Abahinzi b’icyayi mu Rwanda baracyirahira ko cyababereye nk’inka idateka

Yanditswe na Mukwaya Olivier, N.Kubwimana Janvière, Prudence Kwizera
Kuya 23 Kanama 2019 saa 06:33
Yasuwe :
0 0

Abahinzi b’icyayi bo mu turere dutandukanye tw’u Rwanda, baracyirahira ko cyababereye nk’inka idateka ibatunga mu buzima bwabo bwa buri munsi.

Aya marangamutima yuje ibyishimo byinshi yagaragajwe n’abahinzi b’icyayi bakorana n’uruganda rwa Rubaya Tea Factory, Nyabihu Tea Factory, Kitabi Tea Company n’abo mu karere ka Rutsiro ubwo bizihizaga umunsi ngarukamwaka wabo wo kwishimira umusaruro baba baragezeho no kuganura ibyo bejeje wabaye kuwa 22 Kanama 2019.

Bamwe mu bahinzi b’icyayi bamaze gutezwa imbere nacyo bavuga ko icyayi cyababereye nk’inka idateka ibatunga mu mibereho yabo ya buri munsi.

Zirimwabagabo Jean Bosco, umwe muri bo yagize ati “Twebwe abahinzi b’icyayi iyo twibutse aho cyadukuye tugifata nk’inka idateka dukama buri munsi ikadutunga mu buzima bwacu bwa buri munsi”.

Avuga ko yatangiye akorera ibihumbi 14 FRW, arazamuka agera ku bihumbi 200 FRW, ubu akaba ari umuhinzi wabigize umwuga, utuye heza, woroye inka nyinshi n’ibindi byinshi akesha ubuhinzi bw’icyayi.

Umuyobozi muri Rwanda Mountain Tea, akaba n’umujyanama mukuru wa Rubaya Tea Factory, Turahirwa Ephrem, avuga ko intego bafite ari ukuzamura ubukungu n’imibereho myiza y’abaturage.

Ati “Intego dufite ni ukuzamura ubukungu n’imibereho myiza y’abaturage aho tubaha akazi, tubagezaho amazi meza, kubaka amarerero, kuremera abatishoboye n’ibindi, ibi bizakomeza hakorwe n’ibindi. Icyo dusaba abahinzi ni ukwita ku cyayi muri gahunda yo kongera ubwiza n’ubwinshi bw’umusaruro, bityo dukomeze kwiharira imyanya ya mbere ku isoko nk’uko bisanzwe”.

Abahinzi b’icyayi muri Kitabi barakivuga imyato

Abahinzi b’icyayi bo mu Murenge wa Kitabi mu Karere ka Nyamagabe nabo barishimira ko umusaruro wiyongereye, bavuga ko biyemeje guhora ku isonga mu buhinzi bw’icyayi kandi bazakomeza kugifata neza kugira ngo kigumane umwimerere wacyo.

Bavugirije Innocent yagize ati “Guhinga icyayi byangejeje kuri byinshi kandi buri kwezi kimpa umusaruro w’amafaranga agera ku bihumbi 100 FRW; ndishimye cyane kuko imbaraga dutakaza mu kwita ku cyayi ntizipfa ubusa kuko umusaruro uraboneka.”

Abo bahinzi basaga 600 bibumbiye muri Koperative KOBACYAMU ihinga icyayi ikakigurisha ku ruganda rwa Kitabi Tea Company.

Umuyobozi wa Kitabi Tea Company, Gasarabwe Francois, yavuze ko kuva muri 2009 urwo ruganda rwakwegurirwa Rwanda Mountain Tea Ltd, umusaruro wiyongere ku buryo bufatika.

Ati “Muri 2009 twakoraga toni 1 848 ku mwaka ariko mu mwaka ushize wa 2018 habonetse toni zirenga 2 557. Uyu mwaka wa 2019 dufite umuhigo wo kugera kuri toni 3 000.”

Mu byo bishimira kandi harimo ko ubwiza n’uburyohe bw’icyayi batunganya bwiyongere.

Ati “Ku itariki 20/08/2019 ikilo cy’icyayi cyagurishijwe amafaranga menshi ku isoko mpuzamahanga ry’icyayi i Mombasa ni icya Kitabi; cyagurishijwe amadolari 6.27 ku kilo kimwe.”

Muri Kitabi hahembwe abahinzi batanu bahize abandi mu guhinga neza icyayi bahabwa inka, naho abakozi bagaragaje umurava mu kazi bahabwa ihihembo bitandukanye.

Mukanoheri Vasta wahembwe inka yagize ati “Ndishimye cyane kuko bampembye inka ngiye kuzajya nywa n’amata; biranshimishije cyane kubona nanjye ngiye korora inka.”

Kugeza ubu icyayi gitunganywa na Kitabi Tea Company gihinze ku buso bwa hegitali 1 541 harimo 747 z’abahinzi na 794 z’uruganda.

Ku rundi ruhande abahinzi b’icyayi ba Rutsiro, RUTAGROC, Barakagendana Sylvestre, yavuze ko nubwo umusaruro umaze kuzamuka babangamiwe no kutagira imihanda bituma icyayi gitakaza uburyohe.

Ati “Ubu tugeze kuri toni 690 bivuze ko mu kwa 12 tuzaba twararengeje toni 1000 kandi biragaragara kuko buri mwaka tugenda twiyongera ariko dufite ikibazo cy’imihanda bigatuma umuhinzi akoresha amasaha atatu kujyana icyayi ku modoka no kukigeza ku ruganda bigatuma gitakaza uburyohe ariko turagerageza kuko ubu ni Kitabi iturusha gusa’’.

Umuyobozi Mukuru wa Rwanda Mountain Tea Ltd, Kabeja Alain, yavuze ko bashima cyane uruhare rw’umuhinzi mu musaruro uboneka mu bwiza no bwinshi.

Ati “Buri mwaka dukora igikorwa cyo kwishimira uruhare rw’umuhinzi mu musaruro tubona kuko bahinzi bagira uruhare runini mukongera umusaruro mu bwiza no mu bwinshi. Abahinzi ni abafatanyabikorwa bacu bakomeye.”

Rwanda Mountain Tea Ltd ifite inganda eshanu ari zo Kitabi Tea Company, Rubaya Tea Company, Nyabihu Tea Company, Rutsiro Tea Company na Gatare Tea Company.

Muri uyu muhango w’umunsi wahariwe umuhinzi w’icyayi, hatanzwe ibihembo birimo inka, amagare, ihene, ibitenge n’ibindi, aho byahawe abahinzi, abakozi n’abasoromyi b’icyayi bitwaye neza kurusha abandi.

Bamwe mu bahinzi bagurisha umusaruro ku ruganda rwa Kitabi Tea Company
Abasoromyi b'icyayi nabo bashimiwe umusanzu wabo
Abasoromyi b'icyayi bahize abandi bashimiwe
Abahinzi b'icyayi babaye indashyikirwa bahawe ibihembo birimo n'inka
Umuyobozi Mukuru wa Rwanda Mountain Tea Ltd, Kabeja Alain avuga ko bazakomeza gushyigikira abahinzi
Umuyobozi wa Kitabi Tea Company, Gasarabwe Francois
Uruganda rwa Kitabi Tea Company rutunganya icyayi
Umuyobozi wa Rubaya Tea Factory ashyikiriza igihembo umuhinzi w'icyayi
Roben Winter uyobora uruganda rw'icyayi rwa Rutsiro Mountain Tea
Umuyobozi wa koperative y’abahinzi b’icyayi ba Rutsiro RUTAGROC Barakagendana Sylvestre yavuze ko nubwo umusaruro umaze kuzamuka ariko babangamiwe no kutagira imihanda bituma icyayi gitakaza uburyohe
Umuhinzi w'icyayi ashyikirizwa inka nk'igihembo
Abahinzi b'icyayi baba bizihiwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza