Hagiye kubakwa indi nzira ifasha ba mukerarugendo kwinjira muri Pariki y’Akagera

Yanditswe na Hakizimana Jean Paul
Kuya 23 Gashyantare 2019 saa 10:08
Yasuwe :
0 0

Ikigo cy’Igihugu gishinzwe Iterambere, RDB, cyatangaje ko kigiye kubaka indi nzira yinjira muri Pariki y’Igihugu y’Akagera, izafasha cyane abatuye mu turere twa Nyagatare na Gatsibo na ba mukerarugendo binjirira ku mupaka wa Kagitumba.

Iyi nzira izubakwa mu Karere ka Gatsibo inyure mu murenge wa Rwimbogo ahazwi nka ‘Finance’, ikomeze mu gice gito cy’Ikigo cya gisirikare cya Gabiro ihinguke ku musozi wa Mutumba mu murenge wa Mwili mu karere ka Kayonza, iboneze muri Pariki.

Pariki y’Igihugu y’Akagera ni imwe muri Pariki ubu zikomeye kuri uyu mugabane wa Afurika, nyuma yo kugezwamo ubwoko butanu bw’inyamaswa zikomeye zirimo Inkura, Intare, Imbogo, Inzovu n’Ingwe.

Inzira rukumbi isanzwe yinjira muri iyi pariki ica mu karere ka Kayonza igakomeza Rwinkwavu na Ndego. Ni inzira itorohereza abatuye mu majyaruguru ya pariki, ubusanzwe hageraga inzira isohokamo gusa.

Kubaka inzira nshya byatangajwe kuri uyu wa Gatanu mu nama nyunguranabitekerezo ku bukerarugendo yabereye mu Ntara y’Iburasirazuba. Yahuje abayobozi b’uturere, abahagarariye abikorera, abafatanyabikorwa, ubuyobozi bw’intara n’ubuyobozi bwa RDB.

Umuyobozi Mukuru muri RDB Ushinzwe ubukerarugendo, Belise Kariza, yavuze ko iyi nzira yashyizweho hagamijwe korohereza abashaka gusura Pariki y’Igihugu y’Akagera kuyigeramo byoroshye.

Ati “Impamvu ya mbere yatumye dushyiraho iyi nzira nk’umuntu waje hano muri hoteli [EPIC] i Nyagatare ashaka gusura Pariki, kugira ngo yinjire [muri pariki] byamusabaga kujya kuzenguruka i Kayonza akabona kwinjira kandi ni urugendo rurerure cyane uturutse hano.”

Yakomeje avuga ko bahisemo gushyira iyi nzira muri Gatsibo kuko ari akarere kari hagati, bakazabanza kubaka umuhanda winjira muri pariki n’ibindi bikorwa remezo.

Guverineri w’Intara y’Iburasirazuba, Mufulukye Fred, yavuze ko iyi nzira niyuzura izazamura umubare wa ba mukerarugendo barara muri iyi ntara, bitume hoteli ziyubatsemo zibona abakiliya.

Ati “Ikindi bizorohereza abantu basuraga amahoteli ya Nyagatare ariko bashaka kujya muri parike bakabwirwa ko ari ugusubira Kayonza kugira ngo bayinjiremo.”

Abikorera bo mu turere twa Nyagatare na Gatsibo bavuga ko bagiye kongera ibikorwa remezo kugira ngo ba mukerarugendo bazajye bahaca ntibabure aho kurara, aho kurira n’ibikorwa byinshi bizatuma bagaruka.

Umuyobozi w’Urugaga rw’abikorera mu Karere ka Gatsibo, Nkusi Charles, yabwiye IGIHE ko biteguye gukoresha neza amahirwe yo kwakira ba mukerarugendo.

Ati “Nk’abikorera turateganya kubaka inzu z’ubucuruzi n’amahoteli kuri uwo muhanda uzubakwa inaha ku buryo ba mukerarugendo batazongera kujya kurara mu tundi turere.”

Byitezwe ko iyi nzira niyuzura kandi izateza imbere zimwe muri hoteli zirimo Epic y’inyenyeri enye iherereye i Nyagatare na Ntende hotel y’inyenyeri ebyiri yegeranye n’iyi nzira izafungurwa.

Mu 2018 Pariki y’Igihugu y’Akagera yasuwe n’abantu ibihumbi 44, abanyarwanda bakaba bangana na 60% .Yinjije miliyoni imwey’amadolari.

Muri iyi nama kandi hamuritswe tumwe mu duce nyaburanga turi muri buri karere kose ko muri iyi ntara harimo Pariki y’Igihugu y’Akagera n’ahandi hafite ibimenyetso by’amateka hashobora gusurwa.

Harimo Urutare rwa Ngarama, Utubindi twa Rubona, Agasozi ka Nyabwishongwezi aho Gen Maj Gisa Fred Rwigema yaguye ku rugamba rwo Kwibohora, agasozi ka Fumbwe katurutseho umugani uvuga ngo ‘Utazi akaraye i Fumbwe araza ifu’ n’ahandi.

Inzira yinjira muri Pariki y'Igihugu y'Akagera isanzwe mu Karere ka Kayonza
Mu marembo ya Pariki y'Igihugu y'Akagera ahakirirwa ba mukerarugendo
Pariki yashyizweho uruzitiro rw'amashanyarazi
Imvubu zikunze kuboneka mu biyaga bigize Pariki y'Akagera
Imparage ni zimwe mu nyamaswa ziboneka cyane muri iyi pariki
Pariki y’Akagera ibarizwamo inyamaswa nyinshi zirimo Inkura, Isatura, Inzovu, Intare n’izindi
Ibitera ubibona cyane ucyinjira muri Pariki
Imbogo ziri mu bwoko butanu bw’inyamaswa zikomeye zigaragara muri Pariki y’Igihugu y’Akagera
Pariki yashyizweho uruzitiro rw'amashanyarazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza