Abasora batigaragaje mu myaka itanu ishize basabwe kwigaragaza bagakurirwaho ibihano

Yanditswe na Evariste Nsengimana
Kuya 4 Werurwe 2020 saa 01:08
Yasuwe :
0 0

Ikigo cy’Imisoro n’amahoro(RRA) cyatangaje ko abasora batigeze bigaragaraza n’abiyandikishije batagenzuwe mu myaka itanu ishize, bazigaragaza ku bushake bwabo bazakurirwaho ihazabu ryo ku rwego rw’ubutegetsi n’inyungu z’ubukererwe zijyanye n’umusoro batishyuye.

Itangazo RRA yasohoye ku wa 3 Werurwe 2020 risobanura ko uwo mwanzuro wafashwe ushingiye ku ngingo ya 88 y’itegeko no 026 2019 ryo ku wa 18/9/2019 rigena uburyo bw’isoresha, irebana no gukurirwaho ibihano ku musoresha wigaragaje.

Rikomeza rivuga ko Ikigo cy’Imisoro n’Amahoro kinejejwe no kumenyesha abasora batigaragaje mu buyobozi bw’imisoro cyangwa abiyandikishije ariko bakaba bataragenzuwe mu myaka itanu ishize nk’uko biteganywa n’iryo tegeko, kwigaragariza RRA mu nyandiko, bayimenyesha umusoro batatanze bitarenze tariki ya 30 Kamena 2020.

Rikomeza rigira riti “Abazabikora bose bujuje ibisabwa haruguru bazakurirwaho ihazabu ryo ku rwego rw’ubutegetsi n’inyungu z’ubukererwe zijyanye n’umusoro bishyure gusa umusoro fatizo.”

Imisoro izasonerwa ihazabu n’inyungu z’ubukererwe harimo umusoro ku nyungu, umusoro ku nyongeragaciro, umusoro ku bihembo by’abakozi, umusoro ku igurishwa cyangwa itangwa ry’imigabane, umusoro ku mikino y’amahirwe, umusoro ku mabuye y’agaciro n’umusoro ku byaguzwe.

RRA igaragaza ko mu mwaka wa 2018/19 yinjije miliyari Frw 1,422.9 ku ntego ya miliyari Frw 1,392.1 yari ifite bituma irenzaho miliyari Frw 30.8 angana na 102% y’ayo yari yiyemeje kwinjiza.

Ibiro by'Ikigo gishinzwe imisoro n'amahoro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza