Kenya: Umwongereza yafotoye inzovu idasanzwe iri mu zakendereye muri Afurika

Yanditswe na Ishimwe Israel
Kuya 18 Werurwe 2019 saa 11:47
Yasuwe :
0 0

Umwongereza w’inzobere mu gufotora inyamaswa zo mu gasozi, Will Burrard-Lucas, yagaragaje amafoto y’inzovu y’ingore ifite amahembe adasanzwe, yafatiye muri Kenya.

Iyi nzovu yiswe ‘Elephant Queen’, ifite umubyimba udasanzwe, amahembe yayo ni maremire ku buryo agenda ikora hasi. Abahanga mu by’imibereho y’inyamaswa zo mu gasozi bavuga ko muri Afurika habarizwa izitarenze 30.

Will Burrard-Lucas yayifotoreye muri Pariki y’Igihugu ya Tsavo muri Kenya; yafatanyije n’Umuryango udaharanira Inyungu wa Tsavo Trust nk’uburyo bwo gukomeza ubukangurambaga bwo kubungabunga izi nyamaswa.

Uyu Mwongereza w’imyaka 36 yabwiye CNN ko “Byari ibihe bidasanzwe. By’umwihariko muri iyi myaka aho inzovu zifite imitonzi miremire zagabanutse.’’

Burrard-Lucas wabaye muri Tanzania mu buto bwe, igihugu gifite pariki nyinshi, bituma yihebera gufotora inyamaswa zo mu gasozi.

Amafoto y’inzovu yayafashe yifashishije camera ikoranye ikoranabuhanga rimwemerera gufata inyamaswa iri mu ndiri yayo.

Ati “Mu myaka yashize nayikoresheje ku mishinga itandukanye, no kuri uyu nabikoze nk’uburyo bwo kugaragaza ingano y’izi nyamaswa.’’

“Ndizera ko abantu bagira ishyaka ryo kwita ku rusobe rw’ibinyabuzima kandi bashobora gushyigikira imiryango nka Tsavo Trust itanga umusanzu mu kurinda izi nyamaswa.’’

Tsavo Trust ikorana n’Ikigo gishinzwe Inyamaswa zo mu Gasozi cya Kenya Wildlife Service mu gutera inkunga ibikorwa byo kubungabunga urusobe rw’ibinyabuzima birimo no guhangana na ba rushimusi.

Will Burrard ni we wafotoye igisamagwe cy’umukara agifatiye muri ‘Laikipia Wilderness Camp’ mu Majyaruguru y’Umujyi wa Nairobi muri Kenya nyuma y’imyaka isaga 100, ubwoko bw’iyi nyamaswa busa n’ubwacitse muri Afurika. Aya mafoto yagarutsweho cyane ku mbuga nkoranyambaga yasohowe ku wa 11 Gashyantare 2019.

Uyu Mwongereza yashimangiye ko inzovu zifite amahembe maremire zigaragara hake cyane kurusha Igisamagwe cy’umukara.

Inzovu yiswe 'Umwamikazi' ifite amahembe aigenda akora hasi iyo iri kugenda
Inzovu zifite amahembe maremare zigaragara hake cyane muri Afurika
Iyi nzovu ifite imiterere idasanzwe
Muri Afurika habarizwa inzovu zigera kuri 30 gusa zifite iyi miterere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza