I&M Bank Rwanda yashimiwe guteza imbere uburezi bw’abana b’incuke

Yanditswe na Prudence Kwizera
Kuya 3 Kanama 2018 saa 08:18
Yasuwe :
1 0

I&M Bank Rwanda yashimwe n’abaturage bo mu Murenge wa Kigoma mu Karere ka Huye ku nkunga yabateye mu kubaka irerero ry’incuke, kugira ngo abana babo bajye batangira kwiga hakiri kare bahabwe uburere n’uburezi.

Byavugiwe mu gikorwa cyo gutaha ku mugaragaro irerero ry’incuke ryubatswe mu Kagari ka Kabuga kuri uyu wa Kane tariki ya 2 Kanama 2018; kuri ubu ryigamo abana bagera kuri 33 kandi hari n’abandi baryizemo mu myaka ibiri ishize bakomereje mu mashuri abanza.

Ryubatswe muri gahunda y’umushinga w’imyaka itanu witwa USAID TWIYUBAKE usanzwe uterwa inkunga na USAID/PEPFAR ugamije gushyigikira abaturage mu mibereho myiza n’iterambere.

Uwo mushinga ukorera mu turere 12 tw’u Rwanda ugamije kongerera ubushobozi imirango ibihumbi 50 itishoboye igizwe n’abana, urubyiruko n’abakuru bose bagera ku bihumbi 250.

Bafashwa mu bukungu, kuzamura serivisi z’ubuvuzi no kubongerera ubumenyi ku kurera no gukurikirana imibereho y’abana bato.

Muri iyo gahunda I&M Bank Rwanda yashyizemo amafaranga y’inkunga mu gutunganya no gusana irerero ry’incuke.

Umunyamabanga Nshingwabikorwa wa Duhamic Adri mu Rwanda, Benineza Innocent, yavuze ko I&M Bank Rwanda yatanze umusanzu ukomeye mu guteza imbere uburere n’uburezi bw’abana bato kandi ari igikorwa cy’ingirakamaro.

Yagize ati “I&M Bank yakoze igikorwa cyiza twashimye cyo gusana no kuvugurura iri rerero ry’abana, ryari ritameze neza bararisana; bubatse n’igikoni n’ubwiherero. Batanze inkunga y’amafaranga bayanyujije muri Global Communities kugira ngo iri rerero ryubakwe ritunganywe neza”.

Bamwe mu babyeyi bo mu Murenge wa Kigoma bafite abana biga muri iryo rerero bavuga ko abana basigaye batangira kwiga hakiri kare kandi batakigira impungenge ko bajya kwiga kure, bambutse umugezi ushobora no kubateza impanuka.

Nakure Beatha wo mu Kagari ka Kabuga yagize ati “Mbere abana bacu batangiraga ari bakuru bafite imyaka irindwi kuko bambukaga umugezi bagiye kwiga ku kigo cy’i Musebeya bakagenda nk’isaha yose. Kuri ubu biga hafi kandi batangira bafite imyaka ine cyangwa itanu. Bambukaga umugezi ku buryo niyo wabaga wagiye mu kiraka imvura ikagwa wagiraga impungenge ngo umugezi urabatwara, ugata ikiraka ukirukanka ujya kubareba”.

Umuyobozi muri I&M Bank Rwanda ushinzwe imirimo rusange, Umwiza Béatrice, yavuze ko basanzwe bakora ibikorwa byinshi byiza byo guteza imbere abaturage ariko icyo bakoze cyo gushyigikira abana b’incuke gifite umwihariko.

Ati “Nka banki dusanzwe dushyigikira ibikorwa byinshi birimo kubakira abatishoboye, gufasha abarokotse Jenoside, gufasha ababyeyi baba bonyine ariko noneho igishimishije ni uko twafashije abana bato b’incuke, ni abana bato ni u Rwanda rw’ejo”.

Imiryango igera kuri 559 yo mu Murenge wa Kigoma harimo n’ifite abana biga muri iryo rerero yafashijwe gushinga amatsinda yo kubitsa no kugurizanya aho kuri ubu imaze kugira ubwizigame bw’amafaranga agera kuri miliyoni icyenda.

Bafite amatsinda agera kuri 35 harimo atanu y’urubyiruko. Muri ayo matsinda bigishirizwamo n’ibindi bikotwa nko kuzamura umusaruro w’ubuhinzi ku butaka buto, gutegura indyo yuzuye, kwimakaza isuku n’ibindi bigamije imibereho myiza y’abaturage.

Umuhuzabikorwa wa I&M Bank Rwanda ushinzwe imirimo rusange, Umwiza Béatrice
Umunyamabanga Nshingwabikorwa wa Duhamic Adric mu Rwanda, Benineza Innocent, yavuze ko I&M Bank Rwanda yatanze umusanzu ukomeye mu guteza imbere uburere n’uburezi bw’abana
Irerero ry’incuke I&M Bank yateye inkunga ngo rivugururwe rinatunganywe
Igikoni batekeramo igikoma cy'abana cyubatswe ku nkunga ya I&M Bank

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza