Abashoramari b’abagore bagiriwe inama zabafasha guhangana n’ingaruka za Coronavirus

Yanditswe na Ndahayo Emmanuel
Kuya 1 Kanama 2020 saa 12:31
Yasuwe :
0 0

Umuryango KORA Coaching Group waganirije abashoramari b’abagore uburyo bakwiye kwitwara mu guhangana n’ingaruka Coronavirus yagize ku bikorwa by’ubucuruzi bwabo.

Ibi biganiro byabaye ku wa Gatanu, tariki ya 31 Nyakanga 2020, hifashishijwe ikoranabuhanga ry’amashusho mu rwego rwo kwirinda ikwirakwira rya Coronavirus.

Byitabiriwe na bamwe mu bagore biteje imbere barimo Umuyobozi Mukuru w’Ikigo MTN Rwanda, Mitwa Ng’ambi; uw’Umuryango TradeMark East Africa, Patience Mutesi Gatera n’Umuyobozi Mukuru w’Umuryango KORA Coaching Group (KORA), Mirreille Karera, ari na we wayoboye ibiganiro.

Byibanze ku ngingo zitandukanye zirimo imbogamizi zituma abagore batagera ku ntego zabo n’icyakorwa kugira ngo zigabanuke.

Umuyobozi Mukuru wa TradeMark East Africa, Patience Mutesi Gatera, yavuze ko n’ubwo kubona igishoro ari imbogamizi ikomeye ku bagore, atari yo yonyine idindiza iterambere ryabo.

Yagize ati “Kubura igishoro si cyo cyonyine, hari ukutagira amakuru no kutabona uko bageza umusaruro wabo ku masoko.”

Yongeyeho ko usanga hari ubwo abagore badasobanukirwa neza n’uburyo bashobora no gutangira ubucuruzi, aho binafitanye isano n’uburyo abana b’abakobwa barerwa kuva bakiri bato.

Ati “Ese bajya bigishwa ko bafite ubushobozi bwo kwikorera ubucuruzi bwabo? Ese bigishwa ubumenyi bukwiriye mu bijyanye no kuyobora ibigo byikorera?”.

Mu bindi byaganiriweho harimo icyuho cy’ibikoreshwa mu gutunga umuryango, aho ubushakashatsi bwagaragaje ko abagore bakoresha 90% by’urwunguko rwabo mu kwita ku miryango yabo, harimo kwishyurira abana amashuri, ubuvuzi n’ibindi byangombwa.

Abagabo bo bakoresha 40% by’urwunguko rwabo mu kwita ku miryango, aho basigarana igice kinini gishobora no kubafasha gutangiza ibikorwa by’ubucuruzi dore ko ari na bo baba bahembwe menshi kurusha bagenzi babo b’abagore n’ubwo baba bakora akazi kamwe.

Ikinyuranyo cy’umushahara uhembwa abagabo n’abagore bakora umurimo umwe, kiri hagati ya 30% na 40% ku Mugabane wa Afurika.

Mutesi yakomeje ati “Ibyo bisobanuye ko mu bihe bya COVID-19, iyo abagore batabashije gucuruza mu gihe cy’ibyumweru bibiri cyangwa ukwezi, ikiba kigiye kubaho ari uko bazakoresha igishoro cyabo mu kwita ku miryango yabo, ibyo rero bigatuma ubucuruzi bwabo burushaho kujya mu bibazo.”

Umuyobozi Mukuru wa MTN Rwanda, Mitwa Ng’ambi, yasobanuye ko ibibazo abagore b’abashoramari bahura nabyo mu bihe bya Coronavirus, bifitanye isano n’uburyo bari babayeho mbere y’iki cyorezo.

Yifashishije ubushakashatsi bwakozwe na Banki Nyafurika Itsura Amajyambere (AfDB), Ng’ambi yavuze ko ikinyuranyo cy’ishoramari ku bucuruzi bukorwa n’abagabo n’abagore, cyari miliyari 45 z’amadorali mbere ya Coronavirus, bityo ko mu gihe imiterere y’ubucuruzi bwa nyuma y’iki cyorezo izashingira ku buryo ibigo bizashobora kubona amafaranga vuba, ‘bizatuma ibigo by’ubucuruzi bw’abagore bizahazaharira cyane’.

Yagize ati “Mu busanzwe ubucuruzi bw’abagore bwibanda ku bikorwa bimwe, birimo kwakira abantu no gutanga serivisi. Murabizi ko izi nzego ari zo zazegejwe cyane na coronavirus, bisobanuye rero ko ubucuruzi bukorwa n’abagore ari bwo buzazahazwa cyane na Coronavirus.”

Ubushakashatsi bwakozwe na TradeMark East Africa bugaragaza ko mu bigo bigera kuri 9000 by’abagore, ibitarenze 3% ari byo binini (bifite abakozi barenze 100). Ibyinshi muri byo, 63%, ni ibigo bito cyane bikoresha abakozi batarenze batatu mu gihe ibindi bisigaye biri mu cyiciro cy’ibigo bito n’ibiciriritse.

Mu rwego rwo kuziba iki cyuho no guteza imbere muri rusange imishinga ikorwa n’abagore, Patience Mutesi yagaragaje ko hari byinshi bikwiye gukorwa.

Ati “Numva kugira ngo babashe guhangana n’ibyo bibazo, hakwiye kubaho igikorwa kigari cyo gushora amafaranga mu bigo [n’imishinga] byabo”.

Yasabye Leta gukoresha ububasha bwayo igashyigikira ubucuruzi buto, kuko ari nabwo bukorwa n’abagore benshi.

Ng’ambi yashimangiye iki cyifuzo, avuga ko ikigo cya MTN Rwanda ayobora kiri gukora ibishoboka mu rwego rwo gufasha ibigo bito n’ibiciritse kwirwanaho.

Yahishuye ko muri miliyoni 100 Frw zashyizwe mu Kigega Nzahurabukungu (ERF) giherutse gutangizwa na Leta y’u Rwanda, basabye ko azakoreshwa by’umwihariko mu gufasha kuzanzamura ibigo bito n’ibiciriritse byazahajwe n’ingaruka za Coronavirus.

Simon Mzazi, umwe mu bari bakurikiye ibi biganiro yifashishije ikoranabuhanga, yabajije ikigwiriye gukorwa mu rwego rwo kuzamura ibigo by’abagore, bikava mu biciriritse bikajya mu bito n’ibinini.

Mutesi yasubije ko hari byinshi bishobora gukorwa birimo kubigisha no kubafasha kwishyira hamwe.

Ati “Hari byinshi byakorwa, dukwiriye gushishikariza abagore gushora urwunguko rwabo mu bucuruzi bwabo [kugira ngo bwaguke]. Ni byiza kuba barukoresha bita ku miryango yabo ariko ni na byiza ko bakomeza gushora mu bucuruzi bwabo. Dukwiye kandi kubaha amakuru. Hatitawe ku bucuruzi buri wese akora, dukwiye kubaha amakuru ajyanye n’uko babona ibyo bakoresha, uko bakongerera agaciro ibyo bakora no kubafasha kugera ku masoko aruta ayo bafite muri ibi bihe”.

“Dukwiye kandi gufasha abagore bakora ubucuruzi buciriritse kwibumbira mu makoperative. Nk’urugero, niba ari abagore bacuruza ibigori bari mu bice bitandukanye, ni gute twabahuriza hamwe bagakorana? Byabafasha kwaguka ndetse bikanabaha amahirwe yo kongerera agaciro ibyo bakora. Ibyo byatuma bazamura urwego, bagatangira kugura imashini n’ibindi byabafasha kwiteza imbere.”

Umushinga wa KORA Coaching Group (KORA) urateganya gutangiza ikigega cya ‘Business Clinic’ kizafasha abagore gukomeza ubucuruzi bwabo mu bihe bikomeye bya Coronavirus.

Uyu mushinga uzafasha kwigisha abagore uburyo bwo gukora ubucuruzi, ubereke uko barushaho guteza imbere ubucuruzi bwabo, unabashakire igishoro cyatuma bakomeza ubwo bucuruzi muri ibi bihe bitoroshye.

Iki kigega kizatangizwa ku bufatanye bwa KORA n’Ihuriro ry’Abagore ba Rwiyemezamirimo mu Rwanda (RCWE), umushinga BPN Networks n’Ishami ry’Umuryango w’Abibumbye ryita ku Iterambere ry’Abagore (UN WOMEN).

KORA Coaching Group ni Umuryango Nyafurika ufite ibikorwa mu Rwanda no muri Afurika y’Epfo, ibikorwa byawo byibanda ku guhugura no kugira inama abawugana cyane abafite ibikorwa by’ubucuruzi. Uyu muryango kandi unafite ishami ryitwa KORA Coaching & Business Academy ritanga amahugurwa anatangirwamo impamyabumenyi ziri ku rwego mpuzamahanga.

KORA Coaching ufite ibikorwa byibanda ku guhugura no kugira inama abawugana cyane abafite ibikorwa by’ubucuruzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .