I&M Bank Rwanda yagaragarijwe icyizere n’abanyamigabane bayo, bitabira kongera kugura indi ku kigero cya 112%,

Yanditswe na Uwimana Abraham
Kuya 31 Ukwakira 2020 saa 08:27
Yasuwe :
0 0

I&M Bank Rwanda Plc yagaragarijwe ko ifitiwe icyizere gikomeye n’abanyamigabane bayo, ubwo baguraga uburenganzira bwo kongera kuyiguramo imigabane (rights issue) yashyize ku isoko, babyitabiriye ku kigero cya 112%, mu minsi 16 gusa.

Mu rwego rwo kwagura ibikorwa ndetse no kuzuza umubare w’imari shingiro kugira ngo hubahirizwe amabwiriza ya Banki Nkuru y’Igihugu, I&M Bank Rwanda yashyize ku isoko imigabane yanagabanyirijwe igiciro, kugira ngo igurwe n’abasanzwe ari abanyamigabane bayo, ubundi huzuzwe imari shingiro hatagombye kwiyambaza abandi.

Kuri uyu wa 30 Ukwakira 2020 ubwo bafunguraga ku mugaragaro igurishwa ry’imigabane mishya ku isoko ry’Imari n’Imigabane ry’u Rwanda (RSE) ku bari basanzwe ari abanyamigabane bayo, ubuyobozi bwayo bwavuze ko bishimira uburyo bagaragarijwe icyizere gikomeye n’abafatanyabikorwa ba bo.

Umuyobozi Mukuru wa I&M Bank Rwanda Plc, Robin Bairstow, yavuze ko iyi migurishirize bagize, igaragaza icyizere gikomeye bagiriwe ndetse bikazatuma bagera imbere heza.

Ati “Dutewe umwete no kuba abanyamigabane bacu baragiriye icyizere banki ndetse n’intumbero zayo. Iyi migurishirize ihagaze neza izafasha mu mikorere yacu ya banki y’igihe kirekire, binadushyira mu mwanya mwiza wo kwinjira mu isoko rishya dushyize imbere ikoreshwa ry’ikoranabuhanga.”

Umuyobozi Mukuru Wungirije w’Urwego rw’Igihugu rw’Iterambere, RDB, Niyonkuru Zephanie, yavuze ko kuba I&M Bank iciye aka gahigo mu gihe isi yugarijwe n’icyorezo cya Coronavirus, ari ibigaragaza icyizere gikomeye ifitiwe.

Yagize ati “Mu by’ukuri turebye igihe turimo cy’ubukungu butifashe neza cyatewe na Coronavirus, hari sosiyete nyinshi zagiye zihomba n’izindi zagiye zihagarika ibikorwa, kuba babikoze mu by’ukuri bakabona umubare munini w’abaguzi ni ikigaragaza ko abashora imari bizeye ibyo banki igiye gushyiramo ariya mafaranga.”

Yongeyeho ko Leta y’u Rwanda ikomeje gukora ibishoboka byose kugira ngo yoroshye uburyo bwo gukorera ubucuruzi ku butaka bw’u Rwanda.

Ati “Leta y’u Rwanda ikomeje gukora ibishoboka byose kugira ngo duteze imbere uburyo bwo gukora ubucuruzi nk’uko mubizi mu ngamba twashyizeho. Iyo urebye aho u Rwanda ruhagaze, ni urwa kabiri mu korohereza ishoramari.”

Ku rundi ruhande Umuyobozi Mukuru w’Isoko ry’Imari n’Imigabane ry’u Rwanda (Rwanda Stock Exchange), Rwabukumba Pierre Celestin, yavuze ko uku kwitabira kugura iyi migabane bisobanuye ko abantu bafite icyizere ku isoko, by’umwihariko ko bizeye I&M Bank.

Yagize ati “Icyo bivuze ku isoko, ni icyizere ku isoko, ariko cyane cyane ni icyizere kuri banki irimo gushaka amafaranga, abantu bizeye I&M Bank nka banki yabo, ubwo rero icyo cyizere kiracyahari, isoko rirahari ritubereyeho twese, turacyakomeza kwiyubaka.”

I&M Bank Rwanda yashyize ku isoko imigabane miliyoni 202, kugira ngo ikuremo amafaranga agera kuri miliyari 80 Frw, yo kurushaho kwagura ibikorwa ndetse no kunoza imikorere, abanyamigabane basanzwe bahise bitabira birarenga bigera ku gipimo cya 112%.

Umuyobozi Mukuru wa I&M Bank yavuze ko icyo bagiye kwitaho ari ukurinda ibyagezweho, bakaguma gukora neza, by’umwihariko bibanda mu kwagura ikoreshwa ry’ikoranabuhanga mu rwego rwo korohereza abakiliya, n’ibindi birimo guhangana n’ingaruka za Covid-19.

Umuyobozi Mukuru wa I&M Bank Rwanda Plc, Robin Bairstow yavuze ko bishimiye iki cyizere bakomeje kugirirwa
Iki gikorwa cyitabiriwe n'abayobozi batandukanye mu nzego za leta n'iz'abikorera
I&M Bank Rwanda yagaragarijwe n'abanyamigabane bayo ko bayifitiye icyizere ntakuka

Amafoto: Igirubuntu Jean Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .