RDB yeguriwe Pariki y’Igihugu ya Gishwati-Mukura

Yanditswe na

Kizza E. Bishumba

Kuya 1 Ukwakira 2019 saa 07:45
Yasuwe :
0 0

Minisiteri y’Ibidukikije mu Rwanda yashyikirije Ikigo cy’Igihugu cy’Iterambere, RDB, Pariki y’Igihugu ya Gishwati-Mukura, kugira ngo kiyibyaze umusaruro mu buryo burimo no gukurura ba mukerarugendo.

Uyu ni umuhango wabaye kuri uyu wa Kabiri witabirwa n’abayobozi batandukanye barimo Minisitiri w’Ibidukikije, Dr Vincent Biruta ari kumwe n’Umuyobozi Mukuru muri RDB Ushinzwe ubukerarugendo na Pariki z’igihugu, Belise Kaliza.

Iki gikorwa kigezweho nyuma y’aho muri Gashyantare 2016 ishyamba cyimeza rya Gishwati-Mukura riherereye mu ruhererekane rw’Imisozi y’isunzu rya Congo-Nil, ryemejwe nka Pariki y’Igihugu ya kane u Rwanda rufite.

Iyi pariki iherereye mu Turere twa Rutsiro na Ngororero mu Ntara y’i Burengerazuba bw’igihugu, ingana na hegitari 3 558, harimo icyanya cya Gishwati gifite ubuso bungana na Hegitari 1 570, n’icya Mukura kingana na Hegitari 1 988.

Ni pariki yabashije kubaho kubera uruhare rwa leta n’abaturage, kuko nyuma ya Jenoside yakorewe Abatutsi iyi pariki yari yarakendereye, ituzwamo abaturage ndetse ibindi bikorwa byabo birushaho kuyangiza.

Minisitiri Dr Biruta yavuze ko kuva itegeko ryo gushyiraho iyi pariki ryatorwa mu myaka ine ishize, hashyizweho ibikorwa byinshi byo kuyisana ahantu hari haragiye hangirika kubera ubucukuzi butemewe bw’amabuye y’agaciro n’ibindi bikorwa byagiye biyikorerwamo.

Yagize ati “Hashyizweho ibikorwa byo kubaka inzu aho abacunga iyi pariki bazajya bakorera, ahagurishirizwa ibintu bituruka muri ririya shyamba harimo ubuki, ibikorwa by’ubukorikori n’ibindi, ku buryo ba mukerarugendo bazajya baza, babikenera bakabibona.”

“Kuba twarashoboye gukora Pariki ya Gishwati ubu ikaba yarabaye iya kane ni igikorwa gikomeye kuko cyakiriwe neza ku rwego mpuzamahanga, iriya pariki usibye n’iby’ubukerarugendo ni igikorwa gikomeye mu kubungabunga ibidukikije.”

Umuyobozi Mukuru muri RDB Ushinzwe ubukerarugendo na Pariki z’igihugu, Belise Kaliza, yashimiye abagize uruhare bose ngo iyi pariki icungwe neza, kugeza uyu munsi igiye gutangira kubyazwa umusaruro mu buryo bw’ubukerarugendo.

Yagize ati “Ndashimira abantu bose ku byo bakoze ngo bibe bigeze uyu munsi, turizera ko Gishwati tuzayibyaza umusaruro nk’uko n’izindi pariki tuzibyaza umusaruro.”

Yavuze ko iyo bamukerarugendo bumvise ko igihugu gishyize imbere kubungabunga ibidukikije, nabo babiha agaciro gakomeye cyane.

RDB iheruka gusinyana amasezerano y’imyaka 25 n’ikigo Imizi Ecotourism Development Ltd, yo gutunganya no gucunga Pariki y’igihugu ya Gishwati-Mukura, ku buryo ihinduka igice gikorerwamo ubukerarugendo mu gihugu.

Ikigo Imizi gishamikiye kuri Wilderness Safari imaze kubaka izina mu bijyanye n’ubukerarugendo bugezweho kuri uyu mugabane.

Ayo masezerano azatuma ikigo Imizi gitunganya ndetse gicunge Pariki y’igihugu ya Gishwati Mukura ku buryo ba mukerarugendo bazoroherwa no gusura inguge n’ibisamuntu bihaboneka, RDB igumane inshingano zo kubungabunga urusobe rw’ibinyabuzima n’ibikorwa byo kurengera ibidukikije.

Iyi pariki izwiho ubwoko bw’inyamaswa zinyuranye ziganjemo inkende n’impundu (chimpanzee) n’inkima (golden monkey) n’izindi nyamaswa nto zinyuranye. Ririmo kandi amoko asaga 60 y’ibiti, birimo ibinini n’imigano. RDB yamaze gushyiraho umuyobozi w’iyi pariki, akazunganirwa n’abakozi 25 bazaba bayicunga.

Pariki y’Igihugu ya Gishwati-Mukura isanga izindi eshatu zirimo Pariki y’Igihugu y’Akagera, iy’Ibirunga na Pariki y’igihugu ya Nyungwe.

RDB igaragaza ko mu 2017 u Rwanda rwinjije miliyoni $438 zivuye mu bukerarugendo, intego ya Guverinoma ni uko mu 2024 inyungu ruvana mu bukerarugendo izagera kuri miliyoni $800.

Dr Biruta na Belise Kaliza bagaragaje ko iyi pariki izongera umusaruro w'igihugu
Minisiteri y’Ibidukikije yashyikirije Ikigo cy’Igihugu cy’Iterambere, RDB Pariki y’Igihugu ya Gishwati-Mukura, kugira ngo kiyibyaze umusaruro mu by'ukurarugendo
Minisitiri Biruta yavuze ko iyi pariki yasanwe ku buryo igihe cyari kigeze ngo itangire gusurwa
Umuyobozi Mukuru muri RDB Ushinzwe ubukerarugendo na Pariki z'igihugu, Belise Kaliza yashimiye ababigizemo uruhare bose ngo iyi pariki icungwe neza
Prime NGABONZIZA, Umuyobozi w'Ikigo cy'igihugu gishinzwe amazi n'amashyamba (RWFA)

Amafoto: Dushimimana Ami Pacique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza