Karongi: Akanyamuneza k’abaganuye ku mushinga w’amashanyarazi uzacanira ingo 5800 bitarenze uku Kwezi

Yanditswe na Evariste Nsengimana
Kuya 10 Gashyantare 2020 saa 10:21
Yasuwe :
0 0

Akanyamuneza ni kose ku miryango ituye mu ngo zisaga 600 zimaze kuganura ku mushinga w’amashanyarazi uzacanira izigera ku 5811 zo mu Mirenge ya Mubuga, Gishyita, Rwankuba na Gitesi mu Karere ka Karongi, bitarenze uku kwezi kwa Gashyantare, zigaca ukubiri no kuba mu kizima ndetse zigatangira kwiteza imbere zibikesha ibyiza by’amashanyarazi.

Umuyobozi w’Ishami rya Sosiyete y’u Rwanda ishinzwe ingufu(REG) mu Karere ka Karongi, Dusengimana Damien, yabwiye IGIHE ko uyu mushinga wo kugeza amashanyarazi kuri izo ngo watangijwe muri Nyakanga 2019.

Ati “REG yatangiye kugeza amashanyarazi ku batuye muri iyo Mirenge muri Nyakanga 2019, turateganya ko tuzarangiza mu mpera z’ukwa Kabiri [Gashyantare 2020]. Umushinga uteganya gucanira ingo 5811 muri iyo Mirenge, ariko izimaze gucanirwa ni 600 ariko turimo gushyiramo imbaraga kugira ngo kuzarangire bose bayagejejweho.”

Ubwo IGIHE yasuraga bamwe mu bamaze kuganura kuri aya mashanyarazi bo mu bice bitandukanye muri iyi Mirenge, bavuze ko bishimira intambwe bateye kuko bayitezeho byinshi nyuma y’imyaka myinshi bamaze mu icuraburindi.

Umunyamabanga Nshingwabikorwa w’Umurenge wa Mubuga, Ntakirutimana Gaspard, yavuze ko muri rusange umuriro w’amashanyarazi ari igikorwa remezo cyari gikenewe cyane kuko wageraga mu kagari kamwe gusa muri Tune tugize uwo Murenge.

Ati “Umuriro w’amashanyarazi urimo kudufasha mu bikorwa bitandukanye by’amashuri, hoteli, ibigo nderabuzima, insengero no mu duce tw’ubucuruzi dutandukanye twahoraga mu bwigunge. Hagenda hagaragara impinduka kuko ugerayo ugasanga batangiye kuhashyira inzu zo kogosheramo n’ibikorwa by’ubucuruzi bikiyongera kandi amasaha yo gukora ukabona ko yiyongereye.”

Akazi gashya

Aya mashanyarazi yafunguye amarembo ku bashoramari batangiza inganda ndetse zinafasha abaturage kubona akazi n’amafaranga abafasha kwivana mu bukene.

Umuyobozi w’uruganda ruconga amabuye ruheruka gushyirwa mu Murenge wa Mubuga, Bizimungu Jean Bosco, yagize ati “Hatari amashanyarazi ntabwo byari gukunda kuko imashini ziconga amabuye nta zindi ngufu zazikoresha, ariko ubu urabona ko dukora neza nta kibazo, n’abaturage badukorera bakabasha kubona amafaranga abafasha gukemura ibibazo by’umuryango.”

Yasobanuye ko uyu munsi rufite abakozi batandatu bahoraho, aho uhembwa macye ari 2500 Frw ku munsi ariko intego ikaba ari iyo kwagura ibikorwa byarwo rukabasha guha akazi abaturage benshi nabo bakabasha kwivana mu bukene.

Iyi Mirenge ni imwe mu bice by’icyaro bigize aka Karere ku buryo kubona amashanyarazi usanga babyishimiye bitewe n’imyaka bamaze batarabona.

Umuyobozi w’Umudugudu wa Gisunzu, Akagari ka Murangara mu Murenge wa Mubuga, Musenkora Jean, yagize ati “Uyu muriro uje tuwukeneye mu by’ukuri kuko dufite ibikorwa byinshi bikenera umuriro w’amashanyarazi birimo nk’inganda zitunganya ikawa zikoreshwa n’umuriro w’amashanyarazi.”

Yavuze ko mbere y’uko uyu muriro w’amashanyarazi uhagera wasangaga igihe cyo gusudira cyangwa kubaza bisaba kujya gukodesha moteri cyangwa bakabijyana aho umuriro wageze mbere.

Ati “Urumva ko abantu bahavunikiraga cyane. None rero ubwo dusubijwe hano izo mashini zisudira n’izibaza zigiye kugera iwacu tujye tubyikorera.”

Ngezahayo Etiènne Sadoc utuye muri ako Kagari, yavuze ko yatandukanye no kuba mu kizima.

Ati “Hari abo wasangaga bakoresha moteri n’izindi ngufu ariko nabyo birahenze. Iyo ubaze ikiguzi cy’amashanyarazi, ukabara n’ibyo ubasha gukora usanga mu by’ukuri ari ibintu bitandukanye kandi ntekereza ko impinduka zizaboneka.”

Yakomeje agira ati “Aka gace twari dufite ikibazo cy’ubwigunge, aho kugira ngo umuntu ashobore kuba yakwiyogoshesha byasabaga ko umuntu ajya ku Mubuga, agakora urugendo rw’ibirometero bitanu ariko aho umuriro uziye ku dusanteri abantu biteguye kuhashyira inzu zo kogosheramo bagafasha abaturage bagorwaga no gukora urugendo rurerure.”

Ngezahayo yavuze ko yari afite inzu icapa impapuro ikanazifotorera ku Mubuga ariko ko agiye kuyimurira aho atuye kugira ngo abashe gufasha abaturage batuye mu gace aherereyemo.

Ati “Imashini zisya twazisangaga aho ku Mubuga ariko kugeza ubu tugiye kugura izo tuzajya twifashisha hano dutuye, nkaba numva ndi umwe mu biteguye kuyigura kuko abantu benshi hano bakenera gusesha.”

Amatorero arabyinira ku rukoma

Iyi Mirenge iheruka guhabwa amashanyarazi ni imwe mu ifite abakiristu batari bacye ariko mbere y’uko bayahabwa barushywaga n’uburyo bwo guhimbaza Imana kubera kubura uko bacuranga.

Umushumba w’Itorero ry’Abadivantiste b’Umunsi wa karindwi, Intara ya Murangara, rikorera mu Murenge wa Mubuga, Pasteri Hakizimana Evariste, yagize ati “Ibwirizabutumwa ry’iki gihe ryari rifite ikibazo gikomeye kubera kubura amashanyarazi. Mu matorero umunani dufite mu Mirenge ya Mubuga na Gishyita, abiri gusa niyo yari afite amashanyarazi, akabasha gukora ibwirizabutumwa biyoroheye, abantu bakaririmba, bakarangurura amajwi, bakabasha gukorera amavuna[amasengesho] hanze biboroheye.”

Uyu mushumba yahishuye ko andi matorero atarahabwa amasharazi yagorwaga no guhimbaza Imana bituma akoresha moteri zikenera gukoreshwa na mazutu usanga zihenze, zikangiza n’ikirere.

Ati “By’umwihariko kuri iri torero uyu ni umwaka wa gatatu ntangiye ariko muri iyi nzu mbamo ntihabuze nka moteri umunani zihabitse zitagikora kubera kwangirika, byumvikane ko uyu muriro uje mu gihe wari ukenewe.”

Si ibyo gusa kuko nk’umuyobozi w’Itorero ngo hari byinshi akora bisaba kwifashisha ikoranabuhanga nko gukoresha ibyuma bisakaza amashusho n’ibindi bifasha umurimo w’iyogezabutumwa cyangwa ugasanga bagenzi be bamubuze kubera nta muriro afite.

Ati “Ubu ibintu bigiye kugenda neza nyuma y’uko duhawe amashanyarazi.”

Ku munsi w’amateraniro rishobora gukoresha mazutu ya 6000Frw mu gihe umuriro w’amashanyarazu utarenga 1000 Frw.

Iri torero ubu rifite n’inyubako nshya ririmo kubaka ariko kubera kubura uburyo bwo guteranya[gusudira] ibyuma kubera nta mashanyarazi byatumye igice kimwe cyayo gisenywa n’imvura. Gusa ngo mu gihe gito bamaze bahawe amashanyarazi hari icyizere ko imirimo igiye kwihuta rukubakwa mu gihe gito cyane.

Ibyishimo kwa muganga

Umuyobozi wungirije w’Ikigo Nderabuzima cya Karora cyo mu Murenge wa Mubuga, Habumugisha Edson, yavuze ko kuba nta mashanyarazi icyo kigo cyagiraga byatumaga hari imirimo imwe n’imwe idindira ariko bikaba bigiye kuba amateka.

Ati “Mu bihe byashize twakoraga mu buryo bugoye kuko wasangaga bitugora kubera gukoresha moteri nibura mu kwezi inywa nibura litiro 300 za mazutu. Ubwo urumva ko yari amafaranga menshi ku buryo nta gushidikanya ko ibyo twatanga tutarabona amashanyarazi bigiye kugabanuka.”

Hoteli zaciye ukubiri no gukoresha mazutu

Aka Karere ni kamwe mu dukunze gusurwa n’abakerarugendo batandukanye. Ibyo bituma kanaza mu dufite hoteli zikomeye, zinafite ibikorwa bitandukanye bikenera umuriro w’amashanyarazi kugira ngo zikomeze gufata neza abazigana.

Umuyobozi wa Hoteli Kivu Lodge iherereye mu nkengero z’ikiyaga cya Kivu mu Murenge wa Gishyita, Murebwayire Venie, yagize ati “Mbere y’uko amashanyarazi aza mu bigaragara twari dufite ubuzima butari bwiza kuko twakoreshaga moteri, ugasanga hari ibintu bishobora kwangirikira muri Firigo kubera ko itari gukomeza gukora igihe cyose kubera mazutu ihenze ariko ubu turimo gukora neza kubera ko umuriro w’amashanyarazi waje.”

Iyi hoteli igaragaza ko mu ijoro rimwe yashoboraga gukoresha mazutu y’ibihumbi birenga 200 Frw ariko aho amashanyarazi ahagereye ikaba ikoresha umuriro w’amashanyarazi w’ibihumbi bitatu.

Ishami rya REG mu Karere ka Karongi rigaragaza ko abaturage bafite amashanyarazi muri rusange ari 35% barimo 25% bakoresha afatiye ku muyoboro mugari naho 10% akaba atangwa n’izindi ngufu.

Abaturage barabyinira ku rukoma
Bimwe mu bikorwa byifashisha amashanyarazi mu Murenge wa Mubuga
Amavuriro ni kimwe mu bikorwa remezo byahawe amashanyazi
Amashuri yishimiye guhabwa umuriro w'amashanyarazi
Hoteli Kivu Lodge iherereye mu nkengero z’ikiyaga cya Kivu mu Murenge wa Gishyita ni imwe mu bikorwa byahawe amashanyazi
Igice cy'urusengero ruri kubaakwa cyaraguye kubera kubura ibikoresho byo gusudira
Inganda za kawa zabonye amashanyarazi zikoresha
Umuyobozi wungirije w’Ikigo Nderabuzima cya Karora cyo mu Murenge wa Mubuga, Habumugisha Edson, yavuze ko kuba nta mashanyarazi icyo kigo cyagiraga byatumaga hari imirimo imwe n’imwe idindira
Ngezahayo Etiènne Sadoc utuye muri ako Kagari, yavuze ko yatandukanye no kuba mu kizima
Rimwe mu mashuri yahawe amashanyazi
Umunyamabanga Nshingwabikorwa w’Umurenge wa Mubuga, Ntakirutimana Gaspard yavuze ko aya mashanyarazi yaje ari igisubizo
Umurenge wa Mubuga ni umwe mu yahawe amashanyarazi muri uyu mushinga
Umushumba w’Itorero ry’Abadivantiste b’Umunsi wa karindwi, Intara ya Murangara, rikorera mu Murenge wa Mubuga, Pasteri Hakizimana Evariste yavuze ko amatorero yasubijwe
Umuyobozi w’Umudugudu wa Gisunzu, Akagari ka Murangara mu Murenge wa Mubuga, Musenkora Jean yasobanuye ko bari banyotewe kubona amashanyarazi
Umuyobozi w’uruganda ruconga amabuye ruheruka gushyirwa mu Murenge wa Mubuga, Bizimungu Jean Bosco yavuze ko amashanyarazi yabafashije gushinga uruganda
Umuyobozi wa Hoteli Kivu Lodge iherereye mu nkengero z’ikiyaga cya Kivu mu Murenge wa Gishyita, Murebwayire Venie yavuze ko baruhutse gukoresha moteri
Uru ruganda rutangijwe nyuma y'uko amashanyarazi ahagejejwe
Uruganda rutunganya amabuye rwashinzwe mu Murenge wa Mubuga nyuma y'uko amashanyarazi ahagejejwe
Uyu Murenge ni umwe mu itarageragamo amashanyarazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza