Ihuriro ry’ibihugu bisangiye Pariki y’Ibirunga « Greater Virunga Transboundary Collaboration » (GVTC), bigizwe n’u Rwanda, Repubulika Iharanira Demukarasi ya Congo na Uganda bahuriye hamwe mu kuvugurura amasezerano y’ubufatanye, agamije guteza imbere ubukerarugendo mu gace k’ibirunga (Virunga) no mu kubungabunga ingagi n’urusobe rw’ibinyabuzima.

Rica Rwigamba, Umuyobozi Ushinzwe Ubukerarugendo mu Kigo cy’Igihugu cy’Iterambere(RDB), uhagarariye iri hururo yagize ati "Ubufatanye n’igihugu cya Repubulika Iharanira Demukarasi ya Congo na Uganda, bidufasha kumenya ahari imitego batega ingagi, ahari ba rushimisi batega ingagi bagatwara abana bazo, bakica za nyina, abazikomeretsa no kumenya izigize ikibazo zigakurikiranwa. Binadufasha kubungabunga aka gace, kugabana umusaruro mu gihe ingagi zigiye mu kindi gihugu, no gushyiraho amategeko yo kubungabunga za pariki zihuriye mu gace k’ibirunga". .

Mu byo bazakomeza kunoza, harimo ko umuryango w’ingagi wimukiye mu kindi gihugu uzajya ukomeza kuhasurirwa ntawe uwubangamiye, bityo ibihugu bigabane amafaranga yavuye mu musaruro.

Rwigamba agira ati "Hashize imyaka ine dufite ingagi yavuye mu gihugu cya Congo, isurirwa mu Rwanda. Tugabana umusaruro wavuye mu bukerarugendo, tukabaha 50% mu Rwanda hagasigara andi 50% ".

Rwigamba yavuze ko banize ku buryo ubukerarugendo bwo mu karere k’ibirunga (Virunga), bwarushaho gutezwa imbere mu gusura imisozi miremire bayizamuka, no kuhakora ubushakatsatsi.

Pariki y’Ibirunga mu Rwanda yinjiza amadolari ava mu bukerararugendo asaga 90% by’umusaruro uva muri za pariki. Muri 2012, yinjije miliyoni 9 z’amadorari y’Amerika, muri miliyoni icumi zavuye mu bukerarugendo bwa za Pariki zose uko ari eshatu.

Umuyobozi wa Pariki y’Ibirunga Uwingeri Prospère, yavuze ko ku munsi abasura iyi Pariki baba bari hagati ya 75 na 80, mu byiciro bitandukanye (gusura ingagi, kuzamuka imisozi...), akaba ari muri urwo rwego bakomeza guhura ngo bungurane ubumenyi mu gukomeza guteza imbere za pariki zo mu gace k’ibirunga.