Cogebanque yahembye abanyamahirwe bakoresha amakarita ya MasterCard

Yanditswe na Ishimwe Israel
Kuya 3 Mata 2019 saa 04:48
Yasuwe :
0 0

Banki Nyarwanda y’Ubucuruzi, Cogebanque, yasoje ubukangurambaga bwa “Ishyura Na Mastercard”, ihemba abanyamahirwe bakoresheje amakarita ya MasterCard mu guhaha no kwishyura serivisi zitandukanye mu Rwanda no mu mahanga.

“Ishyura Na Mastercard” yatangijwe ku wa 13 Werurwe 2019 ku bufatanye bwa Cogebanque na Mastercard.

Mu byumweru bitatu ubu bukangurambaga bwamaze, abanyamahirwe babwitabiriye batomboye ibihembo birimo amakarita ya telefoni, amatike yo guhaha muri Simba Supermarket no kugura ibikomoka kuri peteroli kuri sitasiyo za SP.

Kuri uyu wa 3 Mata 2019 nibwo bwasojwe hatangwa ibihembo nyamukuru ku banyamahirwe bakoresheje amakarita ya Cogebanque arimo Credit, Debit na Prepaid Card (ikoreshwa n’umuntu udafite konti muri iyi banki).

Hahembwe abakiliya batatu batangarijwe kuri radio barimo Usabyimana Justin na Tuyisenge Angelique, batsindiye itike y’ibihumbi 50 Frw yo guhahira muri Simba Supermarket na Kalisa Fred wahawe mudasobwa igendanwa.

Usabyimana yabwiye itangazamakuru ko ikarita ya Mastercard itanga umutekano w’amafaranga na nyirayo.

Ati “Iminsi mike maze nkoresha Mastercard nayibonyemo ibyiza byinshi. Hari amafaranga ushyira mu mufuka ukabona birabangamye ariko izi karita zarabikemuye. Zaje ari igisubizo ku bantu bakenera kuvunjisha bagiye mu kindi gihugu. Aho ugenda hose ushobora kwishyura no gukura amafaranga kuri ATM.’’

Kalisa umaze umwaka akoresha MasterCard yavuze ko yatunguwe no guhembwa kuko atabiteganyaga.

Ati “Iki gihembo cyanteye umuhate wo gukomeza gukorana na Cogebanque. Nkoresha ikarita ya MasterCard mu kubikuza no guhaha ibicuruzwa bitandukanye. Umuntu ufite konti yakoresha MasterCard kuko yoroshya ubuzima, ushobora kubikuza, ukishyura serivisi ukoresheje ibyuma bya POS.’’

Uyu muhango wabereye ku Cyicaro cya Cogebanque wahuriranye na tombola ku banyamahirwe babiri, aho amahirwe yasekeye Umutaliyani Basirico Philipo watsindiye mudasobwa nshya ya HP na Mirimo Vincent wemerewe gusohokera muri Serena Hotel i Rubavu muri weekend imwe.

Mirimo ku murongo wa telefoni yagize ati “Nishimiye igihembo mpawe. Ndashishikariza Abanyarwanda gukoresha aya makarita kuko byoroshya kugendana umuba w’amafaranga no kwirinda ingaruka zo kugirirwa nabi. Yaramfashije kuko nayikoresheje muri Tanzania n’ahandi.’’

Cogebanque yakoze ubukangurambaga nk’umusanzu wayo muri gahunda yo korohereza Abanyarwanda kugera kuri serivisi z’ubukungu butitwaje amafaranga.

Umuyobozi ushinzwe Iyamamazabikorwa muri Cogebanque, Iyamuremye Antoine, yavuze ko bishimiye uko abakoresha serivisi za Mastercard biyongereye.

Yagize ati “Abanyarwanda bitabiriye ku bwinshi gahunda yo gukoresha MasterCard baba ab’i Kigali no hanze yayo. Ni umwanya wo kubashimira kubera ubushake bagaragaje mu gukoresha amakarita ya Mastercard kuko yoroshya ubuzima.’’

Yakomeje ati “Twarishimye kandi ni igikorwa kizakomeza cyo gushishikariza abantu gukoresha aya makarita.’’

Cogebanque nka banki nyarwanda itanga serivisi mpuzamahanga imaze imyaka 20 ikorera ku butaka bw’u Rwanda. Yijeje gukomeza kunoza serivisi iha abayigana by’umwihariko yibanda ku z’ikoranabuhanga ryo kubitsa no kubikuza.

Mu bukangurambaga bwa “Ishyura Na Mastercard”, itsinda ry’abantu barimo na Miss Nimwiza usanzwe ari Ambasaderi wa Cogebanque, ryasobanuriraga abantu ahakorerwa ubucuruzi ibyiza byo gukoresha amakarita ya MasterCard.

Abakiliya ba Cogebanque bakoresha amakarita ya MasterCard bibarindira umutekano w’amafaranga, bikanabahesha ububasha bwo kubikuza ku byuma bya ATM miliyoni 36 hirya no hino ku Isi.

Uhereye ibumoso: Umuyobozi ushinzwe Iyamamazabikorwa, Iyamuremye Antoine; Ushinzwe uburyo bwo kubitsa hifashishijwe Ikoranabuhanga muri Cogebanque, Yvon Gilbert Nishimwe na Frank Molla uhagarariye Mastercard mu Rwanda ubwo hahembwaga abatomboye no gutangaza abegukanye ibihembo nyamukuru
Nimero zavangwaga hagakurwamo imwe y'uhabwa igihembo akesha gukoresha Mastercard
Umuyobozi ushinzwe Iyamamazabikorwa muri Cogebanque, Iyamuremye Antoine, yashimiye abitabiriye serivisi yo gukoresha Mastercard, anasaba Abanyarwanda kuyigana kuko yizewe
Usabyimana Justin yakoresheje ikarita ya Prepaid ya Mastercard avuga ko yamuhaye gutekana no kutagendana igifurumba cy'amafaranga. Aha yatoraga umunyamahirwe umwe mu bahembwe
Umuyobozi ushinzwe uburyo bwo kubitsa hifashishijwe Ikoranabuhanga muri Cogebanque, Yvon Gilbert Nishimwe (ibumoso) ahemba Usabyimana Justin watsindiye itike y’ibihumbi 50 Frw yo guhahira muri Simba Supermarket
Umuyobozi wa Mastercard mu Rwanda, Frank Molla (iburyo) ashyikiriza Kalisa Fred mudasobwa ye yatsindiye
Kalisa Fred watsindiye mudasobwa yashishikarije Abanyarwanda gukoresha Mastercard kuko itanga umutekano w'amafaranga, ikanagoboka umuntu aho rukomeye
Kalisa Fred watsindiye mudasobwa yagize uruhare mu gutombora undi munyamahirwe watsinze mu bukangurambaga bwa “Ishyura Na Mastercard”
Sheki ya Mirimo Vincent watsindiye kuzajya gutemberera kuri Serena Hotel i Gisenyi. Yahamagawe kuri telefoni avuga ko yishimiye igihembo yahawe
Iki gikorwa cyabereye ku Cyicaro Gikuru cya Cogebanque kiri mu Mujyi wa Kigali rwagati hafi y'ahahoze Radio Rwanda
Miss Nimwiza Meghan yasogongeje Abanyarwanda inyungu ihishe mu gukoresha amakarita ya MasterCard atangwa na Cogebanque

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza