Musanze: Kubaka ikigo cyitiriwe Ellen DeGeneres bigiye gutanga imirimo 1500

Yanditswe na Rabbi Malo Umucunguzi
Kuya 2 Gashyantare 2019 saa 03:44
Yasuwe :
0 0

Ikigega Dian Fossey Gorilla Fund cyatangaje ko imirimo yo kubaka ikigo bagenewe n’Umunyarwenya wo muri Leta Zunze Ubumwe za Amerika, Ellen DeGeneres bizatangira ku wa 12 Gashyantare 2019, mu gihe byitezwe ko kizatahwa ku mugaragaro mu 2021.

Uwo mushinga wo kubaka iki kigo kizitwa ‘Ellen DeGeneres Campus’ ni impano DeGeneres yahawe n’umukunzi we Portia De Rossi muri Mutarama 2018, ubwo yizihizaga isabukuru y’imyaka 60 y’amavuko.

Uyu mushinga wanyujijwe mu kigo Ellen DeGeneres Wildlife Fund cyashinzwe umwaka ushize, ugamije gushyigikira ibikorwa birimo ikigo cy’ubushakashatsi kizwi nka Karisoke Research Center, kimaze imyaka isaga 50 gikurikirana ubuzima bw’ingagi.

Mu butumwa Dian Fossey Gorilla Fund yashyize ahagaragara, ivuga ko kugira aho bakorera hafatika ari inzozi bagize mu myaka myinshi ishize na nyuma yo kubura ibikorwa remezo byinshi bari bafite cyane cyane mu myaka ya 1990.

Imirimo ya Fossey Fund yarakomeje ariko mu buryo butoroshye, ku buryo byagiye bibangamira iterambere ry’ibikorwa by’iki kigo.

Iyi Ellen DeGeneres Campus of the Dian Fossey Gorilla Fund ari nayo izakorerwamo ibikorwa byose bya Karisoke, ifatwa nk’igicumbi cy’ibikorwa bizaba bigamije kurengera ingagi zo mu misozi nk’inyamaswa zigikeneye kororoka bitewe n’umubare muto wazo usigaye ku Isi.

Kigira kiti “Fossey Fund ni wo muryango munini ku Isi witangiye kurengera ingagi. Twongereye cyane abakozi na porogaramu zacu nyuma y’igihe cya Dian, ndetse buri mwaka twakira ibihumbi by’abantu. Bidatangaje, ubushobozi bwacu bwo gukomeza gukura no guteza imbere ibyo dukora mu kurengera ibidukikije ntabwo bwihuta bitewe n’inyubako dukoreramo cyangwa aho iherereye.”

Ikigo Karisoke Research Center cya Fossey Fund gikorera mu nyubako gikodesha nayo idafite aho gukorera hakwiye kandi hisanzuye, mu Mujyi wa Musanze.

Icyo kigo gikomeza kiti “Ntabwo dufite ibiro bihagije, amashuri, laboratwari, aho gukorera inama cyangwa ahantu hisanzuye hagenewe gahunda rusange. Byongeye, inyubako dukoreramo ubu iri muri kilometero 30 uvuye muri Pariki y’igihugu y’Ibirunga, ahabera ibikorwa byacu bya buri munsi bijyanye no kurengera ingagi n’ubushakashatsi.”

Gusa ikigo gishya kizaba cyegereye Pariki, kikazashyirwamo ibikorwa byose bya Fossey Fund. Kizaba ari ikigo gifite ahagenewe amasomo, hazarererwa abazakora mu kubungabunga urusobe rw’ibinyabuizma mu myaka iri imbere.

Icyo kigo kandi cyitezweho kuzafasha Guverinoma y’u Rwanda guteza imbere ibikorwa byo kubungabunga ibidukikije no guteza imbere ubumenyi bw’abaturage muri urwo rwego.

Gikomeza kiti “Bizaba ari n’ishoramari rifatika mu baturiye Pariki y’Igihugu yIbirunga. Duteganya ko nko mu gihe cyo kubaka hazahangwa imirimo 1,500 (nibura abakozi 40% bazaba ari abagore) ndetse miliyoni $2 zizakoreshwa ku mirimo n’ibintu bizagurwa. Hari kandi miliyoni $2.5 zizakoreshwa ku bikoresho bizagurwa mu gihugu nibura nko muri kilometero 250 uvuye aho ubwubatsi buzabera.”

Karisoke ni izina ryahanzwe na Dian Fossey mu 1967 ubwo yubakaga amahema abiri mu ishyamba ngo atangiriremo ubushakashatsi bwe. Ni izina ryakomotse ku birunga bibiri bikikije aho yatangiriye ibikorwa, Karisimbi na Bisoke.

Umushinga wo kubaka iki kigo uzakorwa n’ikigo MASS Design Group gifite ibikorwa i Boston muri Leta Zunze Ubumwe za Amerika no mu Rwanda.

Ni ikigo gifite ubunararibonye mu gushushanya inyubako bitewe n’icyo zizakoreshwa, ari nacyo cyubatse Memorial to Peace and Justice i Montgomery, muri Leta ya Alabama.

Ikibanza iyi nyubako izashyirwamo cyaguzwe mu 2018
Ibiro bya Dian Fossey wamenyekanye nka Nyiramacibiri ni ikimenyetso gikomeye mu bikorwa byo kurengera ingagi mu Rwanda
Ellen DeGeneres n'umukunzi we Portia basuye u Rwanda umwaka ushize bareba aho ibikorwa byabo bizubakwa, banasura ingagi
Dian Fossey yatangiriye ibikorwa mu mahema abiri, ubu ibikorwa bye bigiye kubakirwa inzu igezweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza