250STARTUPS yatanze impamyabushobozi kuri ba rwiyemezamirimo bato bahuguwe mu kubyaza inyungu imishinga

Yanditswe na Iradukunda Serge
Kuya 6 Gashyantare 2020 saa 07:57
Yasuwe :
0 0

Umushinga ufasha ba rwiyemezamirimo bato kunoza ibyo bakora no kububakira ubushobozi, 250STARTUPS, wahaye impamyabushobozi abo mu bigo by’ikoranabuhanga 10 bari bamaze amezi atandatu bahugurwa mu bijyanye no kunoza ibyo bakora n’abagera kuri 20 bari mu imenyerezwa ry’akazi mu bijyanye n’amategeko n’icungamari babafashaga.

Uyu muhango wabereye muri Kigali Convention Center ku wa 4 Gashyantare 2020, wahuje abayobozi ba 250STARTUPS n’abafatanyabikorwa bawo, abahagarariye n’abayobozi mu bigo bya leta na barwiyemezamirimo bakuru n’abato.

Umwe mu basoje aya mahugurwa akaba n’Umuyobozi w’Urubuga Gocook rufasha abantu kubona abatetsi kabuhariwe babafasha, Nyinawumuntu Yvonne, yavuze ko 250STARTUPS yamufashije gushyira igitekerezo cye mu bikorwa.

Yagize ati “Gocook cyari igitekerezo twari dufite mbere yo kuza muri 250STARTUPS ariko kidakora, twari dufite umushinga gusa tuhageze twabonye amahugurwa mbona abamfasha mu bijyanye n’imari n’amategeko ku buryo noneho byanyoroheye kumenya nti ese dushaka iki, tuzagera ku ki? Nyuma twabonye n’umuntu wadufashije gukora urubuga biva mu bitekerezo biba ikintu gifatika.”

Nyinawumuntu yavuze ko ubu amahugurwa arangiye afite umushinga ufatika. Ati “Navuga ko ibintu twari dufite mbere yo kuza muri 250STARTUPS ntaho bihuriye n’ibyo dufite ubu, mbere yo kuza twari dufite ibitekerezo gusa ariko ubu dufite igikorwa cy’ubucuruzi cyunguka.”

Imishinga yari imaze amezi atandatu inozwa harimo uwitwa GoCook, Safe Sana, Dev Plug, Nyereka Tech, Aqua Safi, Imenye, Izi park, Ikizamini, Farmpal na Codeck.

Umuyobozi w’umushinga 250STARTUPS, Shyaka Charles, yavuze ko bizeye ubumenyi bahaye aba barwiyemezamirimo mu gihe cy’amezi atandatu.

Yagize ati “Twabahaye ubumenyi iyo bije mu bijyanye n’amategeko, ubu bazi uburyo bashobora guciririkanya mu buryo bw’amategeko, twabahaye ubumenyi bwo kugira imbanziriza mushinga yanditse mu buryo bwiza kandi bazi kubikora icyo ni ikintu cy’ingenzi.

Yabasabye kubakira kuri ubu bumenyi bahawe ubundi bakamenyekanisha imishinga yabo ari nako bayibyaza amafaranga.

Yagize ati “Icyo tubategerejeho ni ukugenda bakagurisha ibyo bakora ku bakiliya, ikindi ni ukubona ubufatanyabikorwa burushijeho bushobora kwagura kompanyi yabo ndetse bakagenda bakiga byagutse akarere kose kugira ngo batangire kwaguka, twabateye imbaraga, twabahaye ibyo bari bakeneye kugira ngo bagira igikorwa gihamye, ubu Isi ni iyabo ngo bayigarurire.”

Abahawe impamyabushobozi ni abahuguwe mu cyiciro cya gatatu, mu bijyanye n’ikoranabuhanga, amategeko n’imari.

Umuyobozi w’Ikigo cy’Igihugu gishinzwe Ikoranabuhanga mu Itumanaho n’Isakazabumenyi (RISA), Muhizi Innocent, yasabye abasoje amahugurwa kuzirikana ko aribwo urugendo rugitangira.

Ati “Nk’uko babivuga urugendo rwa kilometero 100 ruhera ku ntambwe imwe, ntucibwe intege n’uko utabonye umuntu ushyira ibihumbi 5 Frw mu mushinga wawe,…., hari abandi bashoramari benshi hanze aha,….., ibi bigomba kuba intangiriro, ibiri mu nzira nibyo byinshi , ntimuhagararire aha mukomeze guhanga udushya no gutekereza byagutse.”

Muri uyu muhango ba rwiyemezamirimo bagize umwanya wo kumurikira abashoramari imishinga yabo ndetse banabasaba kuyishoramo.

Kuva mu 2018 imishinga 40 irimo n’iri kunozwa ubu imaze kunyura mu biganza bya 250STARTUPS, 12 muri 30 iri hanze yatangiye kwinjiza amafaranga mu gihe 70% y’abahuguwe mu bijyanye n’amateko n’icungamari babonye akazi mu bigo bitandukanye byo mu Rwanda.

250STARTUPS isanzwe ifasha urubyiruko rufite imishinga y'ikoranabuhanga kuyinoza
Adia Akabibi asobanura imikorere y'urubuga yise "Imenye" rufasha abari n'abategarugori kubara iminsi yabo
Ambasaderi w'u Buyapani mu Rwanda, Takayuki Miyashita, ashyikiriza Nyinawumuntu Yvonne impamyabushobozi
Ambasaderi w'u Buyapani mu Rwanda, Takayuki Miyashita, yasabye abasoje amahugurwa gutangira gutekereza ku isoko ryagutse
Muri uyu muhango kandi hahembwe abitanze mu bikorwa bitandukanye kugira ngo amahugurwa agende neza
Umuyobozi wa JICA mu Rwanda isanzwe ari n'umufatanyabikorwa wa 250Startups, Shin Maruo, ari mu bitabiriye iki gikorwa
Umuyobozi wa RISA, Muhizi Innocent, yibukije abarangije amahugurwa ko ari bwo urugendo rugitangira
Umuyobozi wa RISA n'umuyobozi wa JICA Rwanda bakurikiranye uko ba rwiyemezamirimo bamurika imishinga
Umwe mu barangije amahugurwa amaze guherezwa impamyabushobozi ye
Uyu muhango wari witabiriwe n'abayobozi mu bigo bitandukanye
Abahuguwe bafatanye ifoto y'urwibutso n'abayobozi bari muri uyu muhango

Amafoto: Munyarugerero Gift


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza