U Rwanda rwaje imbere muri Afurika mu gushyira mu bikorwa gahunda ziteza imbere ubuhinzi

Yanditswe na Evariste Nsengimana
Kuya 11 Gashyantare 2020 saa 09:23
Yasuwe :
0 0

Raporo nshya ya Komisiyo y’Umuryango wa Afurika Yunze Ubumwe yagaragaje ko u Rwanda rwahize ibindi bihugu bya Afurika mu gushyira mu bikorwa gahunda yo guteza imbere ubuhinzi muri Afurika(CAADP) ikubiye mu masezerano yashyiriweho umukono i Malabo mu 2014.

Iyi raporo yamurikiwe mu nama rusange y’Umuryango wa Afurika Yunze Ubumwe yabaye ku wa 10 Gashyantare 2o20 yagaragaje ko amanota y’u Rwanda yiyongereye akava kuri 6.1 rwari rufite mu 2017 akagera kuri 7.2 mu mwaka wa 2019 mu gihe inota fatizo ryari 6.6/10.

Iyi gahunda yo guteza imbere ubuhinzi muri Afurika yatangijwe mu 2003 igamije kugabanya ubukene, kongera ibiribwa no kugabanya ikigero cy’imirire mibi kuri uwo mugabane.

Mu 2014 nibwo abakuru b’ibihugu na Guverinoma z’ibihugu by’Umuryango wa Afurika Yunze Ubumwe bashyize umukono ku masezerano ateganya amahame ngenderwaho kugira ngo mu 2025 uyu mugabane uzabe wamaze kurandura inzara, kuvugurura ubucuruzi hagati y’ibihugu bigize uwo mugabane n’ibindi bigamije kuzamura uruhare rw’urwego rw’ubuhinzi mu kugabanya ubukene.

Igenzura ryakozwe bwa mbere mu 2017 naryo ryagaragaje nabwo ko u Rwanda rukomeje kwanikira ibindi bihugu binyamuryango mu gushyira mu bikorwa ibikubiye muri ayo masezerano.

Minisitiri w’Ubuhinzi n’Ubworozi, Dr. Gerardine Mukeshimana yavuze ko ishyirwa mu bikorwa ry’iyi gahunda riri mu murongo umwe n’icyerekezo cy’iterambere u Rwanda rwihaye.

Ati “Twakiriye neza uburyo u Rwanda rwitwaye nk’ikimenyetso cy’imbaraga Guverinoma ishyira mu kubahiriza ibyo umugabane wa Afurika wiyemeje no guteza imbere imibereho myiza y’Abanyarwanda binyuze mu gushyira mu bikorwa politiki zo guteza imbere ubuhinzi.”

Iki gihembo u Rwanda rugihwe ku nshuro ya kabiri nyuma y’umwaka umwe rutangije gahunda ya Kane y’impinduramatwara mu buhinzi (PSTA4) iteganyijwemo kongera umusaruro w’ubuhinzi n’ubworozi no kongerera agaciro ibibukomokaho, guhanga imirimo mishya no kongera ibibukomokaho byoherezwa mu mahanga.

Imibare yo mu Ugushyingo 2019 igaragaza ko u Rwanda rukomeje gutera intambwe ishimishije muri gahunda zo kwihaza mu biribwa kuko mu 2018 abanyarwanda bari bihagije mu biribwa bari 81.3% naho 18.7% bangana n’ibihumbi 467 aribo bafite ikibazi cy’ibiribwa bidahagije.

Minisitiri w'ububanyi n'amahanga, Dr Vincent Biruta niwe washyikirijwe iki gihembo i Addis Abeba muri Ethiopia
U Rwanda rwaje imbere muri Afurika mu gushyira mu bikorwa gahunda ziteza imbere ubuhinzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza