Abahinga imyumbati mu Rwanda bagiriwe inama yo guhindura umuvuno ku mbuto bari basanzwe bahinga

Yanditswe na Mutangana Gaspard
Kuya 9 Mata 2021 saa 01:48
Yasuwe :
0 0

Ikigo cy’Igihugu giteza Imbere Ubuhinzi n’Ubworozi, RAB, n’Ikigo Gikora Ubushakashatsi mu Buhinzi, International Institute of Tropical Agriculture (IITA), byagiriye abahinga imyumbati inama yo guhinga imbuto nshya zifite ubushobozi bwo guhangana n’indwara ya Kabore n’Ububembe bw’imyumbati.

Ubwo abakozi b’ibi bigo byombi [RAB na IITA] basuraga ahatuburirwa imbuto z’imyumbati mu turere twa Ruhango na Huye, babwiye itangazamakuru ko kuba abahinzi batitabira guhinga imbuto nshya bidindiza iterambere ry’ubuhinzi bw’imyumbati.

Umukozi wo muri IITA, Mugambi Samuel, yavuze ko abaturage bakwiye kujya bahinga imbuto nshya kuko zifite ubushobozi bwo guhangana n’indwara z’imyumbati.

Ati “Uburyo bwiza bwo guca uburwayi bwa Kabore n’Ububembe mu myumbati, ni uguhinga imbuto zivuguruye zakuwe mu batubuzi bemewe na RAB.”

“Ni ngombwa guhindura imbuto mu gihe uyihinze inshuro nyinshi kuko iba yatangiye gutakaza ubushobozi bwo guhangana n’izi ndwara turi gukumira. Mu gihe ubonye amababi y’igiti yatangiye kwihina cyangwa guhinduka umuhondo ni ngombwa kurandura icyo giti kikavanwa hafi y’umurima”.

Umukozi wa RAB ukuriye ishami rikora ubushakashatsi ku bihingwa by’ibinyabijumba, Dr. Nduwumuremyi Athanase yasobanuye ubwiza bw’amoko atandatu y’imbuto RAB imaze gutubura.

Uretse guhangana n’indwara, izi mbuto zihanganira ibiza kandi zigatanga umusaruro mwinshi ku buso buto bw’ubutaka.

Ati “Mu mbuto zimeze neza twatangiye guha abahinzi, zirimo iyitwa Buryohe, Gikungu, Tegereza, Tebuka, Biseruka, na Nsizebashonje. Izo ni imbuto twashyize hanze dufatanyije na IITA. Ni imbuto zitanga umusaruro mwishi kuruta izisanzwe twita Gakondo. Zibasha guhanga n’udusimba tujya twangiza imyumbati kandi zikanihanganira ibiza nk’imvura nyinshi n’izuba.”

Umwe mu bahinzi b’intangarugero umaze imyaka 15 atubura imbuto z’imyumbati mu Karere ka Ruhago, Niyongira Jacques, yavuze ko nyuma yo kubona ibyiza by’imbuto zivuguruye yahise yiyemeza gufasha abandi bahinzi kubona imbuto zishobora guhangana n’uburwayi.

Ati « Hari igihe kigera uruganda tugemurira rugahaga imyumbati. Nkurikije amahugurwa RAB yaduhaye, ntabwo imbuto y’imyumbati izongera kubura. Ntitaye ku nyungu z’amafaranga, nshobora guha imbuto nk’abantu 100 mu mwaka. N’ubwo ntakunze kwibanda mu guhinga, neza hagati ya toni 150 na 200 buri mwaka.»

Bitewe n’uko igihembwe cy’ihinga cyagenze, igihingwa cy’imyumbati kiza ku mwanya wa kabiri cyangwa uwa gatatu mu bihingwa byera cyane mu Rwanda nyuma y’urutoki n’ibishyimbo.

Imyumbati ihingwa mu turere twinshi tw’u Rwanda, by’umwihariko mu Bugesera no mu Mayaga.

Ihingwa ku buso busaga hegitari ibihumbi 200 mu gihugu hose, ukuyemo uduce dukonja cyane two mu ntara y’Amajyarugu.

N’ubwo RAB igaragaza ko guhinga imbuto gakondo bitubya umusaruro w’imyumbati, Dr. Nduwumuremyi aherutse gutangaza ko RAB ifite imbuto zivuguruye abahinzi batigeza bajya gufata ngo bazisimbuze izo basanganywe zifite uburwayi.

Imyumbati itarwaye kabore iba ifite ibibabi birambuye kandi bifite ibara ry'icyatsi kibisi
Ku buso buto hava umusaruro mwinshi w'imyumbati abahinzi bitabiriye guhinga imbuto zivuguruye
Umukozi wa RAB i Rubona yarekana ibiranga imyumbati itarwaye Kabore

Amafoto: IITA


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .