COVID-19: Koperative Umwalimu Sacco yorohereje abayifitemo inguzanyo, ihagarika kubara inyungu z’ubukererwe

Yanditswe na Twarabanye Venuste
Kuya 9 Mata 2020 saa 01:05
Yasuwe :
0 0

Koperative Umwalimu Sacco yemereye abanyamuryango bayo bayifitemo inguzanyo gusaba ihagarikwa ryo kuyishyura mu gihe cy’amezi atatu, igihe imishinga bashoyemo yaba yaragizweho ingaruka n’ingamba zo kwirinda COVID-19.

Mu gihe cy’amezi atatu kandi, yahagaritse kubara inyungu z’ubukererwe ku nguzanyo zishyurwa buri kwezi.

Itangazo ryashyizweho umukono n’umuyobozi mukuru w’iyo Koperative, Uwambaje Laurence, rivuga ko Koperative Umwalimu Sacco yiteguye gutanga amezi atatu hatishyurwa inguzanyo, bakazavugurura amasezerano nyuma ya COVID-19.

Rigira riti “Umwalimu Sacco yiteguye gutanga igihe kigera ku mezi atatu hatishyurwa inguzanyo ku bo bigaragara ko imishinga bashoyemo izo nguzanyo ari nayo yaturukagamo ubwishyu yagizweho ingaruka n’ihagarikwa ry’imirimo bityo bakazavurugururirwa amasezerano y’inguzanyo nyuma y’ibi bihe bikomeye turimo.”

Iyi Koperative ivuga ko uko koroherezwa binareba abanyamuryango batazahabwa imishahara yabo nk’uko bisanzwe, cyane cyane abarimu bigisha mu bigo byigenga.

Umwalimu Sacco itangaza kandi ko “yiteguye gufasha abanyamuryango bayo bafite inguzanyo zishyurwa ku mushahara mu gihe izo nguzanyo zashowe mu mishinga ibyara inyungu zunganiraga iyo mishahara, isubika ubwishyu bw’ishyingu (Capital) mu mezi atatu hagakomeza kwishyurwa inyungu gusa bityo igihe inguzanyo yari kuzarangirira kikaziyongeraho ayo mezi ishyingu ritishyuwemo”.

Iyo Koperative yanatangaje ko yiteguye gufasha abanyamuryango bayo bose, ihagarika kubara inyungu z’ubukererwe ku nguzanyo zishyurwa buri kwezi mu gihe cy’amezi atatu guhera muri Mata kugeza muri Kamena 2020”.

Itangazo rivuga ko abanyamuryango bifuza guhabwa izo serivisi bakohereza ubusabe bwabo kuri email: [email protected] ndetse n’izabacungamutungo b’amashami atandukanye basabiyemo inguzanyo cyangwa bakabahamagara kuri telefoni zabo ziri ku mugereka bakabafasha kubona ubufasha bwose bakeneye.

Umwalimu Sacco utangaza ko abanyamuryango bazaba bahawe imwe muri izo serivisi batazemererwa guhabwa indi nguzanyo iyo ariyo yose kugeza ibihe byo kwirinda Coronavirus birangiye ndetse ngo abashoboye gukomeza kwishyura inguzanyo bazakomeza bazishyure.

Iyi Koperative yafashe icyo cyemezo mu rwego rwo korohereza abanyamuryango kubera ko hari abagiye bafata inguzanyo ku mishahara bakazikoresha mu bikorwa bibyara inyungu bishobora kuba byarahagaze muri iki gihe kubera icyorezo cya Coronavirus kandi ubwishyu buturuka ku mishahara hamwe n’inyungu zikomoka kuri iyo mishinga.

Koperative Umwalimu Sacco yongeye amezi atatu ku gihe cyo kwishyura inguzanyo n'inyungu ku bukererwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .