Ubushakashatsi bwagaragaje ko hafi miliyoni y’abanyarwanda bugarijwe n’inzara bitewe n’imvura nke yateye umusaruro muke mu gihe cy’ihinga gishize bigatuma ibiciro ry’ibiribwa bizamuka ku isoko.

Ubu bushakashatsi bwakozwe n’ikigo cy’Abanyamerika gishinzwe kuburira abenda guhura n’amapfa FEWSNET bwerekana ko bitewe n’umusaruro wabaye muke muri uyu mwaka kubera imvura nke abanyarwanda barenga 750,000 bazahura n’ibura ry’ibiribwa guhera mu mezi abiri ari imbere.

Nkuko bigaragara muri iyi nyigo, umusaruro wo muri iki gihe cy’ihinga ushobora kuzaba hagati ya 25% na 50 % munsi y’ikigero gisanzwe bitewe n’ibura ry’imvura; ibi bishobora gutuma n’ubutaka buhingwa bugabanuka mu bihe biri imbere.

Iki cyegeranyo kivuga ko nubwo ibiciro by’ibiribwa bishobora kuzamuka kuko umusaruro wabonetse utazahaza ibikenewe ku isoko.

Impuguke zagaragaje ko uduce twitezweho kwibasirwa n’amapfa ari Intara y’u Burasirazuba, agace ka Bugesera gahingwamo imyumbati n’ ahagiye hagaragara indwara z’ibimera.

Muri iki gihe ibiribwa byari byiyongeye ku isoko kubera ibishyimbo n’amasaka byasaruwe mu Burasirazuba n’Amajyaruguru .Ibindi biribwa byagaragaraga ku isoko ni ibitoki, imyumbati n’ibijumba.

Mu kwezi kwa Gicurasi 2014 ibiciro byagiye bihindagurika, ariko ifu y’imyumbati yaguzwe ku giciro kidahindagurika cyane muri iyi myaka ibiri ishize. Igiciro by’ibishyimbo cyazamutse ku masoko nka Kayenzi mu Karere ka Kamonyi, Bugarama mu Karere ka Rusizu, n’ahandi mu ntara ariko bimanuka mu isoko rya Kimironko mu Mujyi wa Kigali.

Ikiranguzo cy’ibigori cyazamutseho hagati ya 8% na 19% mu isoko rya Rwagitima , Kayenzi, Bugarama na Kimironkon’ahandi mu turere hagati yo muri Mata na Gicurasi 2014.

Minisitiri w’Ubuhinzi , Dr Agnes Kalibata avuga ko nta kibazo gikomeye cy’inzara kizabaho mu minsi iri imbere kuko ibiribwa biriho ubu bizuzuzwa n’ibyo mu gihe cy’ihinga kigiye kuza.

Yagize ati" Ni byo koko umusaruro waragabanutse ariko nta kibazo kinini bizatera kuko turi gufasha abahinzi guhinga mu bishanga tukanabaha imbuto zo guhinga mu gihe ntazo bafite".

Kalibata yemeza ko ubu bushakashatsi bukabiriza umubare w’abantu batihaza mu biribwa kuko ngo nubwo umusaruro wagabanutse bidakabije cyane. Yavuze ko nta mpungenge abaturage bakwiye kugira kuko guverinoma yahunitse imyaka yagoboka mu gihe inzara ikabije.

[email protected]