00:00:00 IGIHE NETWORK KN KINYARWANDA EN ENGLISH FR FRANCAIS

Umwihariko wa JurisTax Rwanda Ltd, Sosiyete ifasha imishinga gukomera no kwinjiza agatubutse

Yanditswe na Dufitumukiza Salathiel
Kuya 20 Ukwakira 2021 saa 05:43
Yasuwe :
0 0

JurisTax Rwanda Ltd ni Sosiyete ishyigikira imishinga cyangwa ibindi bigo ku buryo bibasha gukomera binyuze mu kubifasha kubaka imiyoborere yabyo no kubiha ubujyanama buhamye.

Ifite inararibonye mu gufata neza abakiliya kandi ikagira uburyo ifashamo imishinga gukura binyuze muri serivisi zitandukanye, uhereye ku gukusanya amakuru kugeza ku bujyanama bwayifasha kwiyubaka neza ikabona inyungu u Rwanda rutanga zo kugabanyirizwa imisoro.

Umuyobozi Mukuru wa JurisTax Rwanda Ltd, Murorukwere N. Lydie, yabwiye IGIHE ati “Tunatanga ubujyanama mu by’amategeko, icungamutungo, imisoro n’uburyo bwo gukora hubahirizwa amategeko n’amabwiriza.”

Gukorana n’umufatanyabikorwa wizewe, gufata imyanzuro hashingiwe ku makuru afatika ndetse no kumenya uko ufata abo mufatanyije umushinga n’abakiliya mu buryo buboneye biri mu bikwiye kwitabwaho cyane, mu gihe ushaka ko urwego umushinga wawe uriho ruzamuka bityo ukabasha kwinjiza agatubutse.

Ni indi mpamvu ikwiye gutuma abashoramari batajijinganya ku kuba bashora imari yabo i Rwanda cyane ko hasanzwe ukoroherezwa n’umutekano bihagira ahantu heza ho gukorera imishinga.

Magingo aya u Rwanda ruri mu bihugu bya Afurika bifite ubukungu buri kuzamuka cyane aho umuvuduko warwo ushyirwa ku mpuzandengo ya 8,6% mu myaka 10 ishize; rukaba rushaka guhinduka igicumbi cy’ishoramari ku mugabane.

Ruza ku mwanya wa kabiri muri Afurika yo Munsi y’Ubutayu bwa Sahara mu korohereza ishoramari no kubahiriza amategeko; rukaba urwa nyuma mu kurangwamo ruswa, ruratekanye ndetse ruza mu bihugu by’imbere bifite ikoranabuhanga riteye imbere ku mugabane.

Na none kandi u Rwanda rwasinyanye amasezerano n’ibihugu byinshi agamije gukuraho uburyo bwo gusoresha ibicuruzwa kabiri, mu rwego rwo kwagura imikoranire yarwo n’ibindi bihugu bya Afurika. Rwaninjiye mu maserezerano yo kurinda ishoramari ruhuriramo n’ibindi nka Leta Zunze Ubumwe za Amerika, u Bubiligi, u Budage na Koreya y’Epfo.

Mu bunararibonye imaranye igihe kirekire, JurisTax Group, yashimangiye ubushobozi bwayo nk’umufatanyabikorwa wo kwisunga kuko ikomeje kuba ku isonga mu gutanga ubujyanama mu bijyanye n’imisoro na serivisi zijyanye na yo. Yaguye imikorere yayo igera mu Rwanda ihashinga imizi n’ibiro bizagaragaza imikorere yayo mu Karere.

Kuba iherutse kuza mu Rwanda na byo hari icyo byongeye ku ntego z’igihugu zo kuba igicumbi cy’ishoramari aho serivisi hafi ya zose ku bashoramari zizaba ziboneka.

Mu 2018 ni bwo hatangijwe JurisTax Rwanda Ltd, Ishami ry’Ikigo JurisTax Group gifite Icyicaro mu Birwa bya Maurice kuva cyatangizwa mu 2008. Icyo kigo gikorera i Dubai, Seychelles, u Bushinwa, Afurika y’Epfo no mu Rwanda.

Kugera mu Rwanda kwacyo byakigize Ikigo cya mbere mu gihugu gitanga serivisi zo gufasha izindi sosiyete cyemewe na Banki Nkuru y’u Rwanda (BNR).

Ubu cyamaze no kuba umunyamuryango wa Kigali International Financial Center (KIFC), ibicyorohereza gutanga serivisi ku bakigana zirimo kubafasha mu miyoborere, imikoranire n’izindi sosiyete, icungamutungo n’ubunyamabanga.

Murorunkwere yasobanuye ko cyaguriye ibikorwa byacyo mu Rwanda kikanakorana na KIFC kugira ngo gishobore gushyigikira sosiyete zitanga serivisi zitandukanye z’ishoramari ndetse kizitere umurava wo kuhashora imari.

Uretse ibyo, iri shami ryo mu Rwanda rinashaka kubaka ubushobozi ku isoko ryaho rifatanyije n’Ikigo cya African Institute of Training & Development Ltd (AITD) gikorera muri Kigali, hatangwa amahugurwa yo ku rwego rwo hejuru hagamijwe guha Abanyarwanda ubumenyi bujyanye n’igihe kandi bukenewe kugira ngo imishinga ibashe gutera imbere ku isoko ry’u Rwanda.

Kugeza ubu JurisTax Group imaze kugira ishoramari rya miliyari 5$ n’abakiliya barenga 2.000 ku Isi yose biganje muri Leta Zunze Ubumwe za Amerika, Aziya, u Burayi na Afurika. Ishami ryayo mu Rwanda rikorana n’ibigo by’abikorera mu nzego zitandukanye.

Murorunkwere yagaragaje ko agaciro k’ishoramari kagenda kiyongera uko u Rwanda rukomeza gusonera imisoro abashoramari rubareshya ku Isi yose, binyuze muri KIFC.

Ati “JurisTax Group irashaka gukoresha u Rwanda nk’umuyoboro wo gukurura abashoramari batandukanye kuri uyu Mugabane nyuma y’Ibirwa bya Maurice. Turashaka kugira u Rwanda amarembo y’abashoramari b’abanyamahanga baturutse mu Burayi na Aziya n’ahandi bashaka kwinjira ku isoko rya Afurika.”

Nyuma y’intambwe ya mbere ku bashoramari yo kwandikisha umushinga mu Rwego rw’Igihugu rw’Iterambere (RDB), JurisTax Rwanda Ltd, ihita itangira gutanga ubufasha burimo gushakira uwo mushinga ibyemezo bitandukanye birimo icya Minisiteri y’Ubucuruzi n’Inganda, icya BNR n’ibindi.

Yakomeje agira ati “Tugerageza gukorana n’abo bashoramari ngo twumve imiterere y’aho bagiye gukorera imishinga kuko bisaba igihe runaka iyo utahamenyereye.”

“JurisTax Rwanda ntigerageza gukorana n’imishinga mu bijyanye n’inzego zigenzura gusa, ahubwo inagenzura ko sosiyete igiye gutangira gukorera ku isoko ryo mu gihugu yubahirije ibirebana n’imisoro, n’andi mategeko. Dukeneye kwitwararika, tukagenzurana ubushishozi ko abashoramari bashya bazanywe n’impamvu nziza ndetse tukabafasha guteza imbere uburyo bugabanya ibyago ku mishinga.”

Murorunkwere yahishuye ko JurisTax Rwanda Ltd ishaka kuba Ikigo cya mbere cyizewe mu Karere gifasha ibigo, imishinga na sosiyete zitandukanye gukomera. Haratekerezwa kandi ku buryo yatangira gukorera no mu bindi bihugu by’abaturanyi muri Afurika y’Iburasirazuba.

Ati “Twatangiye imikoranire n’izindi sosiyete muri aka Karere ku buryo twafasha abashoramari bashaka kuhagurira imishinga. Intambwe ku yindi tuzagenda twagura aho ibikorwa byacu bigera muri Afurika, ariko ibikorwa nyamukuru kugeza ubu biribanda mu Rwanda.”

JurisTax Rwanda Ltd ntifasha sosiyete gusa ahubwo ifasha n’abantu ku giti cyabo bakora ishoramari ritandukanye binyuze mu kubafasha kubyaza umusaruro amahirwe ari ku isoko mu gihugu no kongera inyungu babonera koroherezwa baba bahabwa.

Umuyobozi Mukuru wa JurisTax Rwanda Ltd, Murorunkwere N. Lydie, yavuze ko batanga ubujyanama mu by’amategeko, icungamutungo, imisoro n’uburyo bwo gukora hubahirizwa amategeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .