00:00:00 IGIHE NETWORK KN KINYARWANDA EN ENGLISH FR FRANCAIS

I&M Bank Rwanda yafunguye ishami rishya ku Kicukiro

Yanditswe na Mugisha Christian
Kuya 26 May 2024 saa 07:47
Yasuwe :

Mu rwego rwo kurushaho kwegereza abaturage serivisi zayo, Banki y’Ubucuruzi ya I&M Bank Rwanda Plc, yafunguye ku mugaragaro ishami rishya mu Karere ka Kicukiro, Umurenge wa Niboyi.

Ubuyobozi Bukuru bw’iyi banki butangaza ko bwafashe icyemezo cyo gutangiza iri shami rishya nyuma yo kwakira ibyifuzo byinshi by’abakiliya babo ko hari abakeneye kurushaho kwegerezwa serivisi.

Igikorwa cyo gutangiza iri shami cyabaye ku wa 23 Gicurasi 2025, kitabirwa n’ubuyobozi bukuru bw’iyi banki, abakiriya babo, ubuyobozi bw’Umurenge iri shami ririmo n’abandi.

I&M Bank Rwanda yahoze yitwa BCR, muri Gicurasi uyu mwaka, yujuje imyaka 61 itangije ibikorwa byayo mu Rwanda ndetse inaba banki ya mbere y’ubucuruzi mu gihugu imaze igihe kirekire.

Umuyobozi Mukuru wa I&M Bank Rwanda PLC, Benjamin Mutimura, yavuze ko impamvu habaho kurushaho kwegereza serivisi abaturage ari uko intego y’iyi banki abereye umuyobozi, ari ukuba umufatanyabikorwa w’ingenzi mu iterambere ry’abaturage.

Ati “Nubwo tumaze imyaka myinshi ntibivuze ko dushaje ahubwo dufite ubunararibonye, twabashije gukomeza kumva ibyo mutwitezeho none ubu tukaba dufite amahirwe ko twaje gutangira kandi dukomeje urugendo rwacu rwo kwagura amashami. Intego yacu ni uko tuba hafi yanyu.”

Yongeyeho ko “Ngirango mwabonye abanyura mu mujyi imbere ya banki hahora ikamyo ubu hari imashini ‘tractor’ mu munsi iri imbere hazaba hari ikindi. Ubu intego ni ugufasha imishinga kubona ibyangombwa ikeneye kugira ngo itere imbere.”

Kuri ubu I&M Bank Rwanda PLC, ifite inguzanyo itanga nta ngwate igera kuri miliyoni 100 Frw na miliyoni 350 Frw mu rwego rwo gushyigikira abakora ubucuruzi kugira ngo butere imbere.

Mutimura yagize ati “Ngirango mu minsi iri imbere muzabona ibindi tuzagenda dushyira ku isoko kugira ngo mubashe kwagura ubucuruzi bwanyu kuko iyo mwungutse twese turunguka.”

I&M Bank ivuga ko mu kwaguka kwayo ishaka kugendana n’igihe hashyirwa imbere imikoreshereze y’ikoranabuhanga, abakiliya bayo bagashishikarizwa gukoresha uburyo bwabashyiriweho mu rwego rwo kuborohereza.

Umwe mu bakiliya b’iyi banki akaba n’umucuruzi wari witabiriye iki gikorwa, Rwasa Roger, yashimiye serivisi nziza iyi banki ibaha, n’uko ibitaho by’umwihariko uko yabanye nabo mu bihe bya Covid-19.

Ati “Iyi banki hari aho yadukuye n’aho yatugejeje. Turabashimira impinduka mugenda muzana muri banki, mugafasha abakiliya bose. Mu bihe bigoye byacu by’ubucuruzi haba hasi cyangwa hejuru bakomeza kubana natwe uko byagenda kose kandi nibwira ko n’ubundi ariko kamaro ka banki, iyo iza kuba yaradutaye mu bihe bya Covid-19 ubu uyu munsi twari kuba twaragiye ahandi.”

I&M Bank Plc yatangiye gukorera mu Rwanda mu 1963, ubu akaba ari banki ibarizwa ku Isoko ry’Imari n’Imigabane ry’u Rwanda, guhera muri Werurwe 2017.

Iri shami ryafunguwe ku mugaragaro n'Ubuyobozi bw'Umurenge wa Niboyi ndetse n'Ubuyobozi bwa I&M Bank Rwanda Plc
Iri shami riherereye hafi y'ahazwi nka Centre [Kicukiro] mu nyubako ya CPR- Unity House
Iki gikorwa cyari cyitabiriwe n'abantu b'ingeri zitandukanye
Iki gikorwa cyari cyitabiriwe n'abakozi batandukanye ba I&M Bank Rwanda Plc
Umuyobozi Mukuru wa I&M Bank Rwanda PLC, Benjamin Mutimura, yavuze ko impamvu habaho kurushaho kwegereza serivisi abaturage ari uko intego yabo ari ukuba umufatanyabikorwa w’ingenzi
Umuyobozi w'iri shami rishya, Junior Bukasa, yavuze ko abatuye muri Niboyi byabasabaga kujya i Remera bikabagora cyane, akaba ari imwe mu mpamvu yatumye bazanirwa iri shami
Umwe mu bakiliya b’iyi banki akaba n’umucuruzi wari witabiriye iki gikorwa, Rwasa Roger, yashimiye serivisi nziza iyi banki ibaha, n’uko ibitaho n'uko yabanye nabo muri Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .