00:00:00 IGIHE NETWORK KN KINYARWANDA EN ENGLISH FR FRANCAIS

EU yahaye u Rwanda miliyari 72,5 Frw azifashishwa mu guteza imbere ubuhinzi

Yanditswe na Igizeneza Jean Désiré
Kuya 7 Ukwakira 2022 saa 10:10
Yasuwe :

Guverinoma y’u Rwanda yasinyanye amasezerano y’imyaka itatu n’Umuryango w’Ubumwe bw’u Burayi, EU, ajyanye n’inkunga ya miliyoni 69€ (miliyari 72,5 Frw) izafasha mu guteza imbere ubuhinzi bugezweho, budaheza butanangiza ibidukikije.

Aya masezerano yasinywe kuri uyu wa Kane tariki ya 6 Ukwakira 2022 azafasha mu guhangana n’imihindagurikire y’ikirere binyuze mu buhinzi bwifashishije ikoranabuhanga hagamijwe iterambere rirambye ry’ubuhinzi mu Rwanda.

Ni amafaranga azakoreshwa mu bice bitatu aho igice cya mbere kigizwe na miliyoni 52€ kizifashishwa mu ngengo y’imari igenerwa ubuhinzi, hibandwa mu kongera ingano y’umusaruro abahinzi binjiza.

Iki gice cy’aya mafaranga kandi kizifashishwa mu gufasha abaturage kwimakaza ubuhinzi buhangana n’imihindagurikire y’ikirere burimo gutera ibiti bivangwa n’imyaka no kurwanya isuri mu kwirinda itwarwa ry’ubutaka buhingwaho.

Igice cya kabiri kigizwe na miliyoni 10€, kizafasha mu kugoboka abahinzi b’indabo imboga n’imbuto n’abakora ubworozi bwo mu mazi binyuze mu nkunga y’Ikigo cy’Ababiligi gishinzwe Iterambere, Enabel.

Miliyoni 7€ zisigaye zo zizafasha Minisiteri y’Ubuhinzi n’Ubworozi n’iy’Ibidukikije hamwe n’ibigo bizishamikiyeho mu kugenzura no gushyira mu bikorwa uyu mushinga.

Minisitiri w’Imari n’Igenamigambi, Dr Uzziel Ndagijimana wasinye aya masezerano ku ruhande rw’u Rwanda, yavuze ko yasinywe mu gushyigikira gahunda y’u Rwanda yo kwimakaza ubuhinzi n’ubworozi bugezweho hagamijwe kongera umusaruro ubikomokaho.

Ati "Bikajyana kandi no guteza imbere imicungire irambye y’ibidukikije n’umutungo kamere na cyane ko u Rwanda ruri kwimukira mu iterambere ry’ubukungu ritangiza ibidukikije (Green Economy).”

Ku ruhande rwa EU, Ambasaderi wayo mu Rwanda Belen Calvo Uyarra, yavuze ko uyu Muryango ufitanye imikoranire y’igihe kirekire n’u Rwanda ndetse ko bishimira kuba umwe mu bafatanyabikorwa mu kugera ku Iterambere rirambye.

Ati "EU yishimiye gutanga umusanzu wayo mu kugera ku iterambere ry’ubukungu ridaheza ndetse ritangiza ibidukikije, mu mujyo wa gahunda y’igihugu yo kwibanda ku buhinzi bugezweho no guhangana n’ihindagurika ry’ikirere."

Ni amasezerano yitezweho guteza imbere ubuhinzi bugezweho bwifashishije ikoranabuhanga mu kwihaza mu biribwa kuri buri muturage ndetse no kubungabunga ibidukikije mu guhangana n’imihindagurikire y’ikirere by’umwihariko.

Azashyigikira kandi abakozi ba EU mu kunoza gahunda biyemeje yo guteza bene ubu buhinzi budaheza hubakwa Isoko riranguza umusaruro (Kigali Wholesale Market) n’andi yo mu mijyi yunganira Kigali mu guha imbaraga ubuhinzi bugezweho mu gihugu hose.

U Rwanda rwiyemeje gahunda zitandukanye yo guteza imbere ubuhinzi bugezweho binyuze mu ngamba zo kubaka ubukungu butangiza ibidukikije, butanahungabanywa n’imihindagurikire y’ibihe “Green Growth and Climate Resilience Strategy.”

Bijyana n’uko ku Isi imihindagurikire y’ibihe iri kugenda igira ingaruka mbi ku mibereho y’abantu n’ibyabo by’umwihariko ibikorwa by’ubuhinzi dore ko binatunze benshi ku Isi.

EU isanzwe ifitanye umubano uhamye n’u Rwanda cyane cyane aho irutera inkunga mu bikorwa birimo guteza imbere uburezi, kongera ubushobozi bw’urubyiruko no guhanga imirimo, imiyoborere myiza no guteza imbere ibikorwa by’ubukungu birimo ubuhinzi n’ubworozi.

Minisitiri w’Imari n’Igenamigambi, Dr. Uzziel Ndagijimana yakiriye Ambasaderi w’Umuryango w’Ubumwe bw’u Burayi mu Rwanda, Belen Calvo Uyarra, baganira ku mikoranire isanzwe hagati y’impande zombi ndetse no ku masezerano y’inkunga igamije kwifashishwa n’u Rwanda mu bijyanye no guhangana n’ibibazo by’imihindagurikire y’ibihe n’ubuhinzi
Minisitiri w’Imari n’Igenamigambi, Dr. Uzziel Ndagijimana, ashyira umukono ku masezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .