Pariki y’Akagera yiteze kwinjiza miliyoni 2$ mu 2018

Yanditswe na Mukaneza M.Ange
Kuya 20 Ukuboza 2018 saa 09:52
Yasuwe :
0 0

Mu gihe habura iminsi ibarirwa ku ntoki ngo umwaka wa 2018 ugere ku musozo, ubuyobozi bwa Pariki y’igihugu y’Akagera butangaza ko muri uyu mwaka bwizeye kuzinjiza inyungu ingana na miliyoni ebyiri z’amadolari ya Amerika.

Ni mu gihe mu 2017 iyi pariki kuri ubu ibarizwamo inyamaswa eshanu zikomeye arizo Intare zimaze kuba 20, inzovu, urusamagwe, imbogo n’inkura, yari yinjije miliyoni 1.6$. Ibi bituma ibasha kwibonera 75% by’ingengo y’imari ikoreshwa mu kuyibungabunga.

Uretse kuba inyungu yinjijwe n’iyi pariki yariyongereye, ngo ukurikije abamaze kuyisura, bigaragara ko uyu mwaka uzarangira isuwe n’abasaga ibihumbi 40 bagizwe na 50% by’Abanyarwanda.

Kuba kimwe cya kabiri cy’abasuye iyi pariki ari Abanyarwanda byatijwe imbaraga n’ibikorwa byateguwe na Pariki y’Akagera birimo gahunda irebana no kurushaho gusobanura ibijyanye no kurengera ibidukikije yatumye abanyeshuri 1680 n’abayobozi b’inzego z’ibanze 300 bayisura.

Hari kandi abanyeshuri basaga 1600 baturutse mu mashuri 29 bemerewe gusura iyi pariki ku buntu, mu gihe abandi bagiye bashyirirwaho igabanuka ku giciro gisanzwe.

Uretse kuba Pariki y’Akagera iherutse iherutse kuvumburwamo ubwoko bushya bw’inzoka yiswe "Letheobia akagerae", igira uruhare mu kwinjiriza u Rwanda amafaranga avuye mu bukerarugendo, ikanagira uruhare mu iterambere ry’abayituriye aho itanga asaga agera ku bihumbi 500$ binyuze mu mishahara no kugura ibintu bitandukanye.

Pariki y’Akagera ingana na hegitari ibihumbi 120, yabayeho mu 1934; Inafasha abaturage mu bindi bikorwa birimo ubworozi bw’inzuki n’uburobyi mu biyaga bitandukanye biyibarizwa.

Iyi pariki isanzwe ibarizwamo amacumbi azwi cyane nka Ruzizi Tented Lodge ifite inyenyeri eshanu na Akagera Game Lodge iri kuvururwa, irateganya no kwakira indi y’inyenyeri eshanu kuri ubu yatangiye kubakwa na Wilderness Safaris.

Ikigo cy’Igihugu Gishinzwe Iterambere, RDB, kigaragaza ko mu 2017 ubukerarugendo bwinjirije u Rwanda miliyoni 438 z’amadolari akaba yariyongereyeho miliyoni 34 z’amadolari ugereranyije n’ayinjiye mu 2016.

Ni mu gihe abantu 94 000 basuye pariki z’igihugu zirimo n’iy’Akagera bakinjiza miliyoni 18.7 z’amadolari mu musaruro wose w’ubukerarugendo.

Inkura z'umukara zagejejwe muri Pariki y'Igihugu y'Akagera mu 2017
Pariki y'Igihugu y'Akagera ibarizwamo inyamaswa nyinshi, inini n'intoya

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza