U Rwanda ruri gushakisha uko coltan rufite yarushaho kubyara inyungu

Yanditswe na Evariste Nsengimana
Kuya 15 Ukwakira 2018 saa 04:00
Yasuwe :
0 0

Abacuruza n’abakora ubucukuzi bw’amabuye y’agaciro ya Coltan mu Rwanda, bari gushakirwa uburyo yarushaho kubahindurira ubuzima, ikanazamura n’ubukungu bw’igihugu.

U Rwanda ni kimwe mu bihugu bitanga umusaruro mwinshi ku isoko rya Coltan, aho rucukura 60% by’umusaruro wayo wose ku Isi.

Hagati ya Nyakanga 2017 na Kamena 2018 rwagurishije mu mahanga toni zirenga 2000.

Kuri uyu wa 15 Ukwakira, i Kigali hatangijwe inteko rusange ya 59 yiga kuri coltan, yateguwe n’umuryango mpuzamahanga uhuza ibihugu biyicukura.

Igamije kwiga ku buryo bwo kuyongerera agaciro mu kuyifashisha mu bikoresho by’ikoranabuhanga, kuganira ku mbogamizi mu kuyicuruza, amabwiriza agamije kwirinda ibibazo bituruka mu icukurwa n’icuruzwa ryayo n’ibindi.

Minisitiri w’Ibikorwa Remezo, Amb. Gatete Claver, yavuze ko mu Rwanda yacukurwaga mu buryo bwa gakondo, ntigirire akamaro abaturage ariko ubu biri gushakirwa umuti.

Ati “Igifite akamaro ni uburyo ibabyarira inyungu. Wasangaga abacukura babaha amafaranga, ugasanga ntabafashije mu gihe kirekire. Icyo dushaka ni uburyo bwatuma babone amafaranga igihe kirekire.”

Mu byo iyo nama yiga harimo kunareba inzira icukurwamo, ibikoresho bikoreshwa, uko inganda zijyaho, uko igera aho igomba kujya n’ibindi.

Guverinoma yashyizeho gahunda zizamura urwego rw’ubucukuzi bw’amabuye y’agaciro harimo gushyiraho urwego rushinzwe gukurikirana ubucukuzi (RMB), inganda ziyongerera agaciro, gushyira abayacukura mu mashyirahamwe n’ibindi bigamije kuzamura n’abayacukura.

Umuyobozi wa RMB, Francis Gatare, yavuze ko ‘Bashaka gushyiraho uburyo bw’ishoramari burambye mu gucukura Coltan, igacukurwa mu buryo bwujuje ibyangombwa.’

Ibyo birimo ibibungabunga ubuzima bw’abayicukura, kubungabunga ibidukikije, uburyo umusaruro utunganywa n’ibindi.

Ati “Dushaka ngo habeho ubufatanye mu gutunganya Coltan mu Rwanda, hashyirwaho inganda zo kuyishongesha no kuba hagera ibindi bikorwa biyiturukaho no kugira ngo abantu bose bakora uwo mwuga habeho ibiganiro by’uko byabafasha mu buzima bwabo.”

Ibyo ngo bigamije kuzamura igiciro cyayo ku muntu uyicukura no ku musaruro leta ikuramo, hagamijwe kuca amayeri atuma umusaruro utiyongera.

Umuyobozi w’ikigo mpuzamahanga gihuriyemo abacukura Coltan, John Crawley, yavuze ko Coltan nyinshi ku Isi icukurwa ku muri Afurika, bityo ko hakenewe kuvugurura uburyo bikorwamo kugira ngo ababikora bibagirire akamaro.

Coltan ikorwamo ibikoresho bitandukanye birimo iby’ikoranabuhanga nka telefoni, mudasobwa, ibikoresho by’imodoka, moteri z’indege n’ibindi bitanga ingufu.

Iyi nama yahuje abantu bakora ibikorwa bifite aho bihuriye n'ubucukuzi bw'amabuye y'agaciro ku Isi
Minisitiri wa Mininfra, Amb. Gatete Claver, Umuyobozi w'ikigo mpuzamahanga gihuza abacukura coltan, John Crawley n'Umuyobozi w'ihuriro ry'abacukura amabuye y'agaciro mu Rwanda, Kalima Jean Malick
Umuyobozi w’Ikigo mpuzamahanga gihuriyemo abacukura coltan, John Crawley, yavuze ko Coltan nyinshi ku Isi icukurwa ku muri Afurika, bityo ko hakenewe kuvugurura uburyo bikorwamo kugira ngo ababikora bibabyarire inyungu
Umuyobozi Mukuru wa RMB, Francis Gatare yavuze ko hari gushakwa uburyo abacukura coltan yabagirira akamaro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza