00:00:00 IGIHE NETWORK KN KINYARWANDA EN ENGLISH FR FRANCAIS

Imbuto irakosha: Intandaro yo guhenda kw’ibirayi ku isoko

Yanditswe na Ndikumwenayo Thierry
Kuya 17 Ugushyingo 2022 saa 03:59
Yasuwe :

Akarere ka Musanze gafatwa nk’ikigega cy’igihugu ku gihingwa cy’ibirayi. Uwagendereraga aka karere avuye mu bindi bice nk’Umujyi wa Kigali, yifuzaga gusubiranayo ibirayi kuko byabaga bihendutse; gusa uyu munsi si ko biri.

Ntawe utaratunguwe no kuba ikiro cy’ibirayi cyarageze ku mafaranga 500 Frw muri aka karere.

Abahinzi batangaza ko inkomoko y’uku guhenda kw’ibirayi harimo no kubura ndetse no guhenda kw’imbuto. Barasaba ko hagira igikorwa kugira ngo izi mbuto ziboneke zitabahenze kandi zinagere ku bahinzi bato kuko nabo bagira uruhare mu musaruro ujya ku isoko.

Kamondo Donatha ni umuhinzi wo mu murenge wa Cyuve, yabwiye IGIHE ko ikibazo bafite ari uko imbuto ihabwa abahinzi banini, abato bakaburizwamo, ibi bikiyongera ku guhenda kwazo binari gutuma hari abava muri ubu buhinzi.

Ati “Imbuto ziherera muri ba bandi bafite za hegitali nini ugasanga ba bandi bato zitabageraho. Turasaba ko bakwegereza imbuto abahinzi bato, nimpinga hato na mugenzi wanjye agahinga ahandi n’undi gutyo, harya ikizatuma umusaruro utagwira ni igiki?”.

Birikunzira Emmanuel avuga ko hari abatubuzi bakorana na RAB babona igiciro cy’ibirayi kizamutse bakigurishiriza imbuto nk’ibirayi byo kurya aho kuzibikira ihinga, ibi nabyo bigira uruhare mu kubura ndetse no guhenda kwazo.

Akomeza avuga ko kuba imbuto n’ibindi nkenerwa muri ubu buhinzi nk’ifumbire n’imiti biri hejuru, hatagize igikorwa igihingwa cy’ibirayi cyazakomeza guhenda.

Mu gutangiza icyumweru cyahariwe igihingwa cy’ibirayi, Minisiteri y’ubuhinzi n’ubworozi yavuze ko umusaruro muke w’ibirayi wagiye ukomoka ku mbuto zidafite ubuziranenge.

Iyi Minisiteri yatangaje ko ikibazo cy’ibura ry’imbuto nziza kiri mu nzira zo gukemuka, gusa isaba abaturage guhindura imyumvire bagakora ubu buhinzi nk’akazi.

Umunyamabanga wa Leta muri Minisiteri y’ubuhinzi n’ubworozi Dr. Musafiri Ildephonse yagize ati “Guhenda kw’ibirayi ntitwavuga ko byatewe n’ibura ry’imbuto, keretse wenda tuvuze imbuto nziza. Turizera ko mu myaka ibiri, itatu ikibazo cy’imbuto nziza kizaba cyarakemutse ku isoko. Imbuto igomba kuba ihenze bitewe n’inzira inyuramo, iyo ije igura 800Frw abahinzi ntibarumva neza ko iyo uhinze neza aya mafaranga uyunguka.”

Akomeza avuga ko kwihaza ku gihingwa cy’ibirayi bishoboka binyuze mu guhinga imbuto zizewe aho bizanagabanya igiciro cy’ibirayi kiri hejuru, gusa abahinzi bakwiriye kubikora nk’ubucuruzi.

U Rwanda rumaze imyaka ibiri rukoresha imbuto z’ibirayi zituburirwa imbere mu gihugu. Kuri ubu hakaba hari inzu zigera kuri 30 zituburirwamo.

Icyumweru cyahariwe ibirayi cyatangiye kuwa 15 Ugushyingo kizasozwa kuwa 18 Ugushingo. Mu bikorwa byagaragajwe harimo ubutubuzi bw’imbuto bukoresha ikoranabuhanga nk’ikigo SPF/Ikigega, gifite inzu izajya ituburirwamo ibirayi byikubye inshuro zirenga ebyiri ibyari bisanzwe bituburirwa mu Rwanda.

Iyi nzu itaramara umwaka yatangiye gutuburirwamo ubwoko icyenda bw’imbuto z’ibirayi zirimo Kinigi, kirundo, Cruzza, kazeneza, Gisubizo, Gikungu, Cyerekezo, Ndamira na Nkunganire. Izi mbuto zigura hagati y’amafaranga 810Frw kugeza kuri 1000Frw.

Cruzza niyo ishobora kwera ibirayi byinshi; igihe yahinzwe neza ishobora kuva kuri toni 20 kugera kuri toni 25 kuri hegitari imwe, mu gihe Kinigi iba iri hagati ya toni 15 na toni 20 kuri hegitari imwe.

Abahinzi b'ibirayi n'abarebwa nabyo bitabiriye itangizwa ry'iki cyumweru
Dr Musafiri asobanura ko mu myaka itatu iri imbere nta kibazo cy'imbuto nziza kizaba kikigaragara
Inzu ituburirwamo ibirayi hifashishijwe ikoranabuhanga, ni igisubizo ku bahinzi b'ibirayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .