bitari uko abashoramari bakwinjiramo bafatanyije n’ibigo by’imari “ariko bikajyamo bitekanye byizera ko iyo gahunda izakora neza.”

Ibigo by’ubwishingizi bitanu ni byo bisanzwe bitanga serivisi z’ubwishingizi bw’ibihingwa n’amatungo. Ni na ho leta inyuza nkunganire igenera abaturage bashinganishije amatungo yabo kugira ngo bizorohe mu gihe umuhinzi cyangwa umworozi yagobokwa.

Kugeza ubu leta imaze gutanga nkunganire ya miliyari 1.7 Frw, mu gihe arenga miliyari 4.2Frw amaze gutangwa muri gahunda yo kugoboka abahuye n’ibibazo bitandukanye mu buhinzi n’ubworozi binyuze muri gahunda ya ’’Tekana urishingiwe muhinzi-mworozi’’ yatangiye mu 2019.

Abamaze kugerwaho n’iyi gahunda bagera ku bihumbi 513, MINAGRI igasaba ibigo by’ubwishingizi kunoza iyi serivisi ku buryo uyikeneye ashobora kuyibona mu gihe kitarambiranye bikaba byadindiza umushinga we.

Uburobyi bw’amafi bukorerwa mu biyaga bigera kuri 17 n’imigezi ine mu turere 15 binyuze mu makoperative gusa buracyakorwa mu buryo bwa gakondo. Abarobyi 3827 ni bo babarurwa mu gihugu aho bibumbiye mu makoperative 70.

U Rwanda rufite intego y’uko mu 2024 ruzaba rusarura toni 112 z’amafi buri mwaka nk’uko bikubiye muri gahunda ya kane y’impinduramatwara mu by’ubuhinzi (PSTA4).

Uburobyi bw’amafi bukorerwa mu biyaga bigera kuri 17 n’imigezi ine mu turere 15

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .