Ab’i Karongi banyuzwe n’impinduka Umushinga wa Mubuga Bio Coffee winjije mu buzima bwabo

Yanditswe na Tuyishimire Raymond
Kuya 12 Ukuboza 2020 saa 08:42
Yasuwe :
0 0

Ikawa ni kimwe mu bihingwa bifitiye akamaro kanini ubuzima bwa muntu kuko yuzuyemo ibitunga n’ibisukura umubiri biwukuramo ibishobora kubangamira imikorere yawo.

Ubushakashatsi butandukanye bukorwa bwerekana ko abayinywa ibafasha mu kugabanya ibyago byo kurwara indwara zimwe na zimwe zikomeye nka diabète n’izibasira umwijima.

Usibye kuba igira akamaro mu mubiri wa muntu, inafasha uyihinga kumukura mu bukene kuko ari kimwe mu bihingwa u Rwanda ruhinga rwinjiza agatubutse.

Ibi bishimangirwa n’abaturage bo mu Murenge wa Mubuga mu Karere ka Karongi mu Ntara y’Iburengerazuba bashimangira ko binyuze mu mushinga uhinga ikawa wa Mubuga Bio Coffee, imibereho yabo yatangiye guhinduka.

Nyiranduhura Damaris yavuze ko uyu mushinga wamufashije kwivana mu bukene nyuma yaho umuryango we uwubonyemo akazi.

Ati “Uyu mushinga wa Mubuga Bio Coffee watumye hano [aho atuye] hataba ibihuru, murabona ko hacyeye. Ubu rero dutegereje ko ikawa izera natwe tugakabakaba ku ifaranga. Ariko n’ubu zitarera turoherezamo umuryango ugakora, tukarya, tukambara.’’

Akomeza ati “Ikindi nk’ubu dufite inka ariko nta fumbire ipfa ubusa. Urayirunda yamara kubora, Bio Coffee ikaza ikayigura ikaguha amafaranga. Uyu mushinga rero ndawushima.’’

Safi Maria na we utuye ku Mubuga yavuze ko nyuma yo guhunguka yabanje gufashwa na leta ariko imfashanyo irahagarara agira amahirwe Bio Coffee imuha imirimo muri uwo mushinga.

Ati “Twaje kujya mu mahanga ndi kumwe n’umuryango wanjye kubera Jenoside yakorewe Abatutsi, tujyayo, tuba mu mashyamba ariko Leta y’u Rwanda idufasha gutaha, tugeze hano leta iradufasha ariko imfashanyo iza guhagarara.’’
Umwaka urangiye nibwo yigiriye inama yo kujya gusaba akazi mu mushinga wa Mubuga Bio Coffee ndetse aragahabwa.

Ati “Bampa akazi ndakora, ndahembwa maze ngura inkoko yaje guturaga mbona ubushobozi bwo kugura ihene. Iyo hene narayigurishije nguramo ingurube, ubu ingurube yanjye igiye kubwagura ndateganya kuzagura n’inka.’’

Yashimye intambwe yiteje abikesha Umushinga wa Mubuga Bio Coffee kuko ubu ashobora kwigurira ‘imyenda n’isabune yo kuyifura’ ntawe ategeye amaboko.

Umuyobozi wa Mubuga Bio Coffee, Ngoboka David, yavuze ko kawa yabo yihariye kuko izagera ku isoko imeze neza ari mbisi cyangwa ikaranze.

Ati “Umwihariko ni uko duhinga kandi tugatunganya ikawa y’umwimerere. Ni ukuvuga ko ko kawa yacu nta fumbire mvaruganda ijyamo. Turayihinga, tukayikurikirana kugeza igeze ku isoko mpuzamahanga mu buryo bubiri, ishobora kuzagera ku isoko ikaranze cyangwa se idakaranze.’’

Uyu mushinga kuva watangira mu mwaka wa 2018, uhinga ikawa ku buso bwa hegitari 150, umaze guha akazi abagera kuri 300. Ufite intego yo gukomeza guhaza isoko ry’u Rwanda muri kawa y’umwimerere no kugeza umusaruro wayo mu mahanga.

Ikawa ni kimwe mu bicuruzwa u Rwanda rwohereza mu mahanga byinjiza amadevize menshi. Ikigo gishinzwe guteza imbere ibyoherezwa mu mahanga bikomoka ku buhinzi n’ubworozi (NAEB), gitangaza ko hagati ya Nyakanga na Ukuboza 2019, u Rwanda rwabonye umusaruro wa toni 15.086.067 z’ikawa, rwohereza mu mahanga toni 15.423.539 yinjije miliyoni 49,5$. Ni mu gihe mu 2018 hoherejwe mu mahanga toni 13.678.234 z’ikawa, zinjiririza igihugu miliyoni 48,5$.

Mubuga Bio Coffee yateje imbere abanyakarongi kuko bafashijwe kubona imirimo
Umuyobozi wa Mubuga Bio Coffee yavuze ko kawa bahinga yihariye kuko izagera ku isoko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .