Ishusho yagutse y’ingaruka za Covid-19 ku bukungu bw’Isi

Yanditswe na Iradukunda Serge
Kuya 10 Kanama 2020 saa 05:37
Yasuwe :
0 0

Hagiye gushira amezi hafi 10 icyorezo cya Covid-19 kigeze ku Isi, uretse guhitana umubare w’abantu utagira ingano, iki cyorezo cyazahaje bikomeye ubukungu n’ubucuruzi ku Isi ku kigero abasesenguzi bagereranya n’ibyigeze kuba nyuma y’intambara y’Isi ya kabiri.

Kuva covid-19 yatangira kugaragara mu Bushinwa mu mpera za 2019, ubukungu bwatangiye guhungabana ariko birushaho kuba bibi mu ntangiriro za 2020 ubwo iki cyorezo cyari kimaze gukwira mu bihugu hafi ya byose ku Isi.

Guhungaba k’ubukungu bw’Isi ahanini kwagiye guturuka mu ngamba ibihugu byagiye bishyiraho mu gukumira iki cyorezo zirimo; gufunga ibikorwa by’ubucuruzi, guhagarika ingendo z’imodoka n’indege no kugabanya umubare w’abakozi ibigo runaka bikoresha abandi bagakorera mu rugo.

Kubera izi mpinduka zagiye zibaho mu buryo busanzwe abantu bakoragamo ibintu ubukungu bw’Isi bwatangiye gusubira hasi, ibigo bigabanya abakozi kubera ibihombo n’igabanuka ry’abakiliya.

Muri Kamena Banki y’isi yavugaga ko icyorezo cya Covid-19 kizasiga ubukungu bw’Isi uyu mwaka bugabanutseho 5.2%, ikigero cy’igabanuka cyaherukaga kubaho nyuma y’intambara ya Kabiri y’Isi.

Iri gabanuka rizajyana kandi n’igabanuka ry’ibikorwa by’ubukungu mu bihugu biteye imbere ku kigero cya 7%, mu gihe mu bihugu bikiri mu nzira y’amajyambere ho ibi bikorwa bizagabanuka ku kigero cya 2.5%.

Uretse ubukungu bw’Isi n’amafaranga umuntu yinjiza ku giti cye Banki y’Isi ivuga ko azagabanuka ku kigero cya 3.6, ibintu bizatuma abagera kuri miliyoni 150 bisanga mu bukene bukabije bikaba intandaro y’uko ubukene buzazamuka ku kigero cya 24%.

Umubare munini w’aba baturage miliyoni 150 bazisanga mu bukene kubera Covid-19 abenshi bazaba biganje muri Afurika yo munsi y’ubutayu bwa Sahara no muri Aziya y’Amajyepfo.

Iki gihe Banki y’Isi yagaragaje kandi uko ikigero ubukungu bwazamukagaho mu bice bitandukanye by’Isi kizagenda kigabanuka.

Ikigero cy’izamuka ry’ubukungu mu bihugu byo mu Burasirazuba bwa Aziya na Pasifika buzagabanukaho 0.5%, mu bihugu nka Malaysia iri zamuka rizamanuka ku kigero cya 3.1% mu gihe Philippines yo rizamanuka ku kigero cya 1.9% naho Thailand yo rikamanuka ku kigero cya 5%.

Mu burasirazuba bwo hagati bubarizwamo ibihugu nka Israel, Turkey, Cyprus, Syria, Lebanon, Iraq na Iran na Afurika y’amajyaruguru ho ubukungu buzagabanuka ku kigero cya 4.2%.

Muri Aziya y’Amajyepfo ho ubukungu buzagabanuka ku kigero cya 2.7%, nk’aho ibirwa bya Maldives ubukungu bwabyo buzagabanukaho 13%, iri hungabana ry’ubukungu kandi rizagera muri Afurika yo munsi y’ubutayu bwa Sahara, aho buzagabanuka ku kigero cya 2.8%.

Kuba ingaruka za Covid-19 ku bukungu bw’Isi ziremereye ni ibintu biherutse kugarukwaho n’Umunyamabanga w’Umuryango w’Abibumbye António Guterres mu ijambo yagejeje ku batuye Isi muri Nyakanga.

Guterres yavuze ko ingaruka zatejwe n’iki cyorezo zishobora kwiyongera mu gihe abatuye Isi batagira icyo bakora mu buryo bwihuse.

Yagize ati “Icyorezo cya Covid-19, n’ihungabana cyateje mu buryo bugaragara biri guteza imibereho mibi mu bantu hirya no hino ku Isi. Tutagize icyo dukora ubu dushobora guhura n’ihungabana n’idindira ry’ubukungu bishobora kumara imyaka n’imyaka… ubukene bukabije n’inzara biziyongera, inzego z’ubuzima mu bihugu byinshi zo zatangiye kugera aharindimuka ndetse n’abana benshi babaye bahagaritse amasomo yabo”.

N’ubwo hari gukorwa byinshi kugira ngo ibihugu bigerageze kuziba ibi byuho, impuguke mu bukungu zigaragaza ko bizafata imyaka kugira ngo Isi yongere isubire ku kigero cy’iterambere yari iriho dore ko Ishyirahamwe ry’Ibigo bikora ingendo zo mu Kirere (IATA) riherutse gutangaza ko bizaritwara indi indi myaka ine, kugera mu 2024, kugira ngo muri uru rwego ibintu bisubire uko byahoze.

Banki y'Isi yagaragaje ko 2020 izarangira ubukungu bw'Isi busubiye inyuma ku kigero cya 5.2%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .