Uburyo ubukungu bw’u Bushinwa bwungukiye mu cyorezo cya Coronavirus

Yanditswe na Ndahayo Emmanuel
Kuya 30 Ukuboza 2020 saa 08:39
Yasuwe :
0 0

Kuva icyorezo cya Coronavirus cyatangira kuboneka, ubukungu bw’Isi bwarahungabanye. Imibare ishingiye ku bipimo bitandukanye igaragaza ko ubukungu bw’Isi bubarirwa agaciro ka miliyari 88 000$, buzagabanukaho tiliyari 6$ nk’uko byatangajwe n’Ikigo kizobereye mu by’Ubukungu cya World Economy League Table (WELT).

Irindimuka ry’ubukungu bw’Isi ryatewe n’ihungabana rikomeye ry’ibikorwa birimo ingendo hagati y’ibihugu ndetse n’umusaruro wagabanutse ku rwego rwa buri gihugu, kuko ubwo ingamba za Guma mu Rugo zashyirwagaho ahenshi umusaruro w’ibikorwa wagabanutse muri rusange.

Iri gabanuka rinagaragarira mu ry’ubukungu bw’ibihugu bikomeye nk’aho ubwa Amerika bwagabanutseho 3.6% mu gihe ubw’u Bwongereza bwamanutseho hafi 10% yose muri uyu mwaka.

Ku ruhande rw’u Bushinwa, iki gihugu cyagaragayemo Coronavirus mbere y’ibindi, kiragaragaza ibimenyetso by’uko ubukungu bwacyo buzarushaho gutera imbere nyuma y’iki cyorezo.

Iki gihugu ni cyo cyonyine mu byateye imbere gifite ubukungu butahungabanye muri uyu mwaka, aho bwazamutse ku kigero kingana na 2%, mu gihe mu mwaka utaha bushobora kuzazamuka ku kigero cya 8.4%. Ubukungu bwa Amerika na bwo bwitezweho kuzazamuka mu mwaka utaha, ariko ku kigero cyo hasi cyane cya 0.25%.

Abahanga mu by’ubukungu bavuga ko ubw’u Bushinwa buri kuzamurwa cyane n’uburyo ibikorerwa muri iki gihugu bikenewe cyane ku rwego mpuzamahanga, bitewe n’uko ibihugu byinshi byagabanyije ingano y’ibikorwa birimo iby’inganda mu rwego rwo kugabanya ikwirakwira rya Coronavirus, ibyo bigatuma ibicuruzwa by’u Bushinwa bikenerwa cyane kugira ngo bisimbure ibyakorerwaga mu bihugu byashyizeho ingamba za Guma mu Rugo.

Ibi ariko na byo u Bushinwa bubikesha uburyo bwahanganye n’iki cyorezo mu ntangiriro zacyo, kuko nko mu Mujyi wa Wuhan wo mu Bushinwa, ari na wo iki cyorezo cyatangiriyemo, ubu usigaye uberamo ibitaramo bihambaye kandi abantu batambaye udupfukamunwa, kuko nta bwandu bw’iki cyorezo bukiwurimo.

WELT ivuga ko bitewe n’uburyo ubukungu bw’u Bushinwa na Amerika buhagaze, igihe byari buzatware kugira ngo ubw’u Bushinwa bube bunini kurusha ubwa Amerika cyagabanutseho imyaka itandatu, kikagera mu 2028 kivuye mu 2033.

Ingano y’ubukungu bw’u Bushinwa imaze kugera ku mpuzandengo ya 16% by’ubukungu bw’Isi, mu gihe bwari ku mpuzandengo ya 4% mu mwaka wa 2000.

Ku rundi ruhande, Amerika ni cyo gihugu gifite ubukungu bunini ku Isi, bumaze kungana na tiliyari 21$, bingana na 24%. Gusa ubu bukungu bwahoze bungana na 31% by’ubukungu bw’Isi mu mwaka wa 2000.

Ubukungu bw'u Bushinwa bwazamutseho 2% muri uyu mwaka, ni bwo bukungu bwonyine buteye imbere mu bihugu bikize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .